Hindi na matutuloy ang Under-20 World Cup sa Indonesia at Under-17 tournament sa Peru sa susunod na taon.
Ito ang inaunsiyo ng FIFA sa gitna ng banta ng COVID-19 sa iba’t ibang panig ng mundo.
Ayon sa governing body, hangga’t nagpapatuloy ang COVID-19 pandemic ay mahihirapan silang isagawa ang mga international sporting events bunsod na rin ng mga paghihigpit sa mga biyahe o flights.
Target naman ng FIFA na idaos ang mga nabanggit na torneo sa taong 2023.
Pinatawan ng 50,000 dolyar na multa si Houston Rockets star James Harden.
Ito’y matapos ang paglabag sa COVID-19 protocols dahil sa kumalat na video na wala itong suot na face mask habang nasa isang strip club sa Houston.
Itinanggi naman ni Harden na isang strip club ang kaniyang pinuntahan at halip ay isang uri ng kainan lamang.
Nagdagdag ng pondo ang Tokyo Olympics organizer para sa nasabing torneo.
Dahil dito aabot sa 15.9 billion dollars ang inilaan nang pondo.
Napagdesisyunan ang naturang halaga matapos maantala ang torneo at magkaroon ng karagdagang gastos.
Dinagdagan ng mga organizers ang kanilang pondo para maipatupad ng maayos ang mga health protocols laban sa COVID-19.
Itinanghal na bagong interim WBC bantamweight champion si Filipino boxer Reymart Gaballo matapos manalo laban kay Emmanuel Rodriguez ng Puerto Rico.
Sa pamamagitan ng split decision, idineklarang panalo ang 24-anyos na si Gaballo sa nasabing laban sa Mohegan Sun Arena sa Uncasville, Connecticut, USA.
Ang mga judges ay nagbigay ng 115-113 at 116-112 pabor kay Gaballo habang pumabor ang isang judge na si David Sutherland kay Rodriguez na nagbigay ng score na 118-110.
Dahil sa nasabing panalo, si Gaballo ay nakapagtala na ng 24 na panalo at wala pang talo.
Si Gaballo ang pumalit kay Nonito Donaire, Jr. na una nang nagpositibo sa coronavirus disease 2019 (COVID-19) — ilang araw bago ang laban.
Makikipagtulungan ang Philippine Sports Commission (PSC) sa iba pang ahensya ng gobyerno para makabili ng bakuna kontra COVID-19 para sa mga National team athletes, lalo na ang mga sasabak sa kani-kanilang laro sa 2021.
Ayon kay PSC Chairman William “Butch” Ramirez, umaasa siyang mababakunahan ang mga atleta sa Enero ng susunod na taon na kailangan nila para sa mga international sporting events, kabilang ang Tokyo Olympics.
Nais din ni Ramirez na maturukan ng vaccine ang mga sasalang sa Olympic qualifiers, Asian Indoor and Martial Arts Games o AIMAG sa Thailand, at maging sa 2021 Southeast Asian Games sa Vietnam sa November 2021.
Tila atat nang sumabak muli si Utah Jazz guard Jordan Clarkson sa susunod na season ng NBA.
Katunayan, ayon kay Clarkson, handa na sila sa pagbubukas ng bagong season ng liga.
Hindi rin nangangamba ang Filipino-American player sa maikling preparasyon ng kanilang koponan at naniniwala siyang hindi ito makakaapekto sa performance nila sa hard court.
Magiging isang full medal event na ang eSports sa 2022 Asian Games.
Sinasabing ito ang napagdesisyunan sa general assembly ng Olympic Council of Asia kung saan kasama na ang eSports at breakdancing sa programa sa Games na gaganapin sa Septembre 2022 sa Hangzhou, China.
Una rito, inaprubahan na rin ang breakdancing, skateboarding, surfing at sport climbing para sa Paris 2024 Olympics.
Matatandaang naging sikat na demonstration event ang eSports sa 2018 Asian Games noong Jakarta habang ginawa naman itong isang medal sport sa Southeast Asian Games sa Pilipinas noong nakaraang taon.
Nakahanda na si Eumir Marcial para sa kanyang kauna-unahang pressional fight sa December 17.
Ayon kay marcial, wala nang nagiging problema sa kanyang pagsasanay sa ilalim ng tanyag na boxing trainer na si Freddie Roach.
Pagmamalaki pa ni Marcial, kanyang pinanunuod ang mga nagdaang laban ni Andrew Whitfield para aniya’y makakuha na kakaunting technique para siguradong matalo, oras na siya na ang tumuntong sa ring.
Sa unang professional fight ni Marcial, makakatunggali nito si Whitfield ng Estados Unidos na gaganapin naman sa microsoft theater sa Los Angeles.
Humakot ng 2 tanso si Filipino gymnast Carlos Yulo sa all-Japan gymnastics championships bilang bahagi ng kanyang paghahanda para sa Tokyo olympics sa susunod na taon.
Ito’y makaraang humataw ang 20-anyos na gymnast sa floor exercises at vault sa kompetisyon na ginanap sa Takasaki arena.
Sinasabing umiskor si Yulo ng 14.866 sa vault kasunod ng kanyang mga katunggali na sina Hidenobu Yonekura (15.133) at Keisuke Asato (15.083).
Napanatili ng world heavyweight champion na si Anthony Joshua ang kaniyang korona sa boksing matapos itumba ang katunggali niyang Bulgarian boxer na si Kubrat Pulev.
Sa kanilang paghaharap sa Wembley Arena sa London, tinapos ni Joshua ang laban nila ni Pulev sa parisukat na lona sa ika-siyam na round.
Dahil sa nagpapatuloy na COVID-19 pandemic, nananatiling limitado pa rin ang mga nanuod sa naturang laban na nasa 1,000 lamang.
Kaugnay nito, nakapagtala na ng 24 na panalo si Joshua sa kaniyang kartada mula sa kabuuang 25 laban na hinarap nito.