Nagwagi via unanimous decision matapos magawang madepensahan ni Filipino Olympic Boxer Charly Suarez ang kanyang WBA Asia Super Featherweight title laban sa kababayang si Mark John Yap sa kanilang naging laban na ginanap sa Parañaque City.
Nabatid na pumabor ang mga hurado kay Suarez sa iskor na 120-108; 120-108 at 118-110 sa kabila ng pagpapakita ni Yap sa kanyang veterans moves.
Nakontrol ni Suarez ang laban dahilan para mapanatili ang malinis na record sa 12 panalo.
Patay ang Jiu Jitsu champion na si Leandro Lo matapos barilin isang night club sa Rio De Janiro, Brazil.
Ayon sa mga otoridad, isa umanong off-duty na pulis ang nakabaril sa ulo ng biktima na mabilis na tumakas matapos ang insidente.
Bagama’t agad na naitakbo ang biktima sa pagamutan ay agad din itong binawian ng buhay.
Mababatid na itinuturing na pinakamagaling na Jiu Jitsu athlete si Lo na nagwagi ng walong beses sa world championships.
Nasungkit ng koponan ng Pilipinas ang ikatlong pwesto 2022 Junior League Softball World series na ginanap sa Kirkland, Washington.
Ito ay matapos pataubin ang koponan ng Southwest sa quarterfinals sa iskor na 6-0.
Sa kabila nito, bigong makausad ang Pilipinas sa finals ng naturang kompetisyon matapos talunin ng Southeast sa iskor na 4-6.
Gayunman, masaya pa rin ang koponan na umabot sa semifinals at nakapagbigay ng karangalan sa bansa.
Nagpahiwatig ang Olympic Champion na si Hidilyn Diaz-Naranjo kaugnay sa posibleng pagreretiro niya pagkatapos ng 2024 Paris Olympics.
Sa isang Facebook post, ibinahagi ng atleta ang larawan ng kanyang mga kamay at isang liham patungkol sa weightlifting.
Sinariwa ni Hidilyn ang 2016 Rio Olympics kung saan nakamit niya ang silver medal, na isa aniya sa proudest moments ng kanyang buhay.
Determinado ang Pinay weightlifting star na gawin ang lahat para sa 2024 Paris Olympics gayunman, tila desido na rin ito na magretiro at bumuo ng pamilya kasunod nang ipinahiwatig nitong #lastlift.
Nito lamang July 26 nang ikasal si Hidilyn kay Julius Naranjo, kung saan ipinagpaliban muna nila ang kanilang honeymoon bilang paghahanda sa olympics.
Pasok sa Women’s Tennis Association hardcourt tournament finals si American tennis player Shelby Rogers na naganap sa San Jose State University, California, USA, kahapon
Ito’y matapos umiskor si Rogers ng 6-3, 6-4 na puntos laban kay 19th-ranked Veronika Kudermetova.
Matatandaang unang nakatuntong sa finals si Rogers noong 2016 at inaasahang makakalaban nito sa finals si Spain tennis player Paula Badosa o si Daria Kasatkina.
Ibabalik na ng Philippine Sports Commission (PSC) at Philippine Athletics Track and Field Association (PATAFA) sa National team ang Olympian Pole Vaulter na si Ej Obiena.
Ayon sa PSC, nagpadala na ng impormasyon si PATAFA President Agapito Capistrano para sa desisyon nitong ibalik si Obiena.
Napagdesisyunan ni Capistrano ang hakbang matapos matagumpay na makapag-uwi si Obiena ng medalya.
Naalis sa National team si Obiena dahil sa alegasyong maling paggamit nito sa kanyang allowance na kalaunan ay nalinis din. —sa panulat ni Hannah Oledan
Bigong maka-abante sa W100 tournament na ginanap sa Poland si Filipina tennis player Alex Eala.
Ito ay matapos siyang padapain ni WTA number 14 Katharina Hobgarski ng Germany.
Nabatid na simula pa lamang ay umarangkada na ang German tennis player sa score na 2-0, bagama’t sa pagpasok ng second set ay nakahabol ng bahagya si Eala ay nabigo pa rin ang 17-anyos na atleta.
Magugunita na noong Hunyo ay nagtapos sa runner-up si Eala sa W60 level, habang nagwagi siya sa Chiang Rai championship sa Thailand noong Abril sa W25 tier
Hinatulan ng siyam na taong pagkakakulong ang american women’s basketball star na si Brittney Griner dahil sa smuggling ng droga patungong Russia.
Si Judge Anna Sotnikova ng Khimki City Court ang naglabas ng hatol, kung saan maliban sa pagkakakulong ay pinagmulta rin ng 16,400 dollars ang wnba star na lumabas na guilty sa kaso.
Noong Pebrero naaresto si Griner sa Moscow Airport matapos makumpiska ang nasa isang gramo ng cannabis oil sa kaniyang bagahe.
Depensa naman ng manlalaro na aksidente niya lang itong nailagay sa kaniyang bag dahil sa pagmamadali.
Ginagamit niya lang din ang gamot para maibsan ang kaniyang severe chronic pain.
Pumalo na sa 72 ang medalyang nasungkit ng mga pinoy para-athlete sa 11th ASEAN Para Games Solo 2022 na patuloy na isinasagawa sa Surakarta, Indonesia.
Ayon sa Philippine Sports Commission (PSC), patuloy paring lumalaban ang mga atletang pilipino dahilan kaya patuloy ding nadaragdagan ang karangalan ng bansa.
Batay sa medal standing ng naturang kompetisyon, nasa ika-5 rank parin ang bansa na mayroong 19 gold medals; 20 silver medals; at 33 bronze medals.
Samantala, nangunguna parin sa puwesto ng naturang kompetisyon ang Indonesia na may 252 medals; sinundan ng Thailand na may 174 medals; Vietnam na mayroong 124 medals; at Malaysia na mayroong 37 medals.
Kasado na ang rematch ni dating World Champion Jerwin Ancajas kay Fernando Martinez sa Oktubre a-otso.
Gaganapin ang muling paghaharap ng mga boksingero sa Los Angeles.
Matataandaang tinalo ng Argentinian boxer si Ancajas sa pamamagitan ng unanimous decision noong Pebrero.
Sinabi naman ng trainer ng Pinoy boxer na si Joven Jimenez na kinumpirma ni Ancajas ang rematch ilang buwan matapos matalo sa laban.