SPORTS

Naungusan na ni Lebron James si Shaquille O’Neal sa scoring list ng NBA.

Ito ay kasunod ng kanyang free throw sa ika-apat na quarter ng kanilang laban kontra Chicago Bulls.

Dahil sa free throw, nakapag buslo na si James ng kabuuang 28, 597 points, para makuha ang ika-pitong slot sa listahan, mas mataas ng isang puntos sa iskor ni Shaq.

Nangunguna sa listahan si Kareem Abdul – Jabbar na may mahigit sa 38,000 puntos, at sinundan naman siya nina Karl Malone, at Kobe Bryant.

Nasa listahan din sina Michael Jordan, Wilt Chamberlain at Dirk Nowitzki.

By Katrina Valle

Hindi nababahala ang kampo ni Senador Manny Pacquiao sa pagtatapos ng deadline na ibinigay ni Top Rank President Bob Arum.

Kaugnay ito sa pagtanggap ni Pacman sa laban kay Jeff Horn.

Sinabi ni Michael Koncz, adviser ni Pacman na hindi sila nape-pressure sa anumang deadline lalo pa’t batid nilang marami pang mangyayari.

Una nang inihayag ng Pambansang Kamao na mas priority niya ang kanyang trabaho bilang senador kaysa ang susunod na laban.

By  Judith Larino   

Maaaring makapaglaro na sa mga natitirang laban ngayong season si Golden State forward Kevin Durant.

Ayon sa kalatas mula sa Warriors, nagpapatuloy ang pagbuti ng kalagayan ni Durant, mula nang mapilay ang kanyang kaliwang tuhod, apat na linggo na ang nakaraan.

Sa ngayon ay nagsasanay pa rin anila si Durant, pero ito ay limitado sa non – contact drills katulad ng pag shu – shoot, pagtakbo at pagtalon.

Noong nakaraang Hulyo ay kinuha ng Warriors si Durant, matapos ang kanyang kontrata sa Oklahoma City.

By Katrina Valle

Inia-alay sa bansa ni Francis Edward Obiena ang Gold Medal na nahablot niya sa 12th Southeast Asia Youth Athletic Championship.

Kasunod na rin ito nang tagumpay ng 17 anyos na tubong Cainta, Rizal sa pagsali sa Pole Vault matapos maitala ang 4.35 meters.

Pinayuko ni Obiena ang pambato ng Singapore.

Si Obiena ang nag iisang Gold Medalist ng Pilipinas mula sa nasabing palaro at may hawak ng NCAA Pole Vault Record at Bronze Medalist din sa Southeast Asian Games Decathlon.

By Judith Larino

Photo Credit: Business Mirror

Binigyan ni Top Rank Promoter Bob Arum si fighting Senator Manny Pacquiao ng hanggang Huwebes, Marso 30 para mag-desisyon kung itutuloy ang laban sa darating na Hulyo.

Ito ay kaugnay ng proposal ni Arum na laban sa pagitan nina Pacquiao at Australiyanong si Jeff Horn sa Suncorp Stadium sa Brisbane Australia.

Ayon kay Arum meron na lamang tatlong buwan si Pacquiao para pag-isipan ang laban dahil aniya hindi na makakapaghintay pa sa mas matagal na negosasyon ang Australian government.

Dagdag ni Arum kung hindi matutuloy ang laban ni Pacquiao sa Hulyo ay hahanapan na lamang siya ng ibang katapat sa Nobyembre.

By  Krista de Dios  

Posibleng sa South Africa gagawin ang susunod na laban ni fighting Senator Manny Pacquiao.

Kasunod ito ng ulat na nakikipag-ugnayan na si Top Rank CEO Bob Arum sa manager ni South African at dating IBO Welterweight titleholder Chris Van Heerden na si Peter Khan.

Ayon kay Arum, gagawin sa Johannesburg ang Pacquiao – Van Heerden bout sa Nobyembre, kung sasagutin ng pamahalaan ng South Africa ang mahigit sa dalawampu’t limang (25) milyong dolyar na premyo sa laban.

By  Katrina Valle

Apat (4) na silver medal ang nasungkit ng Pilipinas sa pagsisimula ng 12th Southeast Asian Youth Athletics Championships sa Ilagan City Sports Complex, Isabela.

Runner up sa high-jump event ang 17-anyos na si Wally Gacusan makaraang maabot ang 1.81 meters habang gold winner si Vo Ngoc Long Cao ng Vietnam na nakapagtala ng 2.0 meters sa unang attempt.

Si Gacusan, ay bronze medalist sa palarong pambansa sa Legazpi, Albay noong isang taon.

Bronze naman ang nadagit ng isa pang Pinoy na si Janmell Francis Gervacio na nakapagtala ng 1.70 meters.

Samantala, nag-ambag din ng pilak na medalya sina Jason Jabol at Bernalyn Bejoy para sa boys’ long jump at girls 800 meter jump at Trexie dela Torre para naman sa girls long jump.

By Drew Nacino

Nakamit ng Talk n’ Text Ka Tropa ang kanilang unang panalo sa PBA Commissioners Cup matapos talunin ang Phoenix Fuel Masters sa score na 134 -109.

Nahirapan nang makabawi ang Phoenix nang umabot sa tatlumpu’t lima (35) ang lamang ng TNT sa unang quarter pa lamang.

Pinangunahan ni Lou Amundson ang kalamangan ng TNT sa pagtatala ng dalawampung (20) puntos at walong (8) rebounds.

Samantala, parehong nakapag-ambag ng labing walong (18) puntos sina Ranidel de Ocampo at Troy Rosario habang labing pitong (17) puntos naman kay Roger Pogoy at sampung (10) puntos kay Ryan Reyes at Jason Castro.

Sa kasalukuyan ay meron nang isang panalo at isang talo ang TNT.

By  Krista de Dios  

*Photo: PBA Media Bureau  

Bagama’t hindi naka-triple-double si Lebron James ay kumamada naman siya ng 32 points sa panalo ng Cleveland Cavaliers laban sa Charlotte Hornets sa score na 112-105.

Tumipa si Kyrie Irving ng 26 points habang nagdagdag si Kevin Love ng 15 points at 12 rebounds para sa Cavs.

Sa unang bahagi pa lamang ng laro ay nakaungos na ang NBA Champions ng 12 points laban sa Hornets.

Mula noon ay hindi na nila hinayaan na masundan pa ang nakakadismayang pagkatalo nila sa Denver noong Miyerkules.

Samantala, kahit natalo ang Phoenix Suns sa kamay ng Boston Celtics sa score na 130-120, nakakuha naman si Devin Booker ng 70 points kaya’t nabasag niya ang 60 points na naitala ni Klay Thompson ng Golden State Warriors noong December 2016.

By Jelbert Perdez

Magbabalik na sa GlobalPort si high-scoring guard Terrence Romeo matapos umanong magkasakit.

Sasalang si Romeo sa Batang pier laban sa Star Hotshots mamayang gabi sa PBA Commissioner’s Cup sa Mindanao Civic Center Gym sa Tubod, Lanao del Norte.

Matatandaang hindi nakalaro si Romeo sa unang laban ng Globalport sa kasalukuyang torneo kontra sa alaska dahil sa karamdaman na hindi isinapubliko ng koponan.

Inaabangan naman ng fans ang posibleng pagtutuos nina Romeo at Star playmaker Paul Lee.

By  Jelbert Perdez