Pinataob ng Minnesota Timberwolves sa pangalawang pagkakataon ang Los Angeles Lakers sa National Basketball Association (NBA) pre- season sa iskor na 118-113.
Nagpakitang gilas si Naz Reid ng Timberwolves upang masungkit ang panalo laban sa lakers matapos itong magtala ng 22 points.
Habang nag-ambag naman si D’Angelo Russell ng 15 points.
Samantala, wala pa ring record ng pagkatalo ang Timberwolves ngayong pre-season at umakyat ang record sa 4-0.
Pinadapa ng Cleveland Cavaliers ang Atlanta Hawks sa National Basketball Association (NBA) pre-season sa iskor na 105- 99.
Malaki naman ang naiambag ng CAVS na si Darius Garland at Donovan Mitchell kung saan nagtulungan para makapuntos ng 47 points.
Ngayong preseason pa lang ay pinapakita na ng CAVS ang isa sa mga nakakatakot na kombinasyon ng backcourt sa Eastern Conference.
Samantala, nakapagtala lamang si Trae Young ng HAWKS ng 14 points habang si Dejounte Murray naman ay nagtala ng 17 points lamang.
Napili bilang bagong coach ng Philippine Skating Union (PSU) ang pinoy olympic figure skater na si Michael Christian Martinez.
Kasunod ito ng alok na trabaho ni PSU President Nikki Cheng, matapos ang ilang taong pananatili ni Martinez sa US.
Pamumunuan ni Martinez ang kaniyang bagong tungkulin para sa mga bata at promising figure skaters ng nasabing team.
Ayon kay Cheng, malaking tulong ang bagong posisyon ng atleta para maibalik ang milyun-milyong pisong ng sm group of companies sa kanyang karera sa pamamagitan ng Philippine Sports Commission.
Nakapagtala ng panibagong career high ang filipina rising star na si Alex Eala.
Ito’y matapos ilabas ang bagong Women’s Tennis Association (WTA) rankings kung saan nasa 252 spot na si Eala mula sa 281.
Magugunitang, nakaabot si Eala sa second round nuong lumaban siya sa w60 templeton na ginanap sa California.
Aabot sa mahigit 800 atleta ang ipadadala ng bansa para sa pagsabak sa 32nd Southeast Asian Games sa susunod na taon sa Cambodia.
Ito ang napagdesisyunan ng dalawang consultative meeting ng National Sports Associations.
Ayon kay Philippine Olympic Committee (POC) President Abraham Bambol Tolentino, target nilang salihan ang lahat ng kompetisyon sa nasabing laro.
Nabatid na magsisimula ang Sea Games sa May 5 hanggang May 17, 2023 sa Cambodia.
Halos 1.5 billion pesos ang kakailanganing pondo ng Samahang Basketball ng Pilipinas (SBP) kaugnay sa hosting ng bansa sa 2023 FIBA Basketball World Cup.
Ang naturang halaga, ayon kay SBP Vice President Ricky Vargas ay 40% lamang ng halos 4 billion pesos na unang hinihingi ng organizing committee at kung saan ang 60% ng pondo ay mula sa pribadong sektor.
Sakaling maaprubahan, idadaan ang pondo sa Philippine Sports Commission na siyang magbabahagi nito sa SBP.
Ang 2023 FIBA Basketball World Cup na itinakda sa August 25 hanggang September 10, 2023 ay hindi lamang sa Pilipinas gagawin kundi maging sa Japan at Indonesia.
Nagwagi sa kauna-unahang amateur fight si Michael Pacquiao na anak ni pambansang kamao Manny Pacquiao.
Pinatumba ni Michael si Nathaniel Ruiz sa kanilang laban sa boxing ring na ginanap sa BF Parañaque Phase 1 Gymnasium.
Nabatid na nakatanggap ng tama sa unang round si Michael dahilan ng pagkakadugo ng kaniyang ilong, pero nagawa nitong makabawi sa second at third rounds.
Dahil dito, humanga ang maraming netizen kay Michael dahil nakuha nito ang galing ng kaniyang ama sa larangan ng pampalakasan.
Matatandaang naging usap-usapan din ang panganay na anak ni Pacman na si Jimuel na lumalaban din sa boxing sa Amerika at nag-eensayo sa ilalim ni Freddie Roach sa Wild Card Boxing Gym.
Nagwagi ang Barangay Ginebra kontra Bay Area Dragons sa iskor na 111-93 sa regular season ng 2022 PBA Commissioners Cup na ginanap kagabi sa Philippine Sports Arena.
Lumamang ang Ginebra sa ikalawa at ikatlong quarter matapos magpakita ng matinding depensa laban sa Dragons na nagresulta ng kanilang pagkapanalo.
Nanguna sa panalo ng Ginebra si Justin Brownlee na nakapagtala ng 46 points at Jamie Malonzo na nakapagtala naman ng 17 points.
Abangan naman sa Biyernes ang susunod na laban ng Ginebra kung saan, kanilang makakalaban ang Phoenix Super LPG Fuel Masters alas-5:45 ng hapon, oras sa Pilipinas.
Naiuwi ng Phoenix Super LPG Fuel Masters ang panalo kontra NLEX road warriors, 111-97, sa PBA Commissioner’s Cup sa Philsports Arena.
Bumanat si Tyler Tio ng 26 points kung saan lima rito ay tres; nag-ambag naman ng 23 points si Jayvee Mocon habang 22 points 21 rebounds at 7 assists naman ang iginawad ni Kaleb Wesson.
Ito ang unang talo ng road warriors matapos ang 2-0 record nito nang buksan ang midseason conference.
Nakalikom naman ng 36 points, 20 rebounds at 8 assists si NLEX import Earl Clark habang nag-ambag naman ng 18 points si Celedonio Trollano at 16 points naman kay Kevin Alas.—mula sa panulat ni Hannah Oledan