SPORTS

Target ni reigning IBF Flyweight Champion Johnriel Casimero na makasagupa si two-time Olympics gold medalist at kasalukuyang WBO International Flyweight Champion Zou Shiming sa Mayo ng susunod na taon.

Ayon sa ulat, binigyan ang kampo ni Casimero at ni Zou na mag-negosasyon para sa laban hanggang sa Pebrero ng susunod na taon.

Pero bago nito, posibleng i-set up muna ang voluntary o optional defense na laban sa Disyembre sa sinumang kalaban sa nasa Top 15 ng IBF sa kanyang dibisyon.

Sinabi ni Casimero na kahit sino man ay handa niyang labanan.

By  Ralph Obina

Pinayuko ng host country na Iran ang koponan ng South Korea, sa iskor na 77 – 44 sa kanilang pagtutuos para makuha ang korona sa FIBA Asia Challenge.

Pinangunahan ni Hamed Haddadi, ang center ng Iran, ang pagbuslo ng panalo para sa koponan sa ibinigay nitong 20 puntos.

Dahil sa panalo ng Iran, Jordan at Iraq, nagkaroon ng tatlo pang slots ang West Asia sub – zone, habang ang dalawang slots naman ang nadagdag sa East Asia sub – zone, para sa 2017 FIBA Asia Cup.

By Katrina Valle 

Photo Credit: FIBA.com 

Tinalo nina Rafael Nadal at Marc Lopez sina Leander Paes at Saketh Myneni sa Davis Cup.

Namayagpag sina Nadal at Lopez matapos makapagposte ng scores na 4-6, 7-6 (2), 6-4, 6-4, sa doubles event ng torneyo.

Ayon kay Nadal, makasaysayan ang naging laban nila matapos ang dalawang taon nilang hindi pagkakapasok sa World Group.

Dahil sa tagumpay nina Nadal at Lopez ay naibalik ang Spain sa Davis Cup World Group.

By Mariboy Ysibido   

Hindi na lamang pinapansin ni Filipino boxing champion Manny Pacquiao ang ginagawang pangungutya ni Jessie Vargas.

Ito ay matapos na magpost ang American boxer ng kaniyang shorts na may nakasulat na siguradong panalo na siya sa kanilang laban sa Nobyembre 5.

Ayon sa kampo ng Senador, sanay na siya sa ganitong estilo dahil maging si Floyd Mayweather at Golden Boy Oscar dela Hoya ay nagsuot din ng mga statement shorts at t-shirt noon.

Pinagtutuunan na lamang ng pansin ng coach ni Manny na si Freddie Roach ang panunumbalik ng dati nitong lakas.

By Mariboy Ysibido 

Kinoronahan bilang bagong WWE Cruiserweight championship ang Fil – Am wrestler na si TJ Perkins.

Ito ay matapos niyang talunin by submission si Gran Metalik ng Mexico.

Ibinigay ni WWE executive Vice President na si Triple H o Paul Levesque sa totoong buhay, ang championship belt kay Perkins.

Maliban sa championship belt, magiging bahagi na din ng programa ng WWE na “raw” si Perkins.

By: Katrina Valle

Handa nang bumalik at maglaro sa Miami Heat sa bagong NBA season ng NBA si Chris Bosh.

Ito ay matapos ang ilang buwang pagliban sa laro kung saan ay na-miss nito ang second half ng nakaraang season dahil sa blood clots nito.

Ayon kay Bosh, sa susunod na linggo ay magsisimula na siyang lumahok sa training camp ng Heat sa Bahamas at excited na aniya siyang muling maglaro.

Gayunman, inamin ni Bosh na hindi pa siya nabibigyan ng clearance ng mga doktor ng koponan para maglaro ngunit kumpiyansa itong makakapaglaro na siya sa darating na season.

By  Ralph Obina