SPORTS

Nagpapagaling ngayon si NBA Hall of Fame inductee Dikembe Mutombo dahil sa nararanasang brain tumor.

Ayon sa NBA Management, humiling ng privacy ang pamilya ni Dikembe upang makapag-focus sila sa pangangalaga ng atleta.

Si Mutombo ay ang dating Center player ng 18 season sa NBA sa anim na koponan, at nakakuha ng reputasyon bilang isa sa mga pinakamahusay na shot blocker ng liga.

Bukod pa dito, nakilala din si Mutombo sa kanyang iconic finger wag matapos magawa ang isang block na ginaya din ng ilang mga manlalaro.

Handa na si Olympian Gold Medalist Hidilyn Diaz para sa 2024 Paris Olympic Games.

Ayon kay Diaz, dalawang taon ang kaniyang ilalaan para muling masungkit ang gintong medalya ng bansa matapos ang huli nitong panalo noong 2021.

Iginiit ng atleta na kahit mahirap, kaniyang ipagpapatuloy ang pag-we-weightlifting para sa karangalan ng Pilipinas.

Una nang nanawagan si Diaz ng tulong para sa karagdagang pondo na gagamitin para sa panggastos, partikular na sa pagbili ng ticket ng kaniyang team na nagkakahalaga ng 100,000; pagkain; nutrition formula; at sports psychologist.

Bukod pa dito, nanawagan din ng suporta at dasal sa publiko si Diaz para sa kaniyang tagumpay laban sa ibang bansa.

Nagwagi sa 2022-2023 PBA Commissioner’s Cup ang Bay Area Dragons kontra San Miguel Beermen sa iskor na 113-87 na ginanap kagabi sa Smart Araneta Coliseum.

Hindi nakuhang makalamang ng Beermen matapos lampasuhin ng Dragons sa una hanggang huling quarter.

Nanguna sa koponan, si Andrew Nicholson na nakapagtala ng 39 points, 12 rebounds, 2 assists, 2 steals, at isang block dahilan ng kanilang pagkapanalo.

Samantala, nakadagdag din sa puntos si Hayden Blankley na mayroong 17 points at 9 na rebounds habang nakapagtala din ng tig-16 points naman sina Zhu Songwei at Kobey Lam.

Sa ngayon, hawak na ng Dragons ang kartada sa All-Time score na 5-1.

Hindi nagpatinag ang Philippines Best o Behrouz Elite Swimming Team nang pataasin pa sa 13 ginto, 11 pilak at 12 tanso ang nahakot nitong medalya sa ikalawang araw ng 2022 PSI Grand Prix National finals na ginaganap sa Tarlac.

Nagpakitang gilas si World Junior Championships semi-finalist Micaela Jasmine Mojdeh nang pangunahan nito ang 100 meters butterfly at 200 meters breast stroke.

Muling sumisid si Mojdeh ng dalawang gintong medalya, dahilan para umangat bilang ng gintong medalya ng Pilipinas sa apat.

Mababatid na unang nakakuha ng ginto si Mojdeh sa 200 meters individual medley sa open at girls’ 16-18 divisions.—mula sa panulat ni Hannah Oledan

Wagi ang koponan ng Converge laban sa Meralco Bolts sa iskor na 106-99 sa nagpapatuloy na PBA Commissioner’s Cup na ginanap sa Araneta Coliseum.

Sinubukan pa ng Bolts na habulin ang kalamangan ng Converge ngunit dahil sa pinakawalang tres ni Maverick Ahanmisi sa mga dying seconds ng laro naselyuhan nito ang kanilang panalo.

Malaki ang naging ambag ni FiberXers import Quincy Miller sa kanilang panalo na kumamada ng 29 points at 16 rebounds habang tumipa naman ng 21 points si Ahanmisi.

Dahil sa panalong ito, napigilan ng FiberXers ang kanilang natamong dalawang magkasunod na pagkatalo.

Tinalo ng Phoenix Super LPG ang Barangay Ginebra, 101-93, sa PBA Commissioner’s Cup.

Pinangunahan ni Jayvee Mocon ang Phoenix at nag-ambag ng 20 points at limang rebounds habang si Tyler Tio naman ay nakapagbigay ng 17 points.

Susubukan naman ng Phoenix na makuha ang ikatlong sunod na panalo laban sa Meralco sa Miyerkules, October 19 sa PhilSports Arena. —sa panulat ni Hannah Oledan

Masigasig ang simula ng Philippines Best Behrouz Elite Swimming Team matapos humakot ng anim na ginto, limang pilak at pitong tansong medalya sa Opening Day ng PSI Grand Prix National Finals sa New Clark City Swimming Pool sa Tarlac.

Nanguna si Mojdeh sa Women’s Open 200m Individual Medley at Girls 16 to 18 200m Individual Medley sa bilis na dalawang minuto at 26.63 segundo.

Nadagdagan ito ng tatlong pilak na 100 freestyle, 800m freestyle open, 800m freestle age group, at tanso sa 50m breaststroke.

Samantala, nakakuha ng pilak si Ivan Radovan sa 1500m freestyle habang tanso naman sina Marcus Johannes de Kam sa 100m freestyle,  Coby Rivilla na may 200m im, Yohan Cabana na may 200m backstroke, Zandro Carandang na may 1500m freestyle at Zahjeed Sarmiento na may 1500m freestyle. —sa panulat ni Jenn Patrolla

Nangunguna pa rin ang Oklahoma City Thunder sa pre-season games ng National Basketball Association (NBA).

Ito ay matapos makapagtala ng panibagong panalo ang Oklahoma laban sa San Antonio Spurs, sa score na 118 – 112.

Ito na ang ikalimang panalo ng Thunder na nasa unang pwesto sa NBA pre-season standings, sinundan ng Minnesota Timberwolves at Philadelphia Sixers na may tig-apat na panalo.

Si Josh Giddey na bagong manlalaro ng Thunder ang nanguna sa huling panalo dahil sa kaniyang 18 points, six assists at six rebounds.

Itinakda na sa Disyembre ang inaabangang paghaharap nina Japanese boxer Naoya Inoue at British World Champion Paul Butler.
Gaganapin ang laban sa Disyembre 13 sa Ariake Arena sa Tokyo, Japan.
Matatandaang huling lumaban si Inoue nang patumbahin nito ang Pinoy boxer na si Nonito Donaire noong Hunyo 7 ng taong ito.
May record si Inoue na 23 wins, zero loss at 20 knockouts.
Hawak din ng boksingero ang IBF, WBC, WBA regular at WBA Super World Bantamweight titles.

Nagwagi sa 2022 PBA Commissioners Cup ang Magnolia Hotshots kontra NLEX Road Warriors sa iskor na 111- 97 na ginanap nito lamang Miyerkules ng gabi sa Araneta Coliseum.

Lumamang ang Magnolia sa una at ikatlong quarter kung saan, nanguna si Nick Rakocevic na nakapagtala ng 36 points at 15 rebounds dahilan ng kanilang pagkapanalo.

Ikinatuwa naman ni Magnolia Coach Chito Victolero ang panalo ng kaniyang koponan dahil sa ipinakitang sipag ng kaniyang mga manlalaro.