SPORTS

Nagwagi sa NBA Western Conference ang Portland Trail Blazers kontra Los Angeles Lakers sa iskor na 106-104.

Lumamang ang Blazers sa una at huling quarter kung saan, nanguna sa koponan si Damian Lillard na nakapagtala ng 41 points, 5 rebounds, at 2 assists.

Nakaambag din sa panalo ng Blazers si Jerami Grant na nakapagtala naman ng 16 points, 2 rebounds, at 1 assist.

Abangan naman sa December 1 ang susunod na laban ng Blazers sa NBA kung saan, kanila pa ring makakaharap ang Lakers alas-11:30, oras sa Pilipinas.

Hindi iaatras ng Gilas Pilipinas ang pagkuha kay Kai Sotto para maging bahagi ng team ng bansa sa November window ng FIBA World Cup Asian Qualifiers.

Ipinabatid ni Gilas Pilipinas Coach Chot Reyes na tuluy tuloy ang pakikipag ugnayan nila sa Samahang Basketball sa Pilipinas (SBP) sa Australia para mahiram si Sotto.

Si Sotto na nasa ikalawang taon na nang paglalaro sa Adelaide 36ers sa Australian National Basketball League, ayon sa pamunuan ng Gilas ay makakatulong lalo pa’t hindi na makakapaglaro si June Mar Fajardo dahil sa injury nito.

Ang Gilas ay nakapagtala na ng tig tatlong panalo at talo at makakaharap ang team ng Jordan sa November 10 at November 13 naman ang tropa ng Saudi Arabia.

Kinilala bilang bagong World Boxing Association (WBA) Asia South Flyweight champion ang Pinoy boxer na si Vince Paras matapos nitong talunin via Unanimous decision si Roberto Paradero.

Pinataob nito si Paradero ng dalawang beses sa ikatlong round.

Si Paras ay nakalikom ng 18 panalo, 15 knockouts, 2 talo, at isang draw sa kanyang professional boxing career

Matatandaan na nagsilbing re-match ang Paras-Paradero fight matapos mauwi sa draw ang una ni lang laban noong April, 2022. —sa panulat ni Hannah Oledan

Nagpakitang gilas ang Philippine Basketball Association (PBA) guest team na Bay Area Dragons nang itakda nito ang pinakamalaking winning margin bago tambakan ang Terrafirma sa score na 130-76 noong Biyernes sa PBA Commissioner’s Cup sa PhilSports Arena sa Pasig City.

Nanguna naman ang Dragon import na si Andrew Nicholson na nagtala ng 37 points at 10 rebounds.

Ang naturang 54 points naman na tambak ay pinakamalaking puntos na naitala sa nagdaang 36 na taon ng PBA. —sa panulat ni Hannah Oledan

Magsisimula ngayong araw ang kampanya ng Team Philippines Killer Whale sa 2022 Hamilton Aquatics Short Course Swimming Championships sa Hamdan bin Mohammed Bin Rashid Sports Complex sa Dubai, United Arab Emirates.

Magpapakitang gilas si Julia Ysabelle Basa ng Immaculate Heart of Mary College-Parañaque sa girls’ 15-year 200 meters butterfly, 200 meters freestyle, 100 meters breaststroke at 100 meters individual medley.

Habang sasalang si Master Charles Janda ng Centro Escolar Integrated School Malolos sa boys’ 13-year 100 meters backstroke, 100 meters individual medley at 50 meters butterfly.

Kabilang din sa mga lalahok sin Jarold Camique, Patricia de Chavez, David Gillego, Kathryn Kier, Hannah Lim Louis Lim, Wynn Robles at Andrae Samontanes sa kani-kanyang events.

Sinabi naman ni delegation head Marilet basa na sumalang pa ang mga manlalangoy sa huling hirit na ensayo sa hamdan swimming pool upang masiguro na handang-handa ang mga ito sa kumpetisyon. —sa panulat ni Hannah Oledan

Kaagad ilalabas ng Gilas Pilipinas ang pangalang ipapalit kay June Mar Fajardo na maglalaro sa fourth window ng FIBA World Cup Asia Qualifiers sa susunod na buwan.

Hindi muna makakapaglaro si Fajardo matapos ang tinamong injury sa isang laro kontra Rain or Shine.

Wala pa ring pahayag ang Samahang Basketbol ng Pilipinas (SBP) hinggil sa ipapalit kay Fajardo na ilang linggo na ring hindi nakakapaglaro para sa Beermen.

Nagwagi ang Phoenix Suns kontra Dallas Mavericks matapos ang game winning shot ni Damion Lee sa iskor na 107-105 na ginanap mismong homecourt ng Suns sa Footprint Center sa Phoenix, Arizona.

Nabatid na natambakan pa ng Mavericks ang Suns sa una at ikalawang quarter pero nagawang makabawi ng Suns sa ikatlo at ikaapat na quarter dahilan ng kanilang pagkapanalo.

Nanguna sa koponan si Devin Booker na nakapagtala ng 28 points, 4 rebounds, at 9 assists habang nakapagtala naman si Deandre Ayton ng 18 points, 10 rebounds, at 2 assists.

Abangan naman bukas ang susunod na laban ng Suns kung saan, kanilang makakaharap ang Portland Trail Blazers, alas-diyes ng umaga, oras sa Pilipinas.

Wagi ang Chicago Bulls kontra Miami Heat sa opening game ng National Basketball Association.

Namayagpag sa panalo si Demar Derozan na kumamada ng 37 big points, 6 rebounds at 9 assists.

Hindi naman ininda ng bulls ang hindi pagkasama ni all-star Guard Zach Lavine sa laro matapos magtamo ng left knee injury.

Maliban sa bulls, nanguna naman sa panig ng Miami si Jimmy Butler na may 24 points at Tyler Herro na may 23 points.

Pinataob ng New Orleans Pelicans ang Brooklyn Nets sa iskor na 130-108 sa pagsisimula ng regular season ng National Basketball Association (NBA).
Nagpakitang gilas ang nagbabalik sa pelicans na si Zion Williamson kung saan mayroon itong 25 points at 9 rebounds.
Habang nakapagtala naman si Ben Simmons ng NETS ng apat na puntos lamang at si Kyrie Irving na may 15 points.

Naghahanda na ang Philippine Sports Commission (PSC) para sa ika-8 edisyon ng Women’s Martial Arts Festival hinggil sa pagbalik nito ng pisikal na kompetisyon.

Isasagawa ang kompetisyon sa Rizal Memorial Sports Complex sa Maynila at PhilSports Complex sa Pasig City simula November 12 na tatagal hanggang 17.

Sinabi ng PSC, na posibleng umabot sa 1,000 ang makikilahok sa naturang kompetisyon kung saan, sakop nito ang pencak silat, wrestling, sambo, taekwondo, muay thai, kickboxing, karate, jiujitsu, kurash, judo at arnis.

Inaasahan naman ng PSC, na mas dadami pa ang mga atleta na magpapakita ng kanilang talento para sa karangalan ng bansa.