SPORTS

Kapwa desidido ang magkaribal na koponang San Miguel at Rain or Shine na masungkit ang ikatlong panalo sa Game 5 ng PBA Philippine Cup semi-finals mamayang gabi.

Ito ay makaraang magtabla sa 2-2 ang dalawang koponan matapos manalo ng Beermen noong Lunes kontra Elasto Painters sa iskor na 105-92.

Manantili naming malaking banta para sa Rain or Shine si 2-time MVP Junemar Fajardo na nakapagtala ng 33 puntos at 15 rebounds noong Game 4 para sa San Miguel.

Ayaw pasiguro ni San Miguel coach Leo Austria dahil sa tiyak aniya na mayroon at mayroon pang ilalabas na alas si Rain or Shine Coach Yeng Guiao.

Samantala, hindi naman nababahala si Guaio kahit wala pa rin sa laro mamaya sina Raymond Almazan at Jericho Cruz.

Ang game 5 sa pagitan ng san Miguel at rain or Shine ay mapapanood mamayang alas-7:00 ng gabi.

By Ralph Obina

Pasok na sa finals series ng PBA Cup ang Alaska Aces matapos tambakan ang Global Port sa Game 5 ng semi-finals ng torneo.

Nagtala ang Aces ng 4-1 standing sa kanilang best of seven semi-finals series.

Kumamada sina Ping Exciminiano at Chris Banchero ng 18 points para pangunahan ang panalo ng Aces.

Dinagdagan ito ng tig-14 points nina Calvin Abueva at Sonny Thoss.

Maghihintay na lamang ang Aces kung anong koponan, San Miguel o Rain or Shine na maghaharap sa semi-finals para makaharap sa championship game.

By  Judith Larino  

*Photo Credit: PBA Images

Inilampaso ng Washington Wizards ang kalabang Chicago Bulls sa iskor na 114-100 sa nagpapatuloy na NBA games.

Naging susi sa panalo ng Wizards ang pito nitong manlalaro na lahat ay nakapagtala ng double digit score sa pangunguna ni Ramon Sessions na may 16 na puntos.

Sa panig ng Bulls, di naman umubra ang 23 puntos na kinana ni Derrick Rose upang manalo kontra Wizards.

Ito na ang ikalawang sunod na panalo ng Wizards matapos malubog sa limang serye ng pagkatalo.

By  Ralph Obina  

Isang panalo na lang ang kailangan ng Alaska Aces upang tuluyang makapasok sa PBA Philippine Cup Finals.

Taglay ang 3-1 lead sa best-of-seven series, sasagupa ang Alaska sa Game 5 laban sa Global Port Batang Pier mamayang alas-7:00 ng gabi.

Sakaling manalo, ito na ang ikatlong pagkakataon na makapapasok ang Aces sa finals sa apat na komperensiya.

Una nang natalo ng Global Port ang Alaska sa Game 1 pero nakabawi ito ng panalo sa tatlong magkasunod na laro.

Inaasahang mahihitik sa aksiyon ang Game 5 dahil siguradong hindi rin basta papayag ang Batang Pier na mapapaaga ang kanilang pagtalsik sa semi-finals ng PBA season.

By  Jelbert Perdez 

Dinaig ng Portland Blazers ang koponan ng Oklahoma City Thunder sa kanilang pagtutuos kaninang umaga sa iskor na 115-110.

Nanguna sa panalo ng Blazers si Damian Lillard na kumopo ng 31 puntos kabilang ang tatlong three points sa nalalabing tatlong segundo ng laro.

Sinegundahan naman ito ni CJ Mccollum na nakapag-ambag ng 32 puntos.

Samantala, di naman sumapat ang 28 puntos na tinrabaho ni Kevin Durant para iangat ang koponan ng Thunder.

By  Ralph Obina  

Tatangkaing makabawi ng San Miguel Beer mamayang gabi kontra Rain or Shine Elasto Painters sa Game 4 ng PBA Philippine Cup Semi-Finals.

Ito ay matapos malasap ng Beermen ang dalawang sunod na pagkatalo.

Ayon kay San Miguel Head Coach Leo Austria, hindi pa huli ang lahat at may pag-asa pa aniyang maitabla nila ang laban mamaya sa Game 4.

Intelligent basketball ayon kay Austria ang kanilang game plan mamaya kontra Elasto Painters.

Samantala, hindi naman nababahala si Rain or Shine Coach Yeng Guiao kahit pa hindi maglalaro para sa koponan mamaya sina Jericho Cruz at Raymond Almazon dahil sa mga iniindang injury.

Ang sagupaang San Miguel at Rain or Shine ay mapapanood mamayang alas-7:00 ng gabi.

By  Ralph Obina 

Hawak na ng Alaska Aces ang two-win advantage sa standing na 3-1 kontra Global Port.

Kasunod na rin ito nang pagbawi ni Alaska Aces Star Calvin Abueva sa ika-apat na laro ng PBA best of seven semi-finals series laban sa Global Port kung saan naitala ang final score sa 109-84.

Nag-ambag ng 16 points si Dondon Hontiveros, 14 points si RJ Jazul at 10 points at 5 rebounds si Chris Banchero para sa Alaska.

Gumawa naman ng 24 points si Terrence Romeo para sa Global Port.

By Judith Larino 

*Photo Credit: PBA Media Bureau