SPORTS

Inanunsyo ng University of the Philippines Women’s Volleyball Team (UP-WVT) na si Shaq Delos Santos na ang tatayong punong tagasanay ng kanilang grupo.

Ginanap ang anunsyo matapos matulungan ni Delos Santos na makapagsagawa ng bronze medal finish ang Cignal HD Spikers noong 2022 Philippine Volleyball League Invitational Conference.

Papalitan naman ni Delos Santos si Godfrey Okumu na dating tagasanay ng UP Lady Maroons.

Si Delos Santos ay dating tagasanay ng Women’s National Team, at Far Eastern University sa UAAP noong 2017.  sa panulat ni Hannah Oledan

Wagi sa 2022 premier Volleyball League Invitational Conference Championship ang Creamline cool smashers laban sa Kingwhale Taipei na ginanap sa Mall of Asia Arena.

Bumida sa kanilang team sina Conference MVP Tots Carlos at Jema Galanza na nakagawa ng tig-14 at 13 points.

Tinalo ng Cool Smashers ang Taipei na unang pagkatalo nito sa torneo.

Nabatid na ito na ang ikalimang titulo ng cool smashers sa kabuuang pitong finals appearances ng PVL.

Opisyal nang binakante ng British Professional Boxer at Two-Time World Heavyweight Champion na si Tyson Fury ang kanyang heavyweight title.

Ito ay matapos na i-anunsyo ng boksingero ang kaniyang pagreretiro sa boxing nito lamang Biyernes.

Matatandaan na napanatili ni Fury ang kanyang World Boxing Council (WBC) title sa kaniyang stoppage win noong Abril laban kay Dillian Whyte sa Wembley Stadium.

 Itatampok sa itatayong Philippine Olympic Committee (POC) Museum sa New Clark City sa Capaz, Tarlac ang mga legasiya ng yumaong dating Asian Sprint Queen na si Lydia de Vega-Mercado.

Tiniyak ito ni POC President Representative Abraham “Bambol” Tolentino sa anak ni de Vega na si Stephanie Mercado-Koenigswarter at ina nito na si Mary nang bumisita sa burol ng yumaong atleta.

Plano ng POC na ilagay ang lahat ng natanggap na karangalan ni de Vega sa loob ng Olympic Museum bilang pagbibigay-pugay sa kaniya at sa bansa.

Dagdag pa niya, magiging inspirasyon ang mga karangalan ni de Vega sa lahat ng atleta at aspiring athletes sa Pilipinas.

Nabatid na nanalo si de Vega-Mercado bilang two-time Asian Games Champion, four-time asian champion at nine-time Southeast Asian games gold winner noong kapanahunan nito.

Namatay si de Vega noong Miyerkules matapos ang apat na taong pakikipaglaban sa sakit na breast cancer. - sa panulat ni Hannah Oledan

Itatago na ng National Basketball Association (NBA) ang Number 6 jersey ni Boston Celtics at Civil Rights legend Bill Russel, na pumanaw na nito lamang Hulyo a-31.

Ayon kay NBA commissioner Adam Silver, si Russell ay may 11-time NBA champion at kauna-unahang Black Coach ng Liga.

Siya din ang unang player na nagretiro ng numero sa lahat ng buong teams sa NBA kung saan, deserve ng naturang icon na parangalan sa kakaiba at makasaysayang paraan na hindi mapapantayan ng tagumpay ng kahit na sino.

Ang pagiging superstar ni Russell noong 1950’s at 1960’s ay napili bilang All-star ng dose-dosenang beses sa loob ng kanyang 13 taon sa Celtics.

Bukod pa dito, naging sport’s leading voices din si Russell para sa Civil Rights at Social Justice sa United States.

Umabante na ang team Pilipinas sa semifinals ng 2022 Little League Softball World Series sa Greenville, North Carolina.

Ito ay matapos talunin ng koponan na inirerepresenta ng Negros Occidental little league ang New England sa iskor na 1-0.

Una nang natalo ang Pilipinas laban sa Maryland sa iskor na 0-2 pero hindi nito binigo ang tyansa na makuha ang panalo sa New England.

Inaasahang darating na sa bansa sa August 19 si NBA 6^th Man of the Year Utah Jazz fil-am guard Jordan Clarkson upang sumali at sumabak na sa ginagawang preparasyon ng Gilas Pilipinas para sa nalalapit na fourth window ng 2023 FIBA World Cup Asian Qualifiers na gaganapin sa huling bahagi ng kasalukuyang buwan.

Ito ang kinumpirma ni Samahang Basketbol ng Pilipinas (SBP) president Al Panlilio.

Matatandaan na kasama si Clarkson sa final lineup ng Gilas pool na sasabak ngayong buwan sa FIBA Asian Qualifiers.

Makaksama ng Utah Jazz star sina Thirdy at Kiefer Ravena, Dwight Ramos, Bobby Ray Parks, Carl Tamayo, Kevin Quiambao, at Francis Lopez.

Samantala, unang darating sa Pilipinas si Adelaide 36ers Center Kai Sotto, na inaasahang magbabalik bansa sa August 18, isang araw bago ang pagdating ni Clarkson.

Iaanunsyo naman sa pagtatapos ng 2022 PBA Philippine Cup semifinals ang karagdagang PBA players na kukumpleto sa Gilas pool.

Lilipad patungong Beirut sa August 25 ang Philippine Team upang harapin ang Lebanon at agad na babalik ng bansa para naman sa Gilas Pilipinas-Saudi Arabia face off na gaganapin sa August 29, sa MOA Arena.

Pinataob ng San Miguel Beermen ang Meralco Bolts sa score na 89-78 sa Game 5 sa Araneta, Coliseum.

Dahil dito, posibleng makapasok ang Beermen na makapasok sa Finals ng PBA Philippine Cup.

Nagpakitang gilas si CJ Perez ang beermen na nagtala ng 25 points, 9 rebounds at 5 assists habang mayroon din ng 17 points ang naiambag ni Jericho Cruz.

Bunsod nito, nakuha na ng Beermen ang 3-2 bentahe sa Best of 7 Semifinals.

Dumagsa ang mga bumibili ng tickets para sa US open tennis ilang oras matapos ang anunsiyo ni US tennis star Serena Williams ng kaniyang napipintong pagreretiro sa laro.

Inihayag ng stubhub ticket retailers, naging walong beses ang dami ng bumili ng kanilang tickets para sa torneo, bente kwatro oras matapos ang pag-anunsiyo ni Williams.

Magugunita na anim sa 25 grand slam titles ni Williams ay galing sa us opens na ang huli ay noon pang 2019.

Samantala, gaganapin ang US open tennis na magiging huling torneo ng manlalaro sa huling linggo ng Agosto.

Tumataginting na 12 milyong pisong halaga ng cash incentives ang nakaabang sa mga Pilipinong atleta na nakasungkit ng medalya sa naganap na 11th ASEAN Para Games sa Indonesia.

Ang nasabing halaga ng pabuya ay ipamimigay ng Philippine Sports Commission (PSC) sa pakikipagtulungan sa Philippine Amusement and Gaming Corporation (PAGCOR) upang kilalanin ang pagsisikap at karangalang nakamit ng mga Pinoy differently-abled athletes.

Base sa Republic Act No. 10699 o ang Expanded National Athletes and Coaches Incentives and Benefits Act, makatatanggap ng 150,000 pesos ang gold medalists, 75,000 pesos naman para sa silver medalists, habang 30,000 pesos sa bronze medalists.

Mababatid na nakapag-uwi ang koponan ng Pilipinas ng 28 ginto, 30 pilak, at 46 na tansong medalya para masungkit ang ika-5 puwesto sa naturang laro.