SPORTS

Umalma si Spanish Tennis Star Rafael Nadal sa pagbabawal ng Wimbledon sa mga players ng Russia at Belarus.

Sinabi ni Nadal na hindi makatuwiran ang hakbang ng Wimbledon at naniniwala aniya silang may magagawa ang England Club para hindi matuloy ang pasya ng Wimbledon.

Binigyang-diin ng 21 time major winner na may karapatan ang lahat na makilahok sa Wimbledon at iba pang tennis events sa buong mundo.

Una na ring binatikos ng Association of Tennis Professionals (ATP) at Women’s Tennis Association (WTA) ang naging pasya ng Wimbledon na nag ugat sa paglusob ng Russia sa Ukraine.

Nakakulong ngayon sa Santa Rita Jail sa California U.S ang Filipino boxer na si All Rivera dahil sa kasong pang-aabuso at pambubugbog o adult abuse.

Sa impormasyong nakuha ng mga otoridad sa mga kasambahay ng boksingero, nagwala umano at nanakit si Rivera nang dalhin sa isang psychiatric facility matapos mapansin ang pabago-bago nitong ugali dahil umano sa depression.

Nakatakda ngayong araw, Mayo a-2, ang pagdinig sa kasong isinampa laban kay Rivera sa Manuel Courthouse sa Oakland na may piyansang aabot sa $45-K o katumbas ng P2.35-M.

Matatandaang si Rivera ay gumawa ng rekord na 18 knockouts kung saan, huli siyang nakipaglaban Hunyo noong nakaraang taon sa American boxer na Omar Juarez at nagwagi via majority decision.

Nasungkit ni Fil-Am Willie Morrison III ang ikalawang gintong medalya sa men’s shot put para tapusin ang Philippine Athletics Championships sa PhilSports Track Oval sa Pasig City.

Ito ay matapos niyang talunin si John Albert Mantua nang makuha niya ang 17.06 meters sa shot put sa kaniyang ika-apat na subok.

Pumangalawa lamang si Mantua sa laban habang pangatlo si John Michael Fajardo.

Nabatid na nakapagtala ng bagong SEA games at national record na 18.38 meters si Morrison sa New Clark City Athletic Stadium sa Capaz, Tarlac tatlong taon na ang nakalipas.

Nagpakitang gilas ang pambato ng bansa na Philippine women’s football team sa ginanap na international friendly match sa Valentine Sports Park sa Sydney, Australia.

Ito ay matapos tambakan ng Pinas ang kalaban nitong Tonga sa iskor na 5-0.

Pinangunahan nila Anicka Castaneda, Eva Madarang at Carleigh Frilles ang nasabing friendly match.

Nabatid na ang nasabing laro ay bahagi ng preparasyon ng bawat bansa sa Asya para sa gaganaping 31st Southeast Asian Games sa Hanoi, Vietnam.

Aabot sa 23.5M tickets ang inaasahang ibebenta para sa gaganaping World Cup sa Qatar.

Pahayag ng Fédération Internationale de Football Association (FIFA), base ito sa naging kahilingan ng mga mga bansang kabilang sa pandaigdigang palakasan na kinabibilangan ng Argentina, Brazil, England, France, Mexico, Qatar, Saudi Arabia at United States.

Ayon sa FIFA, marami sa mga manonood ang mas nais na manood sa mismong araw ng pinale sa December 18.

Pinaka-inaabangan umanong laban dito ang paghaharap ng Argentina at Mexico, Argentina vs. Saudi Arabia at England vs.US.

Kung ikukumpara daw noong 2018 world cup na ginanap sa Russia, mas mataas daw ngayon ng 30% ang presyo ng mga ticket at mas magmamahal pa ito sa mga final games na posibleng umabot sa 45% o $1,600.

Nahaharap sa matinding dagok ang Philadelphia 76ers matapos magka-injury ang kanilang star center na si Joel Embiid.

Ayon sa report, nagtamo ng orbital fracture o pinsala sa mata si Embiid sa kanilang blowout win laban sa Toronto Raptors kahapon.

Nabatid na tinamaan ng siko ni Pascal Siakam ang kanang mata ni Embiid habang tinatangka nitong ipasok sa ring ang bola.

Matatandaang isinalang sa left eye surgery ang Sixers player noong 2018 dahil din sa katulad na insidente.

INILAMPASO ng Yokohama B-Corsairs ang Ibaraki Robots sa score na 91-73 sa kanilang laro sa Japan B.League.

Kumamada si Javi Gomez de Liano ng 15 points ngunit hindi pa rin nito naisalba ang Robots sa kamay ng B-Corsairs.

Samantala, pinadapa rin ng Shimane Susanoo Magic ang Shiga Lakestars sa score na 97-56.

Anim na puntos lamang ang nagawa ng Pinoy na si Kiefer Ravena para sa Lakestars, kasama ang dalawang rebounds at dalawang steals.