SPORTS

Target ngayon ng Philippine boxing team na humakot ng medalya sa 31st Southeast Asian Games na gaganapin sa Hanoi, Vietnam.

Ayon kay Association of Boxing Alliances in the Philippines (ABAP) Secretary-General Marcus Jarwin Manalo, plano nilang lampasan ang bilang ng mga medalyang nakuha noong 2019 SEA Games kung saan, humakot ng 7 gold medals, 3 silver medals at 2 bonze medals ang Pilipinas.

Ayon kay Manalo, may mga timeline na ang kanilang mga coach na kasama sa training para mas matutukan ang magandang fight plan sa bawat laban ng mga boksingero.

Dahil dito, tutulong sa pangangasiwa sa mga Pinoy boxers sina Australian Coach Don Abnett, na tumulong din sa panalo ng mga olympians na sina Flyweight Carlo Paalam, Featherweight Nesthy Petecio, at Middleweight Eumir Felix Marcial.

Kasalukuyang nasa Thailand ang mga Pinoy boxer upang doon magsanay at maghanda para sa SEA Games.

Wala pa ring final line-up ang Gilas Pilipinas para sa Southeast Asian Games, na magsisimula sa Mayo a-12 sa Hanoi, Vietnam.

Ayon kay Butch Antonio, deputy executive director ng Samahang Basketbol ng Pilipinas (SBP), hiniling na nila sa Philippine Olympic Committee na i-atras ang deadline na noon pang Marso a-12 nagtapos.

Ito ay para masigurong maayos ang line-up at makamit ang gold medal.

Mayroong 16 na manlalaro ang Gilas, pero 12 lamang ang ilalaban sa SEA Games.

Kabilang dito sina; June Mar Fajardo, Japeth Aguilar, Kevin Alas, Thirdy Ravena at Dwight Ramos.

Nabigong masungkit ng Atlanta Hawks ang panalo sa game 4 ng NBA playoffs matapos pabagsakin ng Miami Heat.

Hindi nakabawi ang Hawks kontra Miami sa ikalawa hanggang sa ika-4 na quarter dahilan para maitala ang iskor na 110-86.

Nanguna sa panalo ng Miami si Jimmy Butler matapos maitala ang 36 points, 10 rebounds at 4 assists habang nasayang naman ang 24 points ni De’Andre Hunter ng Hawks.

Abangan naman ang susunod na laban ng Miami at Hawks sa game 5 ng NBA playoffs bukas, alas-7 ng umaga, oras sa Pilipinas.

Pinagmulta ng NBA ng $15-K ang coach ng Memphis Grizzlies na si Taylor Jenkins.

Dahil ito sa pagpuna ni Jenkins sa referees ng laban nila kontra Minnesota Timberwolves kahapon.

Kinutya ni Jenkins ang hindi umano consistent at aroganteng mga referee kaya’t nakahihiya silang kasama.

Hindi naman pinalad na magwagi ang Memphis sa dikit lang na score na 119-118.

Itinanghal na overall champion ang Pinoy eRacer sa ikawalong global edition ng eRacing Grand Prix (ERPG).

 Ayon sa nagwaging si Iñigo Anton na nanguna sa gold class standings, hindi siya makapaniwala sa nangyari matapos ang ikawalong season.

 Ang ERPG ay isang online motorsports competitions na gumagamit ng driving simulator, console at computer.

 Hinati ito sa apat na bahagi; gold, silver, bronze at copper.

 Ilan sa mga bansang pasok sa top 10 ng kompetisyon ay ang; Singapore, Malaysia, Hong Kong, Indonesia, Australia at US.

Nasa Brazil na ang Philippine Women’s National Volleyball team, bilang paghahanda sa 31st Southeast Asian Games.

15 araw ang magiging ensayo ng koponan na magaganap dalawang beses kada araw.

 Ayon sa bagong talagang head coach ng koponan na si Jorge Souza de Brito, sumabak na ang volleyball team sa ilang tune-up games kalaban ang ilang pro-team ng Brazil.

 Kilala ang Brazil sa high-level volleyball, kaya inaasahang maraming matutunan ang Philippine team.

 Pagkatapos ng training, babalik pa sa Pilipinas ang grupo bago bumiyahe patungong Vietnam na venue ng Southeast Asian Games.

Malaki ang tiwala ni Ginebra San Miguel star center-power forward Japeth Aguilar na kaniyang mababawi ang panalo ng kanilang koponan sa season 47 ng PBA matapos ma-injury.

Ayon kay Aguilar, sabik na siyang makabalik sa basketball court pero dahil hindi na bumabata ang ating mga edad at pangangatawan, kailangan na aniyang maging mas maingat at patuloy na  pangalagaan ang kalusugan.

Matatandaang hindi nakuha ni Aguilar ang unang tatlong laro ng best-of-seven finals matapos magka-MCL sprain o Medial Collateral Ligament sa kaliwang tuhod kung saan nakuha ng meralco ang 2-1 lead sa serye.

Sinabi ni Aguilar na satisfied naman daw siya sa kaniyang mga ipinapakitang moves sa laro kaya nais niya lang mag-enjoy sa laban.

Napanatili ni British boxer Tyson Fury ang pagiging World Boxing Council (WBC) Heavyweight Champion matapos pabagsakin si Dillian Whyte.

Sa laban nagpakita ng kaniyang masterclass performance si Fury sa binitawang uppercut na siyang nagpabagsak sa sixth round kay Whyte.

Nagawa namang tumayo ni Whyte pero naghudyat na ang referee na itigil ang bakbakan.

Dahil sa panalo ay lalo pang umangat ang rekord ni Fury.

Aalisin na ang  bubble set-up sa training sessions sa mga sports team sa bawat unibersidad at kolehiyo.

Ito ay matapos aprubahan ng Commission on Higher Education (CHED) ang pagluluwag sa panuntuan ng training sessions ng mga paaralang miyembro ng National Collegiate Athletic Association (NCAA) at University Athletic Association of the Philippines (UAAP).

Ibig sabihin, pwede nang umuwi sa kanilang bahay ang mga players, coaches o varsity squads pagkatapos ng ensayo.

Pero paalala ng CHED, dapat paigitingin pa rin ang pagsunod sa minimum health protocols at iwasan ang makampante dahil nasa paligid pa rin ang COVID-19.

Babalik na ang National Collegiate Athletic Association (NCAA) sa kanilang dating venue na Filoil Flying V Center simula sa April 29, 2022.

Matatandaan na kamakailan lamang isinagawa ng NCAA ang ilan sa kanilang mga basketball games sa La Salle Green Hills, sa Lungsod ng San Juan.

Base sa memorandum na inilabas ng liga kahapon, gaganapin na ang laban ng University of Perpetual Help System Dalta at ng Emilio Aguinaldo College sa Flying V Center sa darating na Abril a-bente nwebe.

Habang sa venue rin na ito isasagawa ang play-in tournament, na naka-iskedyul sa May 1 at May 4 ng taong kasalukuyan.