SPORTS

Pinangunahan ni Russell Westbrook ang Oklahoma City Thunder sa ginawa nitong pagdurog sa Miami Heat sa score na 99-74.

Kumamada si Westbrook ng 13 points, 15 rebounds at 10 assists na pang-limang triple-double ng pambato ng Thunder ngayong season.

Nagdagdag si Kevin Durant ng 24 points at 10 rebounds habang tumipa si Serge ibaka ng 19 points para sa oklahoma.

Si dwyane wade naman ang nanguna sa Heat taglay ang kanyang 22 points na nangyari kasabay ng kanyang ika-34 na kaarawan habang si Hassan Whiteside ay nag-ambag ng 14 points at 11 rebounds para sa Heat.

By Jelbert Perdez  

Pasok na sa finals ang defending champion na San Miguel Beer matapos pataubin ang kalabang Rain or Shine sa Game 6 ng PBA Philippine Cup semi-finals sa iskor na 90-82.

Sa kabila ng pagkawala ng sentrong si June Mar Fajardo sa ikatlong quarter dahil sa tinamong injury, matagumpay pa rin ang San Miguel na tapusin ang kanilang misyong maka-abanse sa Finals.

Samantala hinihinala namang MCL o ALC ang injury ni Fajardo makaraang mapilipit ang paa nito habang nakikipag-agawan ng bola kay Jireh Ibañes ng Rain or Shine.

Umaasa naman ang mga San Miguel fan na makakalaro si Fajardo para pangunahan ang koponan kontra Alaska.

By  Ralph Obina  

*Photo Credit: inquirer.net

Plantsado na ang laban ni 4-Division World Champion Nonito Donaire sa darating na Abril para idipensa ang kanyang WBO Super Bantamweight Belt.

Ito ay matapos kumpirmahin ni Top Rank CEO Bob Arum na si Zsolt Bedak ang makakaharap nito sa naturang bakbakan.

Naniniwala si Arum na magiging maganda ang kalalabasan ng Donaire-Bedak fight dahil sa kapwa aniya magaling ang naturang mga boksingero.

Ang Hungarian boxer na si Bedak ay nakilala dahil sa kanyang technical boxing skills.

Ang salpukang Donaire-Bedak ay gaganapin sa Abril 23 sa Araneta Coliseum dito sa Pilipinas.

By  Ralph Obina 

Hirap tanggapin ng Golden State Warriors ang pagkatalo sa Denver Nuggets.

Kabilang sa mga factors na nakikita ng Warriors kaya’t natalo ang hindi paglalaro ni Draymond Green na umano’y malaking tulong sa tinaguriang splash brothers na sina Klay Thompson at Stephen Curry.

Umapela naman si Curry sa fans na huwag sisihin si Andre Iguodala sa pagkatalo ng Warriors matapos maling tao ang pinasahan nito sa nalalabing 2.8 seconds na laro para sana magtabla ang dalawang koponan.

By  Judith Larino  

Tinanghal ng World Boxing Organization (WBO) ang bakbakang Manny Pacquiao at Floyd Mayweather Junior bilang event of the year.

Ito ay para sa makasaysayang fight of the century na inabangan ng milyon-milyong tao sa buong mundo.

Matatandaang sa naturang laban ay nasungkit ni Mayweather ang unified welterweight championship belt makaraang talunin si Pacquiao via unanimous decision.

Samantala, ginawaran din si Mayweather ng pinakamataas na pagkilala na ipinagkakaloob ng WBC sa mga boksingero.

Tinanggap ni Mayweather ang lifetime achievement award bilang pagkilala sa malinis nitong 49-0 win loss fight record.

By  Ralph Obina 

Isang panalo na lamang ang kailangan ng defending champion na San Miguel Beer para makapasok sa championship game ng PBA.

Kasunod ito nang muling pagpapataob sa Rain or Shine sa Game 5 ng best of seven semi-final series sa final score na 103-94.

Gumawa ng 27 points ang back to back MVP na si Junemar Fajardo.

Sinabi ni SMB Head Coach Leo Austria na hindi pa sila lubusang masaya dahil kailangan pa nilang talunin sa susunod na laban ang Elasto Painters para makapasok sa finals.

By  Judith Larino

*Photo Credit: PBA Media Bureau