SPORTS

Isang hakbang na lang ang Golden State Warriors para masungkit ang kampeonato sa NBA Finals.

Ito ay matapos tambakan kanina ng Warriors ang Cleveland Cavaliers sa iskor na 104-91.

Nanguna sa panalo ng Warriors si MVP Stephen Curry na nakapagbaon ng 17 puntos sa fourth quarter o kabuuang 37 puntos.

Aminado naman si Curry na nahirapan sila ng husto sa pagratsada ni Lebron James ng Cavs na kumana ng 40 puntos.

Dahil sa panalo ng Warriors, hawak na nila ngayon ang 3-2 lead kontra Cavs.

By  Ralph Obina  

Dalawang Filipino Taekwondo Jins ang nakasungkit na naman ng gold medals matapos gibain ang kanilang mga kalaban sa 2015 Southeast Asian Games sa Singapore.

Si Pauline Lopez ay nakabalikwas mula sa ipinakitang bangis ni Thi Thu Hien Pham ng Vietnam, 20-12, kaya’t nangibabaw sa Women’s Under 57kg Category.

Una rito, giniba ng Pinay si Sonesavanh Sirimanotham ng Laos, 21-2, sa Semifinals.

Si Fil-Am Samuel Morrison naman ay inilampaso si Trung Duc Phan ng Vietnam, 19-12, dahilan upang masikwat ang ginto sa Men’s Under 68 kg Division.

Samantala, pasok na ang Philippine National Men’s Basketball Team na Gilas Pilipinas sa gold medal round matapos padapain ang Thailand sa score na 80-75.

By  Jelbert Perdez  

Puspusan ang paghahanda ng Philippine Azkals, para sa kanilang paghaharap ng Yemen, sa June 16, sa Qatar Sports Club.

Ito ay para sa pagpapatuloy ng 2018 FIFA World Cup Qualifiers.

Una nang nanalo ang Azkals sa kanilang paghaharap ng Bahrain, sa iskor na 2-1.

Kasama ng Azkals sa Group H ang mga kuponan mula sa North Korea at Uzbekistan.

By  Katrina Valle  

Umakyat na sa 24 ang gintong medalya ng Pilipinas sa nagpapatuloy na 28th Southeast Asian (SEA) Games sa Singapore.

Ito ay matapos magwagi ang atletang Pinoy na si Christopher Ulboc sa Men’s 300 Steeplechase .

Gayunman, nananatili pa rin sa ika-anim na puwesto ang Pilipinas sa medal standings.

Nangunguna pa rin ang Thailand na may 71 gintong medalya na sinundan ng host country na Singapore, Vietnam, Malaysia at Indonesia.

By Ralph Obina 

Nabuhayan ng loob ang Golden State Warriors matapos maitabla ang serye sa Game 4 ng NBA Finals kontra Cleveland Cavaliers.

Sa mismong home court ng Cavs, ipinahiya at inilampaso ng Warriors ang Cleveland sa pamamagitan ng 21 nilang kalamangan.

Nagtapos ang laro sa iskor na 103-82 pabor sa Warriors.

Dahil sa resulta ng Game 4, kapwa hawak na ngayon ng Warriors at Cavs ang tig-dalawang panalo.

By  Ralph Obina 

Matapos maging viral sa social media ang nakakahiyang video ng performance sa SEA Games, positibong tinanggap ng dalawang atletang Pinoy ang kahihiyan bunga ng kanilang zero score sa 3 meter springboard diving finals.

Hindi sukat akalain nila John David Pahoyo at John Elmerson Fabriga na ang kanilang pagkapahiya sa SEA Games ay magsisilbi pang inspirasyon sa iba kung paano haharapin ang pagkapahiya at kabiguan.

Nakatanggap ng zero score ang dalawa sa springboard diving matapos bumagsak ng patalikod sa tubig.

Sa halip na magmukmok sa palpak na performance, pinagtawanan lamang ng dalawa ang nangyari at sinabing hindi lamang sila ang atletang nakaranas ng bad landing sa tubig.

By  Mariboy Ysibido

Napanatili ng Pilipinas ang ika-anim na puwesto nito sa SEA Games habang nasa pang-lima naman ang Indonesia na lamang lang ng 1 gintong medalya matapos ang magkakasunod na pagkakakuha ng mga gold medals sa ibat-ibang laro kahapon ng hapon sa nagpapatuloy na 2015 SEA Games na ginaganap sa Singapore.

Sa ngayon, may kabuuan ng 21 gold, 21 silver at 33 bronze medal ang nakukuha ng bansa.

Ilan sa mga nagdagdag ng mga gold medals ay si Eric Shaun Cray sa 400 meters hurdles, Dennis Orcollo sa Men’s 9-ball pool singles match 17, Josie Gabuco sa Women’s light flyweight (45-48 kg), Irish Magno Women’s 51 kg., Nesthy Petecio, Women’s bantam weight (54 kg), Rogen Ladon sa Men’s light flyweight (46-49kgs), Junel Cantancio sa Men’s light weight (60kgs) Men’s softball at Women’s softball.

Panalo naman ang Women’s Basketball team ng Pilipinas kontra sa Vietnam sa Group G Game 4 sa score na 100-55 at tinambakan din ng Sinag Basketball Team ng Pilipinas ang bansang Indonesia 81-52.

Kasalukuyan pa ring nangunguna ang host country na Singapore na may 54 gold medals, 48 silver medals at 61 bronze medal.

By  Mariboy Ysibido  

Wagi ang Cleveland Cavaliers kontra Golden State Warriors sa Game 3 ng NBA Finals sa iskor na 96-91.

Nanguna sa tagumpay ng Cavs si 4-time MVP Lebron James na nakasikwat ng 40 puntos.

Sa kabila naman ng kaliwa’t kanang 3 points ni Stephen Curry, hindi ito sumapat upang mai-angat sa panalo ang Warriors.

Dahil dito, hawak na ng Cavs ang 2-1 lead kontra Warriors.

By Ralph Obina

Umangat na sa pang-anim ang Pilipinas sa SEA Games na may 10 gold, 17 silver at 26 bronze habang ang host country na Singapore ay nanguna pa rin na may 47 gold, 40 silver at 51 bronze medal.

Ang pagkakakuha ng gold medal ni Gymnast Reyland Capellan sa Men’s Floor Exercise ang nagdala sa Pilipinas sa pang-anim na puwesto sa 2015 SEA Games.

Umabot sa 14.733 points na walang penalties ang nakuha ni Capellan na nagtala ng unang gold medal para sa Gymnastics na tinalo ang pambato ng Singapore na si Wah Toon Hoe na may 14.566 points lamang.

By  Mariboy Ysibido