SPORTS

Nabawi ni Brazilian mixed martial artist Amanda Nunes ang UFC Women’s World Bantamweight Title sa UFC 277 na ginanap sa American Airlines Center sa Dallas, Texas.

Ito ay kasunod ng unanimous decision sa sagupaan nina Nunes at Julianna Pena ng Amerika.

Sa first round ng laban parehong nagpakita ng maingat na pagdepensa ang dalawa kung saan tinamaan ng right hook ni Nunes si Pena.

Sa second round naman, napabagsak muli ni Nunes ang kalaban gamit pa rin ang kanang suntok nito.

Matapos ang ilang palitan ng bigwas, napatumba muli ni nunes si Pena sa third round gamit ang straight left hand nito.

Dahil sa panalo, may record na 22-5 si Nunes habang bumagsak sa 11-5 si Pena.

Tiniyak ng Philippine Basketball Association (PBA) ang buong suportang ibibigay sa Gilas Pilipinas na naghahanda na ngayon para sa 2023 FIBA World Cup.

Ayon sa PBA, ito ang rason kung bakit lilimitahan na lamang sa dalawang conference ang PBA Season 48 upang makapili ng manlalaro si Gilas coach Chot Reyes.

Ikinokonsidera rin nila ang pagkuha ng manlalaro mula sa 10 clubs ng PBA na hindi kasama sa Philippine Cup finals.

Magsisimula ang 48th Season ng PBA pagkatapos ng World Cup kung saan magiging Co-host ng Pilipinas ang Japan at Indonesia.

Abot na sa P500-K ang tulong-pinansyal na ibibigay ng kampo ng Filipino pole vaulter na si EJ Obiena sa Sprint Queen na si Lydia de Vega na nasa kritikal na kondisyon dahil sa Breast Cancer.

Ayon kay Obiena, una niyang ipinangako ang pagbibigay ng P200-K na insentibo mula sa Philippine Sports Commission.

Nakuha ito ni Obiena matapos makamit ang bronze medal sa katatapos lang na 2022 World Atlethics Championship.

Tinapatan ng adviser ni Obiena na si James Lafferty ang halaga para sa magiging operasyon ni De Vega.

Matatandaang humingi noon ng tulong pagdarasal at pinansiyal ang kaanak ni De Vega matapos itakbo sa pagamutan ang Sprint Queen dahil sa breast cancer.

Opisyal nang naghayag ng pagreretiro si Formula 1 and four-time world champion Sebastian Vettel.

Ayon kay Vettel, nais na niyang tutukan ang kaniyang pamilya at ibang interest sa labas ng sports.

Mababatid na ang 35-anyos na German F1 driver ng Aston Martin team ay nakuha ang kaniyang titulo sa Red Bull mula 2010 hanggang 2013 at iginugol rin nito ang anim na season sa Ferrari.

Samantala, magsisimula ang kaniyang retirement sa pagtatapos ng Formula 1 2022 season.

Mananatiling coach ng Gilas Pilipinas si Chot Reyes.

Ito ay kasunod ng panghihikayat ng isang grupo sa social media na magbitiw na bilang coach si Chot Reyes matapos bigong makuha ng bansa ang men’s 5×5 basketball gold medal sa 31^st Southeast Asian Games 2021 na ginanap sa Hanoi, Vietnam noong Mayo.

Ayon kay Reyes, maraming nagmemessage sakaniya at nagpapadala ng e-mail na nagsasabing magresign na siya pero hindi niya ito nireplyan.

Nilinaw din ni Reyes na nag-resign siya pero hindi umano tinanggap ng Samahang Basketbol ng Pilipinas (SBP) kung saan, sinabi niya na hinding-hindi tatalikuran ang kaniyang tungkulin sa bandila at bansa.

Samantala sa iba pang balita, lalaro naman sa Korean Basketball League si NCAA Season 97 MVP at Gilas star Rhenz Abando kasunod ng ipinakita nitong magandang performance sa laro.

Nabatid na si Abando ang magiging ikalimang pinoy na maglalaro sa Korea league kasama ng iba pang Pinoy basketball athletes.

Aabot sa 20 NBA players ang inilagay sa free-agency matapos mapaso ang kanilang kontrata.

Kabilang sa mga manlalarong nakabitin ang karera ay ang mga mahuhusay o beteranong manlalaro kabilang na ang 23-year-old scoring guard mula sa Cleveland Cavaliers na si Collin Sexton; veteran players na sina Carmelo Anthony at Dwight Howard ng Lakers; at Blake Griffin ng Brooklyn na ngayon ay nasa restricted free agent market.

Nabatid na tumanggi din ang mga ito na magkaroon ng extension sa ilalim ng kanilang team at patuloy na nag-aantay na kunin ng ibang mga teams.

Samantala, nakabitin din ang career nina center Hassan Whiteside ng Utah Jazz; Tristan Thompson ng Chicago Bulls; Lamarcus Aldridge ng Brooklyn Nets; Demarcus Cousins ng Denver Nuggets; Rajon Rondo ng Cavs; point guard ng Charlotte Hornets na si Isaiah Thomas; at iba pa.