SPORTS

Hinack ng Russia ang confidential medical files ng US Olympic athletes sa database ng World Anti-Doping Agency.

Kabilang sa mga naapektuhan sa insidente US tennis star Venus Williams at teenage gymnast at quadruple Rio gold medalist Simone Biles.

Inako ng grupong “Fancy Bears” ang naturang pangha-hack at inakusan si Biles na gumagamit ng “illicit psycho stimulant”.

Inamin naman ni Biles na mayroon siyang kondisyong attention deficit hyperactivity disorder o ADHD ngunit siya aniya ay mahigpit na sumusunod sa anti-doping rules.

Sa katunayan, ipinaliwanag ni Biles na ligal at mayroong permiso mula sa WADA ang kanyang mga iniinom na gamot na nasa banned drug list ng ahensya.

Mariin namang kinondena ng WADA ang ginawa ng Russian hackers.

By Ralph Obina   

Photo Credit: AP  

Nakasungkit ng bronze medal ang Pilipinas sa larangan ng table tennis sa 2016 Rio Paralympics.

Naibulsa ng Pinay paddler na si Josephine Medina ang tansong medalya sa Women’s Single Class 8 Division kung saan pinaghariaan ito ng pambato ng China na si Mao Jingdian habang silver naman ang nakuha ni Thu Kamkasimphou ng France.

Taong 2000 pa nang huling makasungkit ang Pilipinas ng bronze medal sa katauhan ng powerlifter na si Adeline Dumapong sa Sydney Paralympics.

Ang polio victim na si Medina ay nakapag-uwi na ng gintong medalya sa bansa para sa ASEAN para games sa Singapore noong nakaraang taon.

By  Ralph Obina   

Idinaan sa tangkad ng mga manlalaro ng China ang laban nila kontra sa Gilas Pilipinas.

Ito’y makaraang mabigo ang Gilas na makalusot sa second round ng FIBA Asia challange sa score na 75-65.

Nanguna sa nasabing laro si Jinqiu Hu matapos kumamada ng 10-2 run sa pagsisimula ng fourth quarter.

Dahilan upang mabura ang 16 na puntos ni Gilas player Mac Belo sa kabuuan ng laro.

By  Jaymark Dagala

Photo Credit: FIBA.com

Wagi  ang Alaska Aces kontra Phoenix Fuel masters   sa 2016 PBA governor’s cup.

Tinambakan ng Aces ang masters sa score na 103-87 sa kanilang paghaharap sa MOA Arena, Pasay City, kahapon.

Kumamada ng 18 points at 21 rebounds si Calvin Abueva at nag-ambag ng 19 points si Rj Razul para sa Aces.

Dahil dito, lumakas ang pag-asa  ng Alaska na makapasok sa top eight teams na aabante sa  playoffs.

Ito na ang ikatlong sunod na panalo ng  Alaska nang magsimula ang torneyo sa kanilang kartadang  1-4.

By: Drew Nacino

Humingi ng paumanhin ang kumpaniyang Nike sa Pinoy fans ng NBA superstar na si Lebron James.

Ito’y dahil sa hindi na matutuloy pa ang Manila leg ng Lebron Tour na nakatakda sana ngayong araw.

Ayon sa Nike, kinailangan nilang kanselahin ang nasabing biyahe ni Lebron dahil sa ilang aberya na dapat nilang ayusin.

Gayunman nangako ang Nike na kanilang ire-re schedule ang nasabing biyahe sa hinaharap.

Nakatakda sanang gawin ang Battle of the Doubt Night at isang press conference sa Smart Araneta Coliseum.

By Jaymark Dagala 

Photo Credit: news.nike.com 

Nagbabalik sa grand slam semi-finals appearance ng US Open ang French tennis player na si Gael Monfils.

Tinalo ni Monfils ang kapwa Pranses na si Lucas Pouille sa set na 6-4, 6-3, 6-3 sa quarterfinals.

Susunod na makakaharap ni Gael ang sinumang mananalo sa pagitan ng top seeded at defending champion na si Novak Djokovic ng Serbia at kapwa Pranses na si Jo Wilfred Tsonga.

Ito ang unang beses na tatlong French tennis player ang nakapasok sa quarterfinals ng US Open.

By  Drew Nacino   

Photo Credit: Al Bello/Getty Images

Tumulak na patungong Tehran, Iran ang Philippine national men’s basketball team.

Ito’y kaugnay ng gagawin nilang pagsabak sa FIBA Asia Challenge ngayong linggong ito.

Unang sasalang ang mga Pinoy sa kanilang Group B campaign laban sa India sa Sabado ng umaga bago sasagupa sa Chinese Taipei sa Linggo.

Titimunan ni Gilas Pilipinas assistant coach Josh Reyes ang Gilas 5.0 na pinangungunahan nina amateur players Mac Belo at Kevin Ferrer.

Kasama rin sa koponan sina Von Pessumal, Almond Vosotros, Mike Tolomia, Roger Pogoy, Russel Escoto, Arnold Van Opstal, Ed Daquioag, Jonathan Grey, Alfonzo Gotladera, Carl Bryan Cruz, Chris Javier at CJ Perez.

By Jelbert Perdez

Photo Credit: philstar