Nanaig ang Golden State Warriors kontra Portland trail blazers.
Sa iskor na 137-122 namayagpag ang 62 puntos ni Stephen Curry.
Dahil dito si Curry ang kauna-unahang manlalaro kung saan sa loob ng mahigit 15 taon ay nagtala ng 62 o mahigit pang puntos sa loob ng 36 na minuto pababa.
Huling nakagawa nito ay si Kobe Bryant noong 2005 sa laban nila sa Mavericks.
Nagtamo ng injury sa kanyang kanang kamay ang Filipino basketball player na si Thirdy Ravena sa gitna ng laban sa pagitan ng San-En Neophoenix at Rockers Shibuya.
Ayon sa San-En Neophoenix, ang koponan kung saan Asian import si Ravena, na-diagnose ang manlalaro ng oblique fracture sa isang daliri nito sa kanang kamay.
Dahil dito, isasailalim anila si Ravena sa mas masusing pagsusuri gayundin ng kinakailangang gamutan at rehabilitation.
Tiniyak naman ng koponan na kanilang ipalalabas ang update sa kalagayan ni Ravena oras na matapos na ang detailed examination sa manlalaro.
Ito na ang ikalawang beses na hindi makadadalo si Ravena sa laban ng San-En Neophoenix sa B. League sa Japan matapos siyang magpositibo sa COVID-19 noong 2020.
Nasungkit ng Washington Wizards ang kauna-unahan nitong panalo sa kasalukuyang NBA season matapos ilampaso ang Minnesota Timberwolves sa score na 130-109.
Kumana si Bradley Beal ng 31 points para sa Wizards habang nagdagdag si Thomas Bryant ng 18 points.
Samantala, nakapagtala rin si Jerome Robinson ng 13 points para sa para sa Washington.
Muling inilampaso ng Los Angeles Lakers ang San Antonio Spurs sa sarili nitong bakuran sa score na 109-103.
Humakot si Anthony Davis ng 34 points para sa Lakers habang nag-ambag naman si Lebron James ng 26 points.
Matatandaang pinadapa rin ng LA ang Spurs sa una nilang laro noong Miyerkules na score na 121-107 sa home court pa rin ng San Antonio.
Magiging requirement na para sa mga manlalaro ng National Basketball Association (NBA) ang pagsusuot ng tracking devices sa lahat ng team buses at eroplano upang mapigilan ang pagkalat ng coronavirus.
Ayon sa ulat ng ESPN, ipatutupad na ang sensor program simula ika-7 ng Enero kung saan saklaw nito ang lahat ng mga atleta, team officials, at mga coaches.
Sinasabing layunin nitong matukoy ang mga club members na kailangang i-quarantine kapag may isang miyembro ng koponan na nagpositibo sa COVID-19.
Sa pamamagitan ng sensor na suot ng team members, malalaman kung nakalapit ito sa iba pang may sensor sa layong 6 na talampakan.
Samantala, hindi naman oobligahing magsuot ng sensor ang mga manlalaro kung nasa loob ito ng team hotel sa kanilang road games o kaya’y nasa mismong laro ng koponan.
Nakauwi na ng bansa ang 234 na mga Pilipino mula Gitnang Silangan na apektado ng COVID-19 pandemic.
Ayon kay Foreign Affairs Undersecretary Sarah Lou Arriola, ang mga Pinoy na galing Dubai, Abu Dhabi at Bahrain ay dumating sa Maynila sakay ng isang chartered flight ng Philippine Airlines.
Sinasabing pinondohan ang pagpapauwi sa mga Pinoy mula Middle East sa ilalim ng Assistance to Nationals o ATN Fund ng Department of Foreign Affairs (DFA).
Agad namang dinala sa ospital ang ilang repatriates na nangangailangan ng atensiyong medikal.
Pinadapa ng Philadelphia 76ers ang wala pang talo na Orlando Magic sa score na 116-92 sa sarili nitong bakuran sa Florida.
Kumamada si Joel Embiid ng 21 points habang nagdagdag si Seth Curry ng 21 points para sa Sixers.
Samantala, si Nikola Vucevic naman ang nanguna sa Magic sa pamamagitan ng kanyang 19 points pero hindi pa rin nakasapat iyon para ipanalo ang kanilang koponan.
Itinuturing ni Los Angeles Lakers star Lebron James na birthday gift ang kanilang panalo kontra San Antonio Spurs sa score na 121-107.
Ito na ang ikatlong panalo ng koponan sa naganap na limang games nito.
Mababatid na namayagpang sa naturang laro si James na nakasungkit ng 26 points kabilang ang dalawang mahahalagang mga puntos para tuluyang matalo ang kalabang koponan.
Matapos nito, nakatakda muling magtuos ang dalawang koponan para sa NBA New Year’s game.
Interesado si Retired 6 Division Champion Oscar Dela Hoya na makasagupa sa ikalawang pagkakataon si Floyd Mayweather, Jr. sakaling magbalik ito sa boxing ring.
Sinabi ni Dela Hoya na nais niyang lumaban sa isang tunay na boxing match at hindi exhibition lamang.
Maliban kay Floyd, Jr. ipinabatid ni Dela Hoya na pag iisipan pa niya ang posibilidad na harapin ang kababayang si Saul Canelo Alvarez.
Huling nagsagupa sa ibabaw ng ring sina Dela Hoya at Mayweather noong 2007 kung saan nagwagi ang Amerikano sa pamamagitan ng split decision para makuha ang WBC World Junior Middleweight title.
2017 nang mag retiro si Mayweather matapos pilayan si mixed martial arts superstar Conor Mcgregor.
Nais pa ring ipagpatuloy ni dating five-division champion Floyd Mayweather Jr. ang pagsabak sa laban, matapos ang nakatakda nitong exhibition fight kontra kay Logan Paul.
Ayon kay Fanmio Founder and CEO Solomon Engel, pangunahing promoter ng exhibition fight ni Mayweather, nakatitiyak siyang masusundan pa ang laban ang natutang laban ng dating five division champion.
Ani Engel, bagama’t tanging si Mayweather lamang ang makapagpapasiya sa kanyang hinaharap, naniniwala siyang tuloy-tuloy ang pakikipag-ugnayan sa kanya ng boksingero para sa mga susunod nitong laban.
2017 nang magretiro si Mayweather habang hawak ang record na 50 – 0 kung saan 27 doon ang knockout.
Nakatakda ang exhibition fight sa pagitan nina Mayweather at Paul sa Pebrero 20 ng susunod na taon.