SPORTS

Nag aabang na ang maraming boxing fans sa umano’y nakatakdang anunsyo ni retired US boxing champion Floyd Mayweather, Jr.

Kasunod na rin ito ng post ni Mayweather ng video kung saan sinasabi nitong may mahalaga siyang anunsyo ngayong araw na ito o bukas.

May kutob ang boxing experts na ang anunsyo ni Mayweather ay may kinalaman sa pagpayag na nito sa hamon si Filipino Boxing Champion Senador Manny Pacquiao para sa rematch.

Sa ngayon ay tanging like sign lamang ang reaksyon ni Pacman sa kaniya namang sariling personal account kaugnay sa nabanggit na social media post ni Mayweather.

Una nang sinabi ni Mayweather na hindi na ito babalik sa boxing at nakatuon na ang kaniyang atensyon sa kaniyang mga negosyo.

Umaariba pa rin ang koponan ng Rain or Shine Elasto Painters makaraang pataubin nila ang pwersa ng Magnolia Hotshots sa kanilang laban para sa semifinals ng 2019 PBA Philippine Cup kagabi.

Nagwakas ang laban ng dalawang koponan sa iskor na 93 – 80.

Nanguna sa pagkapanalo ng Rain or Shine si Ed Daquioag na nakasikwat ng 19 puntos at tatlong rebounds.

Nag-ambag din ng 16 puntos si Norbert Torres.

Nanguna naman sa panig ng Hotshots sina Ian Salangsang at Robert Herndon na pawang nakapagtala ng tig-13 puntos.

Samantala, naganap kaninang alas 7:00 ng gabi ang harapan naman ng Phoenix Pulse Fuel Masters kontra San Miguel Beermen.

Tuluyan nang naghiwalay ng landas ang koponan ng Los Angeles Lakers at head coach nitong si Luke Walton.

Ito’y dahil sa anim na taong pagkabigong makapasok sa NBA playoffs ng Lakers at pagtala ng pinakamababang 37-45 win-loss record sa kanilang karera ngayong season.

Nagsilbi ng dalawang season si Walton para sa Lakers at naging susi rin sa pagkuha ng koponan kay Lebron James.

Pinasalamatan naman ni Lakers General Manager Rob Pelinka si Walton dahil sa kanyang dedikasyon sa kanyang pinasok na larangan.

Samantala, tinitignan namang papalit kay Walton ang dating coach ng Cleveland Cavaliers na si Tyronn Lue.

Nasungkit ng Rain or Shine ang unang panalo sa PBA Philippine Cup semifinals.

Ito ay makaraang pataubin ng Rain or Shine sa game 1 ang koponan ng Magnolia sa iskor na 84-77.

Nanguna sa panalo ng Rain or Shine si rookie Jayvee Mocon na sumikwat ng 15 puntos habang nag-ambag naman si Gabe Norwood ng 13 puntos.

Ang game 2 sa pagitan ng Elasto Painters at Hotshots ay gaganapin sa the Big Dome bukas.

Buhay na buhay at nag-aalab pa ang pwersa ng Magnolia Hotshots nang masungkit nila ang huling puwesto sa final four ng 2019 PBA Philippine Cup.

Ito’y makaraang pataubin nila ang Barangay Ginebra Gin Kings sa kanilang gitgitang laban sa iskor na 85 – 71.

Nanguna sa Hotshots si Paul Lee na nakapagtala ng 25 puntos at limang rebounds.

Bigo naman si Jeff Chan na maipanalo ang kanilang koponan na nanguna sa kanyang iniambag na 17 puntos sa Ginebra.

Samantala, hindi naman makapaniwala ang coach ng Hotshots na si Chito Victolero sa kanilang pagkakapasok sa semi finals ngunit tiwala siya sa mithiin ng kanyang koponan tungo sa kampeonato.

Mainit ang naging laban sa pagitan ng Los Angeles Clippers at Utah Jazz na nauwi pa sa overtime.

Gayunman nanaig pa rin ang koponan ng Clippers sa iskor na 143 – 137.

Nanguna sa Clippers si Montrezl Harrell na kumamada ng 24 na puntos at pitong rebounds.

Nag-ambag din sa kanilang pagkapanalo si Ivica Zubac na nakapagtala ng 22 puntos at 11 rebounds.

Samantala bigo naman ang 40 puntos na naitala ni Grayson Allen para maipanalo ang Jazz.

Sunod namang makakalaban ng nag-waging Clippers ang Golden State Warriors sa Linggo.

Kinumpirma na ni Dallas Mavericks star Dirk Nowitzki ang kaniyang retirement sa NBA.

Kasunod na rin ito ng panalo ng Mavericks kontra Phoenix Suns.

Naging emosyonal pa si Nowitzki sa kumpirmasyon ng kaniyang NBA rertirement bagama’t una nang nagpahayag na bukas para ma extend pa ang kaniyang NBA career para sa isang season.

Nagpasalamat pa si Nowitzki sa suporta sa kaniya ng kaniyang fans, NBA officials at mga kapwa manlalaro sa kabila ng aniya’y ups and downs sa kaniyang NBA career.

Ang send-off kay Nowitzki ay sinaksihan ng ilang NBA icons na kinabibilangan nina Larry Bird, Charles Barkley, Scottie Pippen at dating German power forward ng Mavs na si Detlef Schrempf.

Nanaig ang koponan ng Los Angeles Lakers kontra sa koponan ng Utah Jazz.

Ito’y sa kanilang laban kanina na nagwakas sa iskor na 113 – 109.

Nanguna sa Lakers si Kentavious Caldwell-Pope na nakapagtala ng 31 puntos, anim na rebounds at anim na assists.

Tumulong din si Javale Mcgee na tumipa naman ng 22 puntos.

Samantala, nanguna naman sa Jazz si Rudy Gobert na nakapagtala ng 21 puntos at sampung rebounds.

Sunod namang makakaharap ng nag-waging Lakers ang Portland Trail Blazers sa Miyerkules.

Nananatiling buhay ang pag-asa ng Charlotte Hornets na makapasok sa playoffs ng NBA.

Ito’y makaraang talunin nila ang koponan ng Detroit Pistons sa iskor na 104 – 91.

Nanguna sa pagkapanalo ng Hornets si Kemba Walker na kumamada ng tatlumpu’t isang (31) puntos at walong (8) rebounds.

Nag-ambag din sa Hornets si Frank Kaminsky na nakapagtala ng dalawampu’t apat (24) na puntos at limang (5) rebounds.

Nanguna naman sa koponan ng Pistons si Ish Smith na nakapagtala ng dalawampung (20) puntos at si Andre Drummond na nagpakitang gilas naman sa kanyang dalawampu’t talong (23) nasikwat na rebounds.

Samantala, ito na ang ikatlong sunod na panalo ng Charlotte Hornets.

—-

Bigo ang Milwaukee Bucks na masungkit ang kanilang pagkapanalo sa kanilang laban kontra Brooklyn Nets.

Sa pangunguna ni D’Angelo Russel ng nag-waging Nets, nagtapos ang kanilang laban sa iskor na 133 – 128.

Kumamada ng 25 puntos si Russel habang 24 na puntos naman ang iniambag ni Caris Levert.

Sa panig naman ng Bucks, bigong maipanalo ng 33 na puntos ni Eric Bledsoe ang kanyang koponan.

Samantala, sunod namang makakasagupa ng Nets ang Indiana Pacers bukas habang makakaharap ng bucks ang Atlanta Hawks sa kaparehong araw.