SPORTS

Bigong mai-uwi ng pinoy boxer na si Donnie “Ahas” Nietes ang WBO Flyweight World Champion Belt.

Ito’y makaraang mauwi sa split decision o draw ang kaniyang laban kay Aston “Mighty” Palicte sa Superfly 3 na ginawa sa Los Angeles, California.

Bagama’t kapwa ipinamalas ng dalawang pilipinong boksingero ang kanilang tapang at lakas sa parisukat na lona, nanatiling tabla sila sa mata ng mga hurado.

Dahil dito, nananatiling bakante ang WBO Flyweight Title.

Nasungkit ng University of the Philippines Fighting Maroons ang buena manong panalo sa senior men’s basketball tournament ng University Athletic Association of the Philippines o UAAP Season 81.

Pinataob ng UP ang University of the East Red Warriors sa score na 87-58 sa opening game sa MOA Arena, Pasay City, kahapon.

Pinangunahan ni Juan Gomez De Liano ang Fighting Maroons sa pamamagitan ng 16 points at 7 rebounds habang nagpakawala ng double-doubles 14 points si Alvin Pasaol para sa UE.

Sa second game, nalusutan ng National University Bulldogs ang University of Santo Tomas Growling Tigers sa score na  75-70.

Nanguna para sa NU ang mga anak ng PBA veteran na si Danny Ildefonso na sina Dave Ildefonso na kumamada ng 19 points habang nag-ambag ng 10 points ang kanyang kapatid na si Shaun.

Nagpakawala naman ng 20 points si CJ Cansino para sa Growling Tigers.

Pasok na sa finals si US tennis star Serena Williams.

Ito ay makaraang durugin ni Williams ang kalabang si Anastasija Sevastova sa iskor na 6-3, 6-0.

Isang hakbang na lang ngayon si Williams para masungkit ang ika-24 na grand slam title.

Dahil dito, nag-aabang na lamang si Williams sa kung sino ang mananalo sa pagitan nina Naomi Osaka ng Japan at Madison Keys ng Amerika.

—-

Nasa bansa ngayon ang 2-time NBA most valuable player (MVP) na si Stephen Curry.

@StephenCurry30 of @warriors arrives in Manila @dwiz882 @ppsamedia pic.twitter.com/epPmrymNZy

— raoul esperas (@raoulesperas) September 6, 2018

Ito ay upang dumalo sa isang okasyon kaugnay ng ini-endorso nitong basketball shoes.

Gayundin, para pangunahan ang pagbubukas naman ng Season 81 ng UAAP bukas, Setyembre 8.

Mismong ang host school ng UAAP Season 81 ang nagkumpirma sa pagdalo ni Curry sa opening ceremony na gaganapin naman sa Mall of Asia Arena.

—-

Nasilat ng Blackwater Elite ang panalo kontra San Miguel Beermen sa Philippine Basketball Association (PBA) Governors’ Cup kagabi sa iskor na 103-100.

Bumida sa panalo ng Blackwater ang import nitong si Henry Walker na nagpakawala ng double-double na 35 points at 17 rebounds.

Hindi rin nagpahuli ang 21 points ni Mike Digregorio at 15 points mula kay Nards Pinto.

Nauwi naman sa three-point lead ang dalawang free throws ni JP Erram sa huling 19 na segundo.

Samantala, nanguna naman sa San Miguel si AZ Reid na nakapagtala ng 26 points at 12 rebounds upang punan ang pagkawala ni June Mar Fajardo dahil sa shin injury.

Nabigo si five-time champion Roger Federer na makalusot sa quarterfinals ng US open.

Ito ay matapos na matalo si Federer kay Australian tennis player John Millman sa 4th round sa score na 3-6, 7-5, 7-6 at 7-6

Sinamantala naman ni Millman ang maraming faults na nagawa ni Federer na siyang naging dahilan ng pagkatalo nito.

Nakatakda namang susunod na makalaban ni Millman ang Wimbledon champion na si Novak Djokovic sa quarterfinals.

—-

Pasok na sa quarter-finals ng women’s singles ng 2018 US Open ang 6-time champion na si Serena Williams.

Nalusutan ng American tennis superstar si Kaia Kanepi ng Estonia sa score na 6-0, 4-6 at 6-3 sa kanilang paghaharap sa Arthur Ashe Stadium sa New York City.

Aminado ang 23-time grand slam champion na si Williams na nahirapan siya sa naturang laban lalo’t malakas pumalo at mag-serve si Kanepi.

Sunod na makakasagupa ni Williams si Karolina Pliskova ng Czech Republic.

—-

Nakasungkit ng tansong medalya ang dalawang boksingerong Pinoy sa 2018 Asian Games.

Nagkasya si Eumir Marcial sa bronze medal matapos talunin ng pambato ng Uzbekistan na si Jasurbek Latipov sa gitgitang 3-2 decision.

Samantala, kinapos naman ang light flyweight fighter na si Carlo Paalam matapos talunin ni amit ng India sa iskor na 3-2 sa kanilang semifinal match-up.

Dahil dito, tanging ang Pinoy boxer na si Rogen Ladon na lamang ang   may natitira pang pagasa para sa gintong medalya kung saan ay makakaharap nito sa men’s flyweight semifinals ang pambato ng Thailand na si Yuttapong Tongdee.

Hindi magpapakumpiyansa ang Philippine basketball team sa kanilang laban mamaya kontra Syria kahit pa tiyak na sila sa pang-limang puwesto sa nagpapatuloy na Asian Games.

Ayon kay National Team Coach Yeng Guiao, hindi nagkakalayo sa bilis at laki ang mga manlalaro ng Pilipinas at Syria.

Desidido din ang mga basketbolistang Pinoy na maipanalo ang kanilang laban bilang regalo kay Filipino-American at Cleveland Cavaliers Guard Jordan Clarkson.

Kasalukuyang may 2-2 win-loss record ang Pilipinas matapos nitong ilampaso ang mga bansang Kazakhstan at South Korea.

—-