SPORTS

Napagkasunduan na ng NBA at National Basketball Players Association na bawasan ng 25% ang sweldo ng lahat ng kanilang manlalaro simula sa Mayo 15.

Dahil sa kasunduan, magkakaroon na ng pa-unti-unting pagbawas sa sahod ng mga NBA players sakaling ganap nang mapagtibay ang force majeure provision ng kanilang collective bargaining agreement.

Ito naman ay sa oras na tuluyan nang makansela ang nalalabi pang season ng NBA bunsod naman ng coronavirus disease 2019 (COVID-19) pandemic.

Batay sa isinasaad ng force majeure provision, may karapatan ang NBA na baguhin o palitan ang nakukuhang sweldo ng mga manlalaro kung magkakaroon ng mga hindi inaasahang pangyayari na makakaapekto at makapagpapatigil sa mga laban.

Magugunitang sinuspinde ang 2019-2020 NBA season noong March 11 matapos magpositibo sa coronavirus ang isa sa kanilang manlalaro at bunsod na rin ng kinahaharap na COVID-19 pandemic.

Plano ng Ultimate Fighting Championship (UFC) na magdaos ng dalawang title bouts sa darating na Mayo  9 ngayong taon.

Hindi naman binanggit ni UFC President Dana White kung saan gaganapin ang mga nabanggit na laban.

Matatandaang noong nakaraang linggo ay inanunsiyo ni White na kanselado na ang UFC 249 event sa Abril 18 dahil sa banta ng coronavirus disease  2019 (COVID-19).

Patuloy umano ang panunuyo ni dating WBC welterweight champion Danny Garcia kay Senador Manny Pacquiao para sa isang boxing face off.

Sinabi ni Garcia na nais niyang patunayan sa pamamagitan ng laban kay Pacman na mayruon pa siyang ibubuga para muling mag kampeon sa 147 pound division.

Naniniwala si Garcia na si Pacquiao ang karapat dapat na makasagupa niya sa kaniyang susunod na laban ..bagamat bukas naman siyang makipag tuos sa iba pang malalaking pangalan tulad nina Errol Spence Jr.,  Keith Thurman at Shawn Porter.

Ipinagmalaki pa ni Garcia na siya ang karapat dapat ding makalaban ni Pacman kung nais ng fighting senator ng mas malaking pera.

Si Pacman ay huling lumaban nuong July 2019 kung kailan nagwagi ito kontra kay Thurman via split decision at maagaw ang WBA super welterweight title.

Makakatanggap pa rin ng kanilang buwanang sahod ang top 3×3 players sa bansa kabila ng umiiral na enhanced community quarantine (ECQ).

Kasama sa mga manlalarong ito sina Joshua Munzon, Alvin Pasaol, Dylan Ababou, Troy Rike, Karl Dehesa, Santi Santillan, Franky Johnson, Chris De Chavez, at Jr Alabanza.

Ayon sa chooks-to-go, kahit ma-extend pa ang  ECQ ay babayaran pa rin ang mga nabanggit na atleta.

Nagpapasalamat naman dito sina Pasaol at Santillan dahil magagamit umano nila ito para tulungan ang kani-kanilang pamilya sa probinsya.

Nagretiro na ang veteran PBA player na si Ranidel De Ocampo matapos ang 16 na taong karera sa basketball.

Inanunsyo ito ni De Ocampo sa pamamagitan ng isang podcast at twitter post.

Ayon kay De Ocampo, dati lamang niyang kinahihiligan panoorin ang basketball at hindi inakalang magiging malaking bahagi ito ng kanyang buhay.

Sinabi ni De Ocampo, ngayong retirado na siya ay mabibigyan na siya ng pagkakataon para mas madalas na makapiling ang kanyang pamilya.

Dagdag ni De Ocampo, dahil sa basketball, matagumpay niyang nakamit ang kanyang mga pangarap kung saan marami rin siyang natutunang araw sa buhay.

Nakilala si De Ocampo bilang isa sa best power forwards habang nasa koponan ng TNT, dalawang beses naging finals MVP at Best Player of the Conference sa 2014 PBA Governors Cup.

Naging bahagi rin si De Ocampo ng Philippine National Team at naglaro sa Gilas Pilipinas noong 2013 kung saan nanalo sila ng silver sa FIBA Asia Championship.

Nagsanib puwersa ang PBA legends para tulungan ang kasamahang si Nelson Asaytono na inatake sa puso nitong mahal na araw.

Ayon kay Allan Caidic, pinuno ng PBA legends foundation, ilang mga dating kasamahan nila sa PBA ang nakapag abot na ng tulong sa dating basketbolista.

Sinabi ni Caidic na natutuwa sila dahil umaayos na ang kalagayan nang tinaguring the bull ng PBA nuong 80’s.

Patuloy aniya ang pagdarasal nila sa tuluyang paggaling ni Asaytono.

Karamihan sa mga koponan sa NBA ang nanawagan sa pamunuan ng nabanggit na US basketball league na ipagpaliban muna ang nakatakdang 2020 draft sa darating na Hunyo 25.

Batay sa ulat ng ESPN, iginiit ng mga NBA teams na limitado lamang ang kanilang abilidad para makakalap ng impormasyon sa kanilang mga prospect na manlalaro dahil na rin sa coronavirus disease 2019 (COVID-19) pandemic at kautusan na manatili lamang sa mga tahanan.

Dahil dito, hiniling ng mga koponan na i-usog ang petsa ng NBA draft sa buwan ng Agosto.

Sa ganitong paraan anila, mas magkakaroon ng dagdag na panahon ang NBA ara makumpleto ang pre-draft process tulad ng mga interviews, medical exam at in-person workout.

Una na ring nahinto ang regular season ng NBA noong Marso 11 matapos na magpositibo sa COVID-19 ang isa sa kanilang mga manlalaro.

Kinumpirma ng pamilya ni Liverpool at Scotland Football Legend Kenny Dalglish na positibo ito sa coronavirus disease 2019 (COVID-19).

Sinabi ng pamilya, na sa ngayon naka-confine na sa ospital ang football legend at patuloy itong nilalapatan ng lunas.

Hindi naman makapaniwala ang pamilya ni Dalglish dahil wala naman itong ipinapakitang sintomas ng COVID-19.

Ang kilalang Scotland football player na ito ay nakapaglaro ng halos 500 games at dalawang beses pang naitalaga bilang manager ng kanilang koponan.

Posibleng sa Mayo pa magpalabas ng desisyon ang NBA hinggil sa pagbabalik ng 2019-2020 season matapos na ipatigil ito dahil sa banta ng coronavirus disease 2019 (COVID-19).

Ayon kay NBA Commissioner Adam Silver, kanya nang nakausap ang kanyang mga kasamahan kung saan aminado silang wala pa silang kasiguraduhan sa pagbabalik ng NBA ngayong Abril.

Dagdag ni Silver, hindi rin nila mapagdesisyunan ngayon kung tatapusin ang regular season ng NBA o dumiretso na lamang sa playoffs bunsod na rin ng kawalan ng kasiguraduhan sa kasalukuyang sitwasyon dahil sa COVID-19.

Magugunitang marso a-onse ng ipinatigil ng pamunuan ng NBA ang lahat ng laban sa nabanggit na US basketball league matapos magpositibo sa COVID-19 si Rudy Gobert ng Utah Jazz.

Nakatakda sanang matapos ngayong Abril 15 ang 2019-2020 season ng NBA.