SPORTS

Bigo ang Milwaukee Bucks na masungkit ang kanilang pagkapanalo sa kanilang laban kontra Brooklyn Nets.

Sa pangunguna ni D’Angelo Russel ng nag-waging Nets, nagtapos ang kanilang laban sa iskor na 133 – 128.

Kumamada ng 25 puntos si Russel habang 24 na puntos naman ang iniambag ni Caris Levert.

Sa panig naman ng Bucks, bigong maipanalo ng 33 na puntos ni Eric Bledsoe ang kanyang koponan.

Samantala, sunod namang makakasagupa ng Nets ang Indiana Pacers bukas habang makakaharap ng bucks ang Atlanta Hawks sa kaparehong araw.

Nasungkit ng Memphis Grizzlies ang kanilang pagkapanalo kontra koponan ng Dallas Mavericks sa iskor na 122 – 112.

Nanguna sa Grizzlies si Delon Wright na kumamada ng 26 puntos, sampung rebounds at 14 na assists.

Nag-ambag din ng 20 puntos si Justin Holiday habang may tig-sampung puntos naman sina Jevon Carter at Tyler Zeller.

Samantala, nanguna naman sa Mavericks si Courtney Lee sa kanyang 21 puntos.

Muli namang maghaharap ang dalawang koponan sa Lunes.

Kumamada ng nakalululang 45 puntos si Giannis Antetokounmpo ng Milwaukee Bucks na nanguna sa kanilang pagkapanalo kontra Philadelphia 76ers.

Nagtapos ang kanilang laban sa iskor na 128 – 122.

Nag-ambag din sa Bucks si Khris Middleton na nakapagtala ng 22 puntos at si George Hill na mayroon namang 20 puntos.

Samantala, bigo namang maipanalo ni Joel Imbiid ang 76ers sa kanyang 34 na puntos at 13 rebounds.

Sunod namang makakaharap ng nag-waging Bucks ang koponan ng Brooklyn Nets sa Linggo.

Winalis ng Oklahoma City Thunder ang koponan ng Los Angeles Lakers.

Hindi nakaporma ang koponan ni Lebron James at natalo sa iskor na 103 -119 pabor sa Thunder.

Nakapagtala naman ng record si Russel Westbrook matapos makapagtala ng triple double.

Si Westbrook ang ikalawang NBA player na nakapagtala ng dalawampung (20) puntos, dalawampung (20) rebounds at dalawampung (20) assists sa isang laro.

—-

Hindi makakalaro si NBA MVP Lebron James sa World Cup sa China ngayong taon.

Subalit, ipinabatid mismo ni James na posible siyang makapaglaro para sa defending champion na US team sa 2020 Tokyo Olympic Games.

Sa nakalipas na labing apat na taon, ngayon lamang hindi nakapasok si James sa NBA Play-offs matapos tuluyang malaglag para sa finals ang team nitong Los Angeles Lakers.

Kasabay nito, ibinalita ng website na the Athletic na sisimulan na ngayong taon ni James habang off season ang NBA ang pag-shoot ng Space Jam 2 na sequel sa Space Jam movie na pinagbidahan noon ni Michael Jordan.

Ang Space Jam 2 ay nakatakdang ipalabas sa July 2021.

—-

Umarangkada ang Golden State Warriors sa kanilang laban kontra Charlotte Hornets.

Tinambakan ng warriors ng mahigit 40 puntos ang hornets sa iskor na 137 – 90.

Nanguna si Stephen Curry sa kanilang pagkapanalo na kumamada ng 25 puntos at anim na rebounds.

Katuwang ni Curry sina Klay Thompson na may 24 na puntos at Quinn Cook sa kanyang 21 puntos.

Hindi naman umubra ang naitalang 22 puntos ni Guillermo Hernangomez para sa Hornets.

Samantala, sunod na makakasagupa ng nag-waging Warriors ang Denver Nuggets sa Miyerkules.

Wagi ang Los Angeles Lakers sa kanilang laban kontra New Orleans Pelicans na nagtapos sa iskor na 130-102.

Nanguna sa Lakers si Rajon Rondo na sumikwat ng 24 puntos at 12 assists.

Nag-ambag din ng tig 23 puntos sina Javale Mcgee at Alex Caruso ng Lakers.

Samantala bigo naman ang 17 puntos ni Julius Randle at 15 puntos nina Jahlil Okafor at Christian Wood para maipanalo ang Pelicans.

Sunod na makakaharap ng lakers ang Oklahoma City Thunder sa Miyerkules habang makakaharap naman ng Pelicans ang Charlotte Hornets sa Huwebes.

Nagpakitang gilas si Jonas Valanciunas ng Memphis Grizzlies na nanguna sa kanilang pagkapanalo kontra Phoenix Suns sa iskor na 120 – 115.

Nagpakawala ng 34 puntos si Jonas at sumikwat pa ng 20 rebounds.

Tumulong din ng 33 puntos si Mike Conley ng Grizzlies dahilan para madaig ang 48 puntos na ginawa ni Devin Booker ng Phoenix.

Samantala, makakaharap naman ng nagwaging Grizzlies ang Los Angeles Clippers bukas habang makakasagupa naman ng Suns ang Cleveland Cavaliers sa Martes.

Nasa Pilipinas ngayon ang boxing superstar na si Floyd Mayweather.

Boxing superstar @FloydMayweather Secretly arrives in Manila for a Private Visit @dwiz882 pic.twitter.com/S3W57p3r8j

— raoul esperas (@raoulesperas) March 30, 2019

Dumating si Mayweather sakay ng kanyang private plane na nanggaling sa Maldives dakong alas tres y medya kaninang madaling araw napaaga ito ng 30 minuto sa kanyang scheduled arrival na alas kwatro ng umaga.

Biglang nagdesisyon ang boxing superstar na sumilip sa bansa kaya’t agad itong nakipag-ugnayan sa kanyang kaibigang negosyante at isa ring piloto dito sa bansa na si Lester Codog kaya agad itong nakakuha ng special booking sa Resorts World Manila.

Isang private visit ang pagbisita ng boksingero.

Anumang oras naman ngayong araw ay lilipad muli ang private plane ni Mayweather para magtungo sa Boracay.

Napag-alaman ayon kay codog na mayroon silang inaareglong pagkikita ni Pinoy boxing champ Manny Pacquiao na naging magkaibigan na matapos ang kanilang naging laban.

Samantala, inaasahang tatagal hanggang a-dos ng abril ang pagbisita ni Mayweather at nakatakda namang bumalik sa Las Vegas sa sumunod na araw.

May ulat mula kay Raoul Esperas (Patrol 45)

Nagpakawala ng isang tie-breaking free throw sa nalalabing kalahating segundo ng overtime ng kanilang laban si Karl-Anthony Towns ng Minnesota Timberwolves na naging daan para masungkit nila ang pagkapanalo kontra Golden State Warriors.

Natapos ang makapigil-hiningang labanan ng dalawang koponan sa iskor na 131 – 130.

Kumamada rin si Andrew Wiggins ng 24 puntos para sa Timberwolves.

Nasayang naman ang 37 puntos na naitala ni Stephen Curry para sa Warriors na bigong maipanalo ang laban.

Samantala, sunod na makakaharap ng Timberwolves ang Philadelphia Seventy-Sixers bukas habang makakalaban naman ng Warriors ang Charlotte Hornets sa Lunes.