SPORTS

Isa pang Pilipino ang nag angat ng bandila ng Pilipinas sa larangan ng palakasan.

Wala pang 24 na oras matapos manalo si Pinoy Gymnast Carlos Yulo naiuwi naman ni Nesthy Petecio ang gintong medalya sa 2019 AIBA Women’s Boxing Championship sa FSK sports complex, Ulan – Ude Russia.

Tinalo ni Petecio via split decision ang hometown bet na si Liudmila Vorontsova.

Umabante sa finals si Petecio matapos matalo si Karris Artingstall ng England sa iskor na 4-1 sa semis.

Ikinatuwa ni Association of Boxing Alliances in the Philippines President Ricky Vargas sa pagkapanalo ng Pinay boxer na aniya’y nagsakripisyo para sa nasabing laban.

Wagi ang Barangay Ginebra sa naging laban nito sa San Miguel Beermen kagabi bilang bahagi ng 2019 PBA Governor’s cup.

Nakapagtala ng score na 129 ang Ginebra samantalang 124 naman ang nakuhang score ng San Miguel.

Pinangunahan ni Justin Brownlee ang pagkapanalo ng Ginebra na nakapagtala ng 28 puntos, 14 na rebounds at 14 na assist.

Ito ang unang pagkakataon na natalo ang beermen sa 2019 edition ng Governor’s Cup.

Samantala, susunod na maghaharap ang columbian dyip at road warriors sa Miyerkules, ganap na 4:30 ng hapon at Blackwater at Magnolia naman sa ganap na 7:00 ng gabi.

Nakatakdang humarap kay Pangulong Rodrigo Duterte sa isang courtesy call si Pinoy gymnast Carlos Edriel Yulo sa kaniyang pagbabalik bansa bukas, Oktubre 14.

Ito’y makaraang masungkit ni Yulo ang gold medal sa Men’s Floor Exercise event ng 41st FIG Artistic Gymnasitcs World Championship sa Hans Shcyler Halle, Germany.

Magugunitang dahil sa pagkakasungkit ni Yulo sa gintong medalya, tiyak na ang pagpasok nito bilang pambato ng Pilipinas sa darating na 2020 olympics.

Matapos nito, babalik sa Tokyo sina Yulo gayundin ang coach nito na si Munehiro Kugimiya upang sumailalim muli sa pagsasanay.

Ayon kay Philippine Sports Commission (PSC) chairman William Ramirez, isinasaayos na niya ang courtesy call nila Yulo sa pangulo na target gawin sa Miyerkules, Oktubre 16.

Gumawa ng kasaysayan Filipino gymnast na si Carlos Yulo matapos nitong masungkit ang kauna-unahang Philippine gold medal sa FIG Artistic Gymnastics World Championships.

Pinamunuan ni Yulo ang floor exercise event ng kompetisyon na ginanap sa Hans Martin Schleyer Halle sa Stuttgart, Germany.

Base sa talaan, umiskor si Yulo ng 15.300 para sa men’s floor exercise final, 8.800 naman sa execution at 6.500 sa difficulty.

Ito ang dahilan kung bakit dinaig nito ang mga katunggaling sina Artem Dolgopyat ng Israel at Xiao Ruoteng ng bansang China.

Ang tagumpay na ito ni Yulo ang rason kung bakit dumami ang mga naniniwalang siya ang magwawagi sa nalalapit na Southeast Asian Games.

Matatandaan na ang 19 anyos na si Yulo ang ikalawang Filipino athlete na nakakuha ng puwesto sa Tokyo Olympics para sa taong 2020.

Itinanghal bilang kampeon ng 25^th Siargao International Surfing Cup ang Pilipino surfer na si John Mark “Marama” Tokong.

Naging dikit ang laban sa pagitan ng Pilipinas at Hawaii, ngunit nanaig pa rin ang galing ng Pinoy surfer.

Ayon kay Tokong, naramdaman niya ang pressure habang matiyagang inaantay ang susunod na malaking alon.

Dagdag pa ng atleta, nag isip siya ng positibo habang nagaganap ang countdown at dahil dito ay nakuha niya ang titulo.

Ito na ang ikalawang panalo ng surfer na itinanghal ding kampeon noong 2015.

Ang Siargao International Surfing Cup ay nagsisilbing qualifying series para makapasok sa World Surfing League.

Muling napanalo ng TNT KaTropa ang kanilang laban sa ika-limang pagkakataon sa PBA Governors Cup 2019.

Natalo ng KaTropa ang Northport sa score na 103-100.

Pinangunahan ni KJ McDaniels ang panalo ng KaTropa na nakapagtala ng 38 puntos at 18 rebounds.

Naipasok naman ni Troy Rosario ang 3 points sa nalalabing isang minuto ng quarter na siyang nagpapanalo sa koponan.

Inamin ni TNT coach Bong Ravena na nahirapan sila sa laro laban sa Northport ngunit kinaya naman nila.

Samantala, maglalaban naman ang Columbian dyip at Blackwater sa ganap na 4:30 ng hapon at Magnolia at San Miguel, 7:00 ng gabi bukas.

Itinigil ng isang Chinese state televison network ang pagpapalabas ng mga pre-season games ng NBA sa bansang China.

Ito ay matapos depensahan ni NBA Commisioner Adam Silver ang pahayag ni Houston Rockets General Manager Daryl Morey na suportado nito ang mga protesta sa Hong Kong.

Isa lamang daw freedom of speech ang ginawa ni Morey ayon kay Silver.

Kinondena naman ito ng network na CCTV at sinabing ang anumang pahayag na nakaapekto sa soberanya ng isang bansa ay hindi maituturing na sakop na freedom of speech.

Matatandaang ang CCTV ang main television distributor ng NBA sa bansang China.

Dumating na sa Singapore ang Philippine water polo team para sa pag-eensayo nito para sa nalalapit na 30th Southeast Asian games.

Sasabak ang koponan sa FINA Water polo challengers cup 2019 bilang parte ng kanilang pag-eensayo.

Ito na ang ikalawang beses na lalahok ang Pilipinas sa naturang torneyo.

Makakalaban ng Pilipinas ang Austria, India, Chinese Taipei, Hong Kong at Indonesia.

Isasagawa ang FINA water cup sa OCBC Aquatic Center mula ngayong araw, Oktubre 8 hanggang sa sabado Oktubre 13.

Panalo ang Magnolia Hotshots sa laban kontra sa Alaska Aces sa 2019 PBA Governor’s Cup kagabi.

Nakapagtala ng score na 95 ang Hotshots samantalang 90 points naman ang nakuha ng Aces.

Pinangunahan ni Vic Manue ang panalo ng Hotshots na nakapagtala ng 22 points na sinundan naman ng import na si Frank House na mayroon namang 20 points.

Samantala, ang susunod na laban sa naturang basketball tournament at sa pagitan ng Northport at TNT Ka Tropa na gaganapin sa Oktubre 9, Miyerkules.

Tuloy ang ipinataw na suspensyon ni UAAP season 82 commissioner Jensen Ilagan kay University of Philippines coach Bo Perasol.

Kaugnay ito ng insidente ng pag-atake ni Perasol sa referee na si Jaime Rivano sa naging laban ng UP kontra Ateneo Blue Eagles noong Setyembre 29.

Ayon kay Ilagan, ibinasura ng UAAP ang apela ni Perasol dahil hindi naman aniya ito kailanman humingi ng paumanhin sa pamunuan ng liga o maging kay Rivano.

Dagdag ni Ilagan, maituturing ding “unjustifiable o hindi makatuwiran ang naging hakbang ni Perasol dahil bilang coach dapat aniya itong maging role model sa kanyang mga manlalaro.

Magugunitang otomatikong na eject sa laro si Perasol noong Setyembre 29 dahil sa kanyang inasal pero dinagdagan pa ito ng 2 laro pang suspensyon dahil sa ginawa nitong patuloy na pag-atake sa referee.