Inanunsyo na FIBA ang walong koponan na nakakuha ng top seed para sa world cup na gaganapin ngayong summer sa China.
Bilang host nation, awtomatikong nasa top seed ang china.
Maliban dito, nangunguna rin ang koponan ng United States, Spain, France, Serbia, Argentina, Lithuania at Greece.
Ito ay ibinase ng FIBA sa world ranking sa bawat koponan sa buong mundo.
Photo Credit: Philippine Sports Commission
Gumulong na ang proseso para sa pagtatayo ng Philippine Sports Training Center sa bansa.
Ayon kay Commissioner Ramon Fernandez ng Philippine Sports Commission (PSC), sinimulan na nila ang paghahanap ng magandang lugar para rito.
Sa ilalim ng bagong batas, mayroon aniya silang anim na buwan para mamili ng lugar at isa at kalahating taon para simulan ang konstruksyon.
Kabilang aniya sa mga panukalang lugar ang Rosales Pangasinan at iba pang lugar na mungkahi ng ilang mambabatas.
Gayunman, kung siya aniya ang masusunod, tila mas makatuwiran na isama na lamang ang bagong sports facility sa itinatayong green city sa Capaz, Tarlac.
“Kasi ang gaagwin doon sa green city na ‘yun ay yung track oval, aquatic center at dormitories ng mga atleta, kulang sa facilities din ‘yun eh, in fact the other events ay gagawin sa iba-ibang lugar, I think for me the most sensible thing to do is doon na lang idagdag ‘yan, we will se, wala pa namang final.” Pahayag ni Fernandez
Nagpaabot ng pagbati si Fil-Am at Cleveland Cavaliers Guard Jordan Clarkson sa Gilas Pilipinas matapos na makapasok nito sa FIBA World Cup.
Sa kaniyang post sa Instagram, sinabi ni Clarkson na umaasa rin siyang magiging bahagi siya ng Gilas sa paglalaro nito sa China para sa FIBA World Cup na magsisimula sa katapusan ng Agosto.
Sa nasabing post ay ipinakita ni Clarkson ang kaniyang larawan suot ang Philippine jersey matapos maglaro noong August 2018 para sa bansa sa Asian Games.
Una nang inihayag ng Samahang Basketbol ng Pilipinas o SBP na gagawin nila ang lahat para payagan ng FIBA na makapaglaro si Clarkson sa Philippine team.
Photo Credit: Gilas Pilipinas Twitter
Pasok na ang Gilas Pilipinas kasama ang 32 na mga bansa sa FIBA World Cup ngayong taon na gaganapin sa China.
Ito’y matapos ilampaso ng Gilas ang Kazakhstan at talunin ito sa qualifiers sa iskor na 93-75.
Sa unang quarter ng laro ay kumana si Andray Blatche ng labing siyam (19) na puntos para bigyan ng momentum ang Gilas kontra Kazakstan.
Sa ikatlong quarter ay nanganib ma-fouled out si Blatche ngunit agad na pinalitan ni June Mar Fajardo at nag-ambag din ng ilang puntos.
Kasabay nito ay bumitaw din ng back to back na tatlong puntos ang Gilas guard na si Jasyon Castro para mapanatili ng Gilas ang kalamangan.
Sa huling quarter ay sinelyuhan na ng Gilas ang pagkapanalo sa pamamagitan ni Blatche na umiskor ng apatnapu’t isang (41) puntos sa buong laro.
Idaraos ang FIBA World Cup sa ilang lungsod sa China sa buwan ng Agosto ngayong taon.
Pinataob ng Cleveland Cavaliers ang koponan ng Phoenix Suns sa iskor na 111-98.
Nanguna sa panalo ng Cavs si Kevin Love na sumikwat ng labing anim (16) na puntos.
Dahil sa panalo, nasungkit ng Cavs ang ika-walong sunod nilang panalo habang nasadlak naman sa ika-labing anim na sunod na pagkatalo ang Suns.
Nakabalik na sa top ten ng tennis rankings si dating world number one Serena Williams.
Ito ang unang pagkakataon na nakapasok sa top ten si Serena magmula nang manganak ito.
Matatandaang bumagsak sa ika-491 ang ranking ni Williams magmula nang bumalik ito sa paglalaro noong Marso ng nakaraang taon matapos manganak.
Malaking bagay sa pagbabalik sa top 10 ni Williams ang pagpasok nito sa dalawang grandslam finals.
Dinaig ni Joe Harris ng Brooklyn Nets si Stephen Curry ng Golden State Warriors sa NBA All-Star 3-point contest.
Nakapagtala ng dalawampu’t anim (26) na puntos si Harris habang pumangalawa lamang si Curry na may dalawampu’t apat (24) na puntos.
Pasok naman sa ikatlong puwesto si Buddy Hield na pambato ng Sacramento Kings.
Magugunitang taong 2015 nang masungkit ni Curry ang pagkapanalo sa NBA All-Star 3-point contest.
Samantala, ito naman ang unang beses na lumahok si Harris sa naturang paligsahan.
Sinibak na ng NBA team New Orleans Pelicans ang kanilang general manager na si Dell Demps.
Kinumpirma mismo ito ni Pelicans owner Gayle Benson.
Ito’y matapos lumabas ang mga usapin hinggil sa pagbunyag umano ni Demps sa kahilingang paglipat ni Pelicans star Anthony Davis sa Los Angeles Lakers.
Ayon kay Benson, agad nilang sisimulan ang paghahanap sa papalit kay demps at pansamantala munang papalitan ito ng kanilang special adviser na si Danny Ferry.
Naitala ng Rain or Shine ang kanilang ikalimang sunod na panalo at ikapito naman sa kanilang kabuuang karera nang talunin nila ang Magnolia Hotshots sa iskor na 75 – 74 sa kanilang laban para sa 2019 PBA Philippine Cup.
Pinahiya ni James Yap ang kanyang dating koponan matapos kumamada ng 18 puntos para sa Rain or Shine.
Hawak na sana ng Magnolia ang kalamangan sa iskor na 74 – 72 ngunit matagumpay na nagawa ni Yap ang kanyang fake move kay Romel Dela Rosa at Raffy Reavis at naipasok ang bola kasama pa ang bonus free throw na siyang nagpanalo sa koponan.
Hinangaan naman ni Rain or Shine Coach Caloy Garcia ang ipinamalas na galing ni Yap.
Photo Credit: PBA
Target ngayon ng Rain or Shine Elasto Painters na masungkit ang kanilang ika-pitong panalo sa kanilang paghaharap laban sa Magnolia Hotshots sa pagpapatuloy ng PBA Philippine Cup ngayong araw sa Araneta Coliseum.
Ayon kay Rain or Shine Coach Caloy Garcia, kailangang maging determinado at hindi dapat magpakampante ang kanilang koponan lalo na’t kung nais nilang manatili sa ibabaw.
Hindi rin dapat nila anya balewalain ang Hotshots kahit wala pa itong naitatalang panalo ngayong season.