Plano umano ng NBA G league na kunin ang serbisyo ni Dating Ateneo High School standout Kai Sotto.
Ito ang ini-ulat ng Forbes.com matapos papirmahin ng kontrata si Filipino-American professional basketball player Jalen Green.
Si Sotto ay kasalukuyang nagsasanay sa The Skill Factory sa Atlanta.
Maliban kay Sotto, interesado rin umano ang NBA G league kina dating Michigan player Isaiah Todd at Texas Power Forward Greg Brown.
Patuloy na nagpapagaling sa kaniyang injury sa tuhod si Swiss Tennis Star Roger Federer.
Sinabi ni Federer na naging magandang pagkakataon ang lockdown para makapagpahinga siya at makapagpagaling ng kaniyang injury.
Nakuha ni Federer ang nasabing knee injury matapos pumasok sa semifinals ng Australian Open kung saan siya tinalo ni Novak Djokovic.
Hindi naitago ni Rafael Nadal ang pagkadismaya dahil sa kaliwa’t kanang lockdowns dulot ng coronavirus pandemic.
Ginawa ni Nadal ang pahayag matapos i-extend ng Spanish Government ang idineklara nitong ‘State of Alarm’ hanggang Mayo 9.
Ayon kay Nadal, hindi siya sanay na lagi lamang siya nananatili sa bahay at kahit konting praktis ay hindi niya magawa.
Samantala, masaya namang ibinalita ni Roger Federer sa kanyang mga tagahanga na patuloy siyang nagpapagaling matapos sumalang sa knee surgery.
Nabenta sa halagang $216,000 US dollars o P11-M ang jersey na isinuot at may pirma ni Michael Jordan bilang bahagi nang tinaguriang 1992 Olympic dream team.
Ipinabatid ng memorabilia company na Robert Edwards auctions na ang winning bid ay ikalawa sa pinakamalaking halaga para sa isang Jordan jersey sunod sa $274,000 US dollars na ibinayad para sa kaniyang 1984 Olympic Singlet.
Unang nabili ang jersey sa halagang $17, 500 US dollars nuong September 1992 sa isang gala charity auction.
Magugunitang kasama ni Jordan sa 1992 US Men’s Olympic basketball team na nagwagi ng gold medal sina hall of famers Magic Johnson, Larry Bird, Scottie Pippen, Karl Malone, Patrick Ewing, Charles Barkley, Clyde Drexler, John Stockton, David Robinson at Chris Mullin.
Gumagaling na ang injury sa paa ni San Miguel Center June Mar Fajardo na natamo niya noong Pebrero ng taong kasalukuyan.
Katunayan, ayon kay Fajardo, inaasahang makakalakad na siya sa susunod na buwan nang walang crutches o saklay.
Matatandaang nagka-injury sa paa si Fajardo habang nagpa-practice kasama ang team noong Pebrero 3 at makaraan ang isang araw ay inoperahan siya.
Inaasahan naman na hindi na siya makakalaro sa buong season ng PBA na pansamantalang itinigil dahil sa coronavirus pandemic.
Muling binuhay ni British boxer Amir Khan ang hamon Kay Senador Manny Pacquiao.
Sinabi ni Khan na hindi siya nawawalan ng pag asang makakaharap pa rin si Pacman sa kabila ng lockdown dahil sa coronavirus disease 2019 (COVID-19).
Ayon pa kay Khan matagal na niyang gustong makaharap si Pacquiao na tila aniya deadma sa kaniyang hamon.
Magugunitang wala si Khan sa iilang boksingerong kinukunsider ni Pacquiao na makaharap tulad nina Floyd Mayweather, Errol Spence, Terrence Crawford at Mikey Garcia.
Seryosong pinag-iisipan ng Filipino Olympic Boxer na si Eumir Marcial ang mga alok sa kanya na lumaban sa professional boxing match.
Ayon kay Marcial, tunay na nakakaakit ang mga malalaking premyo at alok sa kanya para sumabak sa professional fight.
Gayunman, tiniyak pa rin ng Filipino boxer na kanyang tutuparin ang pangako sa lahat ng kapwa Pilipino na lalaban siya sa susunod na Olympic games.
Dagdag ni Marcial, nakasaad naman aniya sa bagong rules na maaari nang lumaban sa Olympics ang mga professional boxers simula pa noon 2016.
Si Marcial ay kuwalipikado na sa Olympics matapos ang kanyang naging laban sa Asia-Oceania Olympic Boxing Qualifying Tournament sa Jordan noong Marso kung saan nakapag-uwi rin siya ng gintong medalya.
Target ni Brooklyn Nets Guard Spencer Dinwiddie ang makapaglaro sa basketball team ng Nigeria para sa Olympics.
Batay sa ulat, sumasailalim na si Dinwiddie sa proseso para makakuha ng Nigerian passport.
Ito ay matapos namang hindi umano maimbitahan si Dinwiddie na makapaglaro para sa team USA.
Una nang nakuwalipika sa Olympics ang basketball team ng nigeria matapos itong manguna sa lahat ng mga African teams sa 2019 FIBA World Cup.
Ang Tokyo Olympics ay ipinagpaliban naman sa 2021 dahil sa coronavirus disease 2019 (COVID-19) pandemic.
Pinag-aaralan ng pamunuan ng NBA ang mga ipatutupad nitong development para sa posibleng pagbabalik ng 2019-2020 season.
Sinabi ni NBA Commissioner Adam Silver, na sa ngayon mino-monitor pa nila ang mga coronavirus disease 2019 (COVID-19) cases sa Estados Unidos at maging ang isasagawang malawakang testing.
Inaantabayanan din aniya nila ang aksyon ng Centers for Disease Control and Prevention upang matuldukan na ang pagkalat pa ng virus.
Giit ni Silver, handa na silang muling maipagpatuloy ang NBA season ngunit hindi aniya masiguro kung kelan ang takdang araw ng pagbabalik ng mga laro ng mga team.
Matatandaang, kinansela ang lahat ng NBA games, matapos magpositibo sa COVID-19 si Utah Jazz Player Rudy Gobert.
Napagkasunduan na ng NBA at National Basketball Players Association na bawasan ng 25% ang sweldo ng lahat ng kanilang manlalaro simula sa Mayo 15.
Dahil sa kasunduan, magkakaroon na ng pa-unti-unting pagbawas sa sahod ng mga NBA players sakaling ganap nang mapagtibay ang force majeure provision ng kanilang collective bargaining agreement.
Ito naman ay sa oras na tuluyan nang makansela ang nalalabi pang season ng NBA bunsod naman ng coronavirus disease 2019 (COVID-19) pandemic.
Batay sa isinasaad ng force majeure provision, may karapatan ang NBA na baguhin o palitan ang nakukuhang sweldo ng mga manlalaro kung magkakaroon ng mga hindi inaasahang pangyayari na makakaapekto at makapagpapatigil sa mga laban.
Magugunitang sinuspinde ang 2019-2020 NBA season noong March 11 matapos magpositibo sa coronavirus ang isa sa kanilang manlalaro at bunsod na rin ng kinahaharap na COVID-19 pandemic.