SPORTS

Sasabak sa exhibition match ang pinay olympic gold medalist na si Hidilyn Diaz na gaganapin ngayong taon sa Tagbilaran, Bohol.

Ayon kay Samahang Weightlifting ng Pilipinas President Monico Puentevella, pagbibidahan ng atleta ang sisiklab na samahang weightlifting ng Pilipinas National Open Championship.

Sinabi ni Puentevella na hangad mismo ni Hidilyn na makapagbigay ng inspirasyon sa mga weightlifter ng bansa at ipaalam na kaya rin nilang umabot sa olympics gaya ng kanyang nagawa noong nakaraang taon sa Tokyo, Japan.

Papalo sa 5 million dollars o katumbas ng mahigit 277 million pesos ang halaga sa Sotheby Auction ng finals jersey ni National Basketball Association (NBA) Legend Michael Jordan.

 Nabatid na ang nasabing jersey ay ang sinuot ni Jordan sa game one ng 1998 finals na kilala bilang ‘last dance’ dahil ito ang huling kampeonato ng manlalaro.

 Magbubukas naman ang bidding ng ipinasusubastang finals jersey sa Setyembre a-sais hanggang Setyembre a-katorse.

Sinimulan na ang paglilitis sa isinampang reklamo ni Vanessa Bryant ukol sa maling paggamit ng mga larawan ng nangyaring helicopter crash na ikinamatay ng anak at asawang si Basketball Legend Kobe bryant sa California noong January 26, 2020.

 Ayon kay Vanessa Bryant, invasion of privacy ang ginawa ng mga Sheriff at Deputy ng Los Angeles County sa pagsasapubliko ng mga larawan ng yumaong mag-ama nang walang permiso.

 Sinabi rin ng abogado ni Bryant na may hawak sa nasabing kaso na natatakot ang pamilya na maging sanhi ng trauma ang mga nasabing larawan kung makikita ito ng kanilang ibang anak sa social media.

 Nabatid na una nang nanindigan ang mga opisyal ng Los Angeles County na ang mismong pagbagsak ng helicopter at hindi ang mga larawan ang nagdudulot ng emotional at mental challenges sa pamilya ng basketbolista.

Isang panalo na lang ang kailangan ng defending champion na Talk ‘N Text upang tuluyang makapasok sa finals ng PBA Philippine Cup.

Ito ay matapos makuha ng Texters ang 3-1 series lead sa game 4 ng laban, kontra Magnolia Hotshots.

Sa score na 102-84, nanguna sa panalo ng Talk ‘N Text si Poy Erram na kumubra ng 19 points at 13 rebounds at  si Roger Pogoy na may 18 markers.

Malaking factor sa koponan ang rebound para makuha ang panalo.

Bukas ng alas-3:00 ng hapon gaganapin ang game 5 ng laban ng TNT vs Magnolia sa Smart Araneta Coliseum.

Pumanaw na ang dating Philippine Basketball Association (PBA) player na si Adriano Polistico o mas kilala bilang “Dong” Polistico.

Ayon sa player agent na si Danny Espiritu, tinawagan siya ng kaibigan ni Polistico upang ibalita ang pagpanaw nito bunsod ng atake sa puso.

Mababatid na sa taas na 6 foot 7 ay naglaro si Polistico ng siyam na taon sa PBA kung saan naging parte siya ng kupunan ng Alaska at San Miguel.

Samantala, matapos ang kanyang PBA career, tumalon sa Metropolitan Basketball Association (MBA) at Philippine Basketball League (PBL) si Polistico bago tuluyang nagretiro noong taong 2000.

Kinumpirma ng Samahang Basketbol ng Pilipinas (SBP) na isa si Basketball Superstar na si Kai Sotto sa kukumpleto sa lineup ng Gilas Pilipinas para sa World Cup Asian Qualifiers.

Ayon kay SBP Spokesperson at Executive Director Sonny Barrios, pumayag na ang kampo ni Sotto sa kabila ng pagpirma nito ng kontrata sa Adelaide 36ers para sa National Basketball League (NBL) sa Australia.

Samantala, nakatakdang makaharap ng Gilas sa August window ng nasabing liga ang koponan ng Lebanon at Saudi Arabia.

Inanunsyo ng US Tennis Great Serena Williams na nagsimula na ang kanyang countdown para sa kanyang pagreretiro mula sa sport.

Ayon sa 40-anyos na 23-time grand slam winner, kailangan umano niyang mag-focus bilang isang ina.

Napanalunan ni Williams ang huli sa kanyang 23 slams sa 2017 Australian open, noong siya ay buntis na sa kanyang anak na si Olympia.

Matapos nito, bigo na niyang makuha ang 24th major na magdadala sa kanyang level sa Margaret Court’s all-time record.

Ang kanyang final attempt naman ay mangyayari sa US Open sa New York ngayong buwan.

Inanunsiyo ng US Tennis Star na si Serena Williams ang kaniyang pagreretiro.

Sa social media post ni Serena, sinabi nito na nais na niyang umalis sa larangan ng Tennis at tumutok sa ibang mga mahahalagang bagay.

Bagaman mahirap na desisyon, desidido na ang manlalaro sa kaniyang plano.

Nagsimulang maglaro ng Tennis si Serena noong 1995 sa edad na 14-anyos.

Noong 2009 naman nito nakamit ang unang panalo sa US Open.

Kikilalanin lamang bilang naturalized player ng Gilas Pilipinas si National Basketball Association (NBA) player Jordan Clarkson.

 Ayon kay Samahang Basketbol ng Pilipinas (SBP) Spokesperson at Executive Director Sonny Barrios, bagama’t sinikap nilang hilingin sa FIBA na payagan si Clarkson na mag-drible bilang local player ay hindi ito na-aprubahan.

 Bunsod nito ay kakailanganing mamili ng Gilas kung sinong naturalized player ang ipaparada sa bawat international competition.

 Mababatid na sa mga nagdaang torneo si Angelo Kouame ang naturalized player ng Gilas.

 Samantala, nauna nang nakumpirma na lalaro si Clarkson sa fourth window ng FIBA World Cup Asian qualifiers ngayong buwan.

Pumirma ng panibagong three-year contract ang basketball star at Gilas Pilipinas Point Guard na si Kiefer Ravena sa Shiga Lakestar para sa gaganapin na Japan B. League.

 Mababatid na una nang inalok mulu ng Shiga si Ravena matapos humataw ng average na 13.2 points para sa koponan sa loob ng 56 na laro.

 Agad naman na natapos ang negosasyon sa pagitan ni Ravena at ng dating koponan sa Philippine Basketball Association (PBA) na NLEX Road Warriors kaugnay dito.

 Samantala, mahaharap si Ravena sa four-year soft ban na ipinatutupad ng PBA sa mga players na lumagda ng kontrata sa mga liga sa labas ng bansa.