SPORTS

Target ng Alaska Aces na maungusan ang Globalport Batang Pier sa best-of-seven semifinals series ng Smart Bro PBA Philippine Cup.

Dahil dito, asahan na ang umaatikabong aksiyon sa Game Three ng serye na gaganapin sa Mall of Asia Arena mamayang alas-siete ng gabi.

Matatandaang naging pisikal ang laro sa Game two sa pagitan ng Aces at Batang Pier sa serye at katunayan ay nabalot ito ng 16 na technical fouls kung saan 13 rito ay naganap sa unang quarter.

Sa dami ng fouls na nagawa ni Calvin Abueva ay pinatawan ito ng multa na nagkakahalaga ng mahigit P40,000.

Ang mananalo sa serye ng dalawang team ay haharap sa semi-final series naman sa pagitan ng Rain or Shine at San Miguel Beermen.

By  Jelbert Perdez 

Nakabawi ang Rain or Shine Elasto Painters sa kanilang pagkatalo sa Game 1 ng 2016 PBA Philippine Cup semi-finals kontra San Miguel Beermen.

Tumabla ang Rain or Shine sa kartadang 1-1 makaraang pataubin ang Beermen sa score na 105-97 sa Game 2 ng best of 7 series semi-final series sa Araneta Coliseum, Quezon City, kagabi.

Bagaman nakalamang ang Elasto Painters ng 25 points, humabol pa rin ang San Miguel at inilapit ang score sa limang puntos na kalamangan sa huling quarter.

Pinangunahan ni Jeff Chan ang Rain or Shine sa score na 16 points sa tulong ng 13 points ni Don Trollano at 12 points ni J.R. Quinahan.

Muling magsasagupaan ang dalawang koponan sa Game 3 sa The Big Dome, bukas.

By  Drew Nacino 

*Photo Credit: PBA Images

Sabik na bumisitang muli sa Pilipinas si NBA Most Valuable Player Stephen Curry.

Sa isang video message, sinabi ni Curry na nami-miss na niya ang kanyang mga Pinoy fans at gusto na ulit niyang bumalik sa bansa.

Gayunman, hindi naman umano puwedeng bumalik agad-agad si Curry sa bansa na huli niyang binisita noong Setyembre.

Nakatuon pa, aniya, siya sa laro ng kanyang koponang Golden State Warriors na sa ngayon ay may 33-2 win-loss record.

By  Avee Devierte 

Tatangkain ng Rain or Shine Elasto Painters na makabawi sa San Miguel Beer sa Game 2 ng PBA Philippine Cup Semi-finals.

Ayon kay Rain or Shine Coach Yeng Guiao, sisikapin nilang maitabla ang serye sa 1-1 sa laro na gaganapin mamaya sa Araneta Coliseum.

Sinabi ni Guiao na pinag-aralan na nila kung saan sila nagkulang nang padapain sila ng Beermen sa Game 1 kahit na nabaon nila ito ng 20 puntos sa naturang laro.

Aniya, natuto na sila sa pagkatalong iyon at ibubuhos nila ang lahat ng kanilang makakaya upang manalo sila sa serye at makausad sa finals.

By  Jelbert Perdez    

Nakabawi na ang Alaska Aces sa kanilang pagkatalo sa Game 1 kontra Globalport Batang Pier sa semi-finals ng 2016 PBA Philippine Cup.

Inilampaso ng Aces ang Globalport sa Game 2 sa score na 100-76, sa isang dikdikang sagupaan sa Araneta Coliseum, Quezon City, kagabi.

Nagka-initan naman sa 1st quarter sina Calvin Abueva ng Alaska at Anthony Semerad ng Globalport bunsod ng sunud-sunod na technical fouls.

Gayunman, napigilan ng Aces sa pangunguna ni Chris Banchero na nagpakawala ng 18 points ang muling pag-init sa court ni Batang Pier Star point guard Terrence Romeo na kumamada lamang 20 points sa Game 2 kumpara sa career high nitong 41 points sa unang game.

Dahil dito, naungusan ng Aces ang Globalport ng 32 points sa 2nd half hanggang sa mapaliit ang kalamangan sa 24 points sa huling quarter upang itabla sa kartadang 1-1 ang standing ng dalawang team.

By  Drew Nacino 

*Photo: PBA Images

Pinadapa ng San Antonio Spurs ang Milwaukee Bucks sa score na 123-98 sa harap ng mahigit 14,000 fans sa BMO Harris Bradley Center.

Nagpasabog si Kawhi Leonard ng 24 points habang nag-ambag naman si rookie Jonathan Simmons ng 18 points para sa Spurs.

Nakatulong din sa panalo ng San Antonio ang pinagsamang 30 points nina Lamarcus Alderidge at Tim Duncan na nagpaunat sa win streak ng koponan sa limang laro.

Sina Khris Middleton at Michael Carter-Williams naman ang nanguna sa puwersa ng Milwaukee.

By  Jelbert Perdez  

Nagsimula nang mag-ensayo si 4-division world champion Nonito ‘The Filipino Flash’ Donaire Jr. bilang paghahanda sa kanyang laban sa Abril 23.

Ito ay kahit pa napabalitang umatras ang kanyang kalabang si dating IBF Featherweight Champion Evgeny Grodovich.

Maugong naman ang pangalan ng Hungarian boxer na si Zsolt Bedak na papalit kay Grodovich.

Kasalukuyang nasa Cebu si Donaire ngayon para sa kanyang training.

Sinabi ni Donaire na handa naman siyang kalabanin ang kahit sino at desidido aniya siyang ganapin sa Smart Araneta Coliseum ang susunod niyang laban.

By  Ralph Obina  

Nalusutan ng defending champion San Miguel Beermen ang Rain or Shine Elasto Painters sa semi-finals ng 2016 PBA Philippine Cup.

Pinataob ng Beermen ang Elasto Painters sa score na 109-105 sa Game 1 ng best of 7 series, sa MOA Arena, Pasay, kagabi.

Mula sa 20 puntos na kalamangan ng Rain or Shine, humabol ang San Miguel sa huling quarter sa tulong ng forward na si Junmar Fajardo na kumamada ng 36 points at Ronald Tubid na nagpakawala ng 15 points kabilang ang tatlong tres.

Aminado si SMB Coach Leo Austria na hindi siya makapaniwala ng nahabol nila ang 20 puntos na kalamangan.

Hawak na ng Beermen ang 1-0 lead kontra Elasto Painters habang nakatakda bukas ang Game 2 sa Araneta Coliseum.

By  Drew Nacino 

Inamin ni Filipino boxing champion Manny Pacquiao na magreretiro na siya pagkatapos ng kanilang laban ni Timothy Bradley sa darating na Abril 9.

Ayon kay Pacquiao, ito ay upang mapagtuunan niya ng pansin ang kanyang political career.

Dahil dito, malabo na umanong mailatag pa ang inaabangang rematch sa pagitan nina Pacquiao at Floyd Mayweather, Jr.

Itinanggi rin ng pambansang kamao ang napaulat na hindi siya magreretiro hangga’t hindi natutuloy ang kanilang rematch ni Mayweather.

Sinasabing kumpiyansa naman si Pacquiao na makakakuha ito ng upuan sa senado sa darating na May elections.

By  Jelbert Perdez  

Naibulsa ni Serbian tennis star Novac Djokovic ang una niyang panalo para sa 2016.

Ito ay matapos talunin ni Djokovic si Dustin Brown sa iskor na 6-2, 6-2 sa opening game ng Qatar Open.

Kinailangan lamang ni Djokovic ng 51 minuto para pataubin ang Jamaican-German na si Brown.

Sa unang set pa lamang ay nagpakitang gilas na ang world’s number one men’s singles tennis player para bumuo ng 5-0 lead sa loob lamang ng 16 na minuto.

Tinangka man ni Brown na makabawi ay sadyang pursigido si Djokovic na makuha ang buena manong panalo.

By  Ralph Obina