SPORTS

Nangako ang nagbabalik na US boxing legend na si Floyd Mayweather Jr. na bibigyan niya ng maganda at nakalilibang na laban ang kaniyang New Year’s Bout laban sa Japanese kickboxer na si Tenshin Nasukawa.

Ayon kay Floyd, walang problema sa kaniya kung matalo siya ng kalaban nito dahil “all about entertainment” naman aniya ang nais niyang ibigay sa kaniyang mga fans.

Para naman kay Nasukawa, handa na rin siya para sa kakaibang laban lalo’t hindi niya magagamit ang kaniyang paa para sa pagsipa dahil iba ang panuntunan ng laro.

Ang kailangan lamang niya sa ngayon ay lalong paghandaan si Mayweather lalo’t wala pa itong katalo-talo sa larangan ng boxing.

Siniguro ni Pambansang Kamao Manny “Pacman” Pacquiao na hindi magiging hadlang sa nalalapit nyang laban ang pagkakaaresto kamakailan sa kanyang katunggali na si American boxer Adrien Broner.

Una nang napaulat na dinakip ng mga otoridad si Broner dahil sa hindi nito pagsipot sa mga court hearings hinggil sa mga kinakaharap na traffic violations.

Agad rin namang pinalaya si Broner matapos na makapagbayad ng piyansa

Pahayag ni Pacman, tiyak aniyang sisipot at matutuloy ang kanilang paghaharap ng American boxer sa MGM Grand sa Las Vegas, Nevada.

Professional boxer aniya si Broner kayat batid nito ang kahalagahan ng kanilang laban.

Last week lamang, panibago na namang kaso ang isinampa sa controversial US boxer dahil sa tumalbog ang cheque na ibinayad nito sa biniling alahas o jewelry na nagkakahalaga ng $1.1 million.

Dahil dito, tinawag ni Hall of Famer coach Freddie Roach si Broner bilang “the fugitive.”

Iniinda man ang kaniyang pinagdaanang operasyon sa bukung-bukong, wagi pa rin si Rafael Nadal sa kaniyang unang laban kontra kay Kevin Anderson.

Ito’y sa three-set match sa Mubadala World Tennis Championship na ginawa sa Abu Dhabi, United Arab Emirates.

Aminado si Nadal na naging pahirapan ang laro para sa kaniya dahil nakararamdam pa rin siya ng pananakit ng kaniyang bukung-bukong dahil na rin sa matagal niyang hindi paglalaro.

Dahil dito, posibleng hindi muna ulit maglaro si Nadal sa susunod na linggo para magpahinga matapos alisin ang kaniyang loose intra-articular body noong isang buwan.

Inaayos na ng Samahang Basketbol ng Pilipinas (SBP) ang pagbabalik ni naturalized center Andray Blatche sa Gilas Pilipinas.

Ayon kay SBP President Al Panlilio, pinaplantsa na nila ang mga detalye para sa muling paglalaro ni Blatche para sa national team.

Matatandaang hindi naisama ang pangalan ni Blatche sa 20 man line up ni coach Yeng Guiao na isinalang nuon sa back to game games nuong November 30 at December 3.

Gayunman, sinabi ni Blatche sa isang pahayag na susuutin nitong muli ang national colors sa ika-anim na window ng FIBA World Cup Asian qualifiers sa susunod na taon.

Ilang linggo ring hindi makakapaglaro para sa Los Angeles Lakers si NBA Superstar Lebron James.

Ito ay dahil sa tinamo niyang groin injury sa Christmas game ng Lakers kontra Golden State Warriors kahapon.

Ayon kay James, hihintayin pa niya ang resulta ng kanyang MRI scan para malaman kung kailan ito posibleng makapaglaro.

Matatandaang kahit nawala sa kalagitnaan ng laro ng lakers kahapon si Lebron ay natalo pa rin ng koponan ang kalabang Warriors.

Nagsimula na ang huling bahagi ng pag-eensayo ni pambansang kamao Senador Manny “Pacman” Pacquiao para sa nakatakdang laban nila ng boksingerong si Adrien Broner sa susunod na buwan.

Nasubok ang resistensya ni pacquiao nang mag-ensayo sya sa Griffith Park at Wildcard Gym sa Los Angeles, California.

Nagpasalamat naman ang pambansang kamao sa pagmamahal, suporta at dasal ng kanyang mga Pilipinong tagasuporta sa kanyang unang araw sa Los Angeles.

Sasabak sa 10 rounds ng sparring session ang pambansang kamao na si Senador Manny “Pacman” Pacquiao.

Inihayag ni Bobby Pacquiao na kasama sa sparring ng pambansang kamao sina George Kambosos at American boxer Haskell “Hackman” Lydell Rhodes na kahalintulad ang istilo ng paglalaro kay Adrien Broner na syang nalalapit na kakalabanin Ni Pacman.

Samantala, bukod sa mga Pinoy supporters ay mainit din ang suporta mula sa iba’t-ibang mga lahi para sa pambansang kamo.

Pinataob ng Indiana Pacers ang Washington Wizards sa kanilang salpukan kaninang umaga.

Tinapos ng pAcers ang pag-asa ng Wizards sa iskor na 105 – 89.

Nanguna sa panalo ng Pacers si Myles Turner na kumana ng labing walong (18) puntos at labing pitong (17) rebounds.

Sinegundahan naman ito ni Domantas Sabonis na sumikwat naman ng labing limang (15) puntos at sampung (10) rebounds.

—-

Sisimulan na sa Enero 21 ng susunod na taon ang pagdinig ng korte sa kasong tax fraud na kinakaharap ni football star Cristiano Ronaldo.

Dahil sa naturang kaso, posibleng mag-plead guilty at masuspinde sa loob ng dalawang taon si Ronaldo.

Maaari namang mapababa ang hatol sa football star kapag nagbayad ito ng $ 22 million kasabay ng pagplead guilty nito.

Nakasaad sa batas ng spain na puwedeng bawasan ang hatol ng hanggang dalawang taon para sa mga first time offenders.

Matatandaang kinasuhan si Ronaldo ng apat na bilang ng tax fraud mula 2011 hanggang 2014 dahil sa pagtatago umano nito ng $16.5 million na kita mula sa ibang kumpanya.

Inanunsyo na ng Philippine SEA Games Organizing Committee ang mga video games na kabilang sa kauna-unahang e-sports tournament sa 2019 Southeast Asian Games kung saan hosut ang Pilipinas.

Binubuo ito ng mga video game na Dota 2, Mobile Legends: Bang Bang, Star Craft 2, Arena of Valor at ang console game na Tekken 7.

Napili ang mga nasabing laro dahil nanguna ang mga ito sa gaming platforms na masusi nilang sinuri.

Bahagi rin ng naging konsiderasyon ang pagkakaroon ng teamwork sa naturang mga laro.

Ito ang magiging unang pagkakataon na kabilang ang e-games sa medal events ng isang major sporting competition.