SPORTS

Hindi pa isinasara ni fighting senator at dating 8-division world champion manny pacquiao ang pintuan para sa kanyang coach at trainer na si Freddie Roach.

Ayon sa pambansang kamao, hindi pa pinal ang desisyon ng pagtanggal kay Roach sa Team Pacman.

Sinabi ni Pacquiao na mangyayari ang huling desisyon ng kanilang kampo sa mga susunod na araw.

Bagama’t wala pang pinipirmahang kontrata, abala ngayon ang pambansang kamao sa pag-promote ng laban kasama ang Golden Boy Promotions kung saan inaasahang makakalaban si Lucas Matthysse sa Kuala Lumpur, Malaysia.

—-

Dalawang Pinoy boxer ang nakasungkit ng gintong medalya sa katatapos lamang na Feliks Stamm tournament sa Warsaw, Poland.

Nakasikwat ng gintong medalya ang 2015 Southeast Asian Games gold medalist na si Ian Clark Bautista matapos ang kanyang panalo via unanimous decision sa flyweight division kontra Zarip Jumayev ng Turmenistan.

Napasakamay din ng 3-time SEA Games Silver Medalist na si Nesthy Petecio ang ginto sa kanyang split decision win laban kay Ornelia Wahner ng Germany.

Kapwa mag-uuwi naman ng bronze sina Lightweight Champion Junel Cantancio at Bantamweight Champion Mario Bautista.

Hindi na lalaban sa Miami Open ang Russian Tennis Star Player na si Maria Sharapova na nakatakdang ganapin sa march 21 hanggang april 1.

Ito ay dahil sa natamong injury ni Sharapova sa kaniyang kaliwang kamay.

Gayunman tiniyak ng kampo ni Sharapova na magbabalik agad sa torneo ang Russian Tennis Star Player oras na gumaling na ang injury nito.

Isinagawa naman ang nasabing anunsiyo matapos matalo si Sharapova sa BNP Paribas Open noong nakaraang linggo.

Samantala, bukod kay Sharapova umatras na rin sa torneo sina Rafael Nadal, Stan Wawrinka at Dominic Thiem.

Naitabla ng NLEX Road Warriors sa 2-2 ang best of seven semi-finals kontra Magnolia.

Ito ay matapos ilampaso ng NLEX ang Magnolia sa Game 4 sa iskor na 91-79.

Nanguna sa panalo ng Road Warriors ang kanilang rookie na si Kiefer Ravena na kumana ng dalawampung (20) puntos, limang (5) assists at tatlong (3) rebounds.

Nag-ambag naman ng labing apat (14) na puntos si JR Quiñahan.

Ikinatuwa naman ni Coach Yeng Guiao ang panalo ng NLEX na sinuwerte aniya dahil sa naging consistent aniya ang pasok ng tira ng kanyang mga manlalaro.

—-

Posibleng pasukin na rin ni dating welterweight champion Floyd Mayweather Jr. ang mundo ng mixed martial arts.

Ito ang inihayag ni Mayweather makaraang aminin na plano niyang tanggapin ang alok na sumailalim siya sa training kay dating UFC Champion Tyron Woodley.

Ayon kay Floyd, inaasahang anumang araw ay maaari na siyang sumabak sa training.

Magugunitang nag-retiro si Pretty Boy noong Agosto ng isang taon matapos ang kanyang panalo via technical knockout laban sa MMA star na si Conor McGregor sa Las Vegas, Nevada.

Bagaman magsasanay sa ilalim ng isang dating MMA champion, nilinaw ng undefeated boxer wala pa sa kanyang plano na sumabak sa aktuwal na MMA fight.

—-

Hindi muna matutuloy ang bakbakang Jeff Horn at Terrence Crawford sa Abril.

Ito ang inanunsyo ng Top Rank Promotions matapos na magtamo ng injury sa kanang kamay si Crawford habang ito ay nasa training camp.

Dahil dito, ipagpapaliban din ang salpukan ng dalawang Pinoy fighters na sina Jerwin Ancajas at Jonas Sultan na lalaban para sa undercard match ng bakbakang Horn at Crawford.

Sinabi ni Ancajas na malalaman pa nila kay Top Rank CEO Bob Arum kung kailan posibleng gawin ang naudlot na laban.

—-

Lusot na sa quarterfinals ng Indian Wells si World’s Number One Simona Halep.

Ito ay makaraang talunin ni Halep ang kalabang si Wang Qiang sa iskor na 7-5, 6-1.

Hindi naging maganda ang pagsisimula ni Halep ngunit unti-unti rin itong nakabawi hanggang sa payukuin ang kalaban.

Makakaharap ni Halep sa quarterfinals si Petra Martic.

—-

Abanse na sa ika-apat na roud ng BNP Paribas Open si world’s number one Roger Federer.

Ito ay makaraang idispatsa ni Federer ang kalabang si Serbian tennis player na si Filip Krajinovic.

Kinailangan lamang ni Federer ng kulang kulang isang oras para talunin nang walang kahirap-hirap ang kalaban sa iskor na 6-2, 6-1.

Walumpu’t siyam (89) na porsyento ng puntos ni Federer ay dahil sa service ace na hindi makontra ni Krajinovic.

—-

Posibleng halos isang taon munang magpahinga sa PBA si Magnolia Star Marc Pingris.

Mismong ang orthopedic surgeon na tumingin kay Pingris ang nagsabing kailangan ng pangmatagalang gamutan sa ACL injury ng Magnolia star.

Maaaring magpahinga muna si Pingris sa paglalaro ng anim hanggang walong buwan matapos itong isailalim sa operasyon.

Ang ACL o anterior cruciate ligament ay isa sa mga pangunahing ligaments na tumutulong para mapatatag ang knee joint.

Nagpasalamat naman ang PBA star sa mga nagdasal para sa kanya at kanyang pamilya.

Family time salamat pala sa lahat ng nag dasal para sa family ko mapa players, fans, coach, friends salamat sa lahat lord salamat at di mo kami pinabayaan kahit may pinag dadaanan kami ngayon di kami bibitaw alam ko may plano ka para sa akin #godisgoodallthetime #pusongpingris #imok #pinoysakuragi15

A post shared by Marc Pingris (@jeanmarc15) on Mar 11, 2018 at 5:51am PDT

—-