SPORTS

Magbabanggan na ang defending NBA Champion Milwaukee Bucks at Boston Celtics sa semi-finals ng Eastern Conference Division.

Ito’y makaraang maungusan na ng Bucks sa kartadang 4-1 sa 1^st round ng playoffs ang Chicago Bulls.

Tinalo ng Milwaukee ang Bulls sa score na 116-110 sa kanilang paghaharap sa Game 5, kahapon.

Sasagupain ng defending champions ang Celtics sa game 1 sa homecourt nito sa Boston TD Garden Arena, sa Lunes.

Kinumpirma ng 7 feet 2 inches at 232 pounds na si Kai Sotto na siya ay sasabak sa 2022 NBA rookie draft.

 Kumpiyansa si Kai na mas sapat ngayon ang kaniyang galing kung ikukumpara noong sa nakaraang taon.

 Matatandaan na nito lamang nakaraan linggo, hinirang si Sotto bilang fans’ most valuable player award ng Australian National Basketball League.

 Samantala, nagpasalamat naman si Kai sa kanyang team na Adelaide 36ers maging sa kanyang mga pamilya at mga fans dahil sa patuloy na pagsuporta sa pag-abot ng kanyang mga pangarap.

Hindi maglalaro sa Gilas Pilipinas ang NBA prospect na si Kai Sotto sa 31st Southeast Asian Games sa Hanoi, Vietnam.

Nilinaw ni Gilas Team Manager Butch Antonio na walang planong isama ang 7-foot-3 center sa Sea Games Roster sa huling minuto lalo’t katatapos lamang ng kanyang NBL Season sa Adelaide 36ers.

Umugong ang issue sa posibleng stint ni Kai sa Sea Games kung saan ipagtatanggol ng Gilas ang Men’s Basketball Gold matapos ibalita na hindi makapaglalaro si big man Japeth Aguilar dahil sa injury na natamo nito sa PBA Governors Cup Playoffs.

Magugunitang pinangalanan ni Gilas Coach Chot Reyes ang 16-man pool para sa Sea Games team na kinabibilangan ni Aguilar, bagama’t sinabi ni Antonio na hindi pa ito nagsusumite ng kanilang final 12-man lineup.

Target ngayon ng Philippine boxing team na humakot ng medalya sa 31st Southeast Asian Games na gaganapin sa Hanoi, Vietnam.

Ayon kay Association of Boxing Alliances in the Philippines (ABAP) Secretary-General Marcus Jarwin Manalo, plano nilang lampasan ang bilang ng mga medalyang nakuha noong 2019 SEA Games kung saan, humakot ng 7 gold medals, 3 silver medals at 2 bonze medals ang Pilipinas.

Ayon kay Manalo, may mga timeline na ang kanilang mga coach na kasama sa training para mas matutukan ang magandang fight plan sa bawat laban ng mga boksingero.

Dahil dito, tutulong sa pangangasiwa sa mga Pinoy boxers sina Australian Coach Don Abnett, na tumulong din sa panalo ng mga olympians na sina Flyweight Carlo Paalam, Featherweight Nesthy Petecio, at Middleweight Eumir Felix Marcial.

Kasalukuyang nasa Thailand ang mga Pinoy boxer upang doon magsanay at maghanda para sa SEA Games.

Wala pa ring final line-up ang Gilas Pilipinas para sa Southeast Asian Games, na magsisimula sa Mayo a-12 sa Hanoi, Vietnam.

Ayon kay Butch Antonio, deputy executive director ng Samahang Basketbol ng Pilipinas (SBP), hiniling na nila sa Philippine Olympic Committee na i-atras ang deadline na noon pang Marso a-12 nagtapos.

Ito ay para masigurong maayos ang line-up at makamit ang gold medal.

Mayroong 16 na manlalaro ang Gilas, pero 12 lamang ang ilalaban sa SEA Games.

Kabilang dito sina; June Mar Fajardo, Japeth Aguilar, Kevin Alas, Thirdy Ravena at Dwight Ramos.

Nabigong masungkit ng Atlanta Hawks ang panalo sa game 4 ng NBA playoffs matapos pabagsakin ng Miami Heat.

Hindi nakabawi ang Hawks kontra Miami sa ikalawa hanggang sa ika-4 na quarter dahilan para maitala ang iskor na 110-86.

Nanguna sa panalo ng Miami si Jimmy Butler matapos maitala ang 36 points, 10 rebounds at 4 assists habang nasayang naman ang 24 points ni De’Andre Hunter ng Hawks.

Abangan naman ang susunod na laban ng Miami at Hawks sa game 5 ng NBA playoffs bukas, alas-7 ng umaga, oras sa Pilipinas.

Pinagmulta ng NBA ng $15-K ang coach ng Memphis Grizzlies na si Taylor Jenkins.

Dahil ito sa pagpuna ni Jenkins sa referees ng laban nila kontra Minnesota Timberwolves kahapon.

Kinutya ni Jenkins ang hindi umano consistent at aroganteng mga referee kaya’t nakahihiya silang kasama.

Hindi naman pinalad na magwagi ang Memphis sa dikit lang na score na 119-118.

Itinanghal na overall champion ang Pinoy eRacer sa ikawalong global edition ng eRacing Grand Prix (ERPG).

 Ayon sa nagwaging si Iñigo Anton na nanguna sa gold class standings, hindi siya makapaniwala sa nangyari matapos ang ikawalong season.

 Ang ERPG ay isang online motorsports competitions na gumagamit ng driving simulator, console at computer.

 Hinati ito sa apat na bahagi; gold, silver, bronze at copper.

 Ilan sa mga bansang pasok sa top 10 ng kompetisyon ay ang; Singapore, Malaysia, Hong Kong, Indonesia, Australia at US.