SPORTS

Duda ang kampo ni dating world boxing champion Nonito Donaire Jr. sa naging resulta ng COVID-19 test na isinagawa sa kanya matapos siyang magpositibo sa virus.

Lalaban sana si Donaire sa December 19 kontra kay Puerto Rican Emmanuel Rodriguez sa Connecticut para sa bakanteng WBC bantamweight title pero dahil nagpositibo nga siya sa sakit ay napilitan itong umatras sa bakbakan.

Sa isang post sa Facebook ng misis ni Donaire na si Rachel, binanggit na nakapagtatakang nagpositibo ang kanyang mister sa sakit habang siya at ang iba pang miyembro ng pamilya at team ay nagnegatibo naman sa test.

Samantala, wala pang opisyal na pahayag ang promoter ng boxing card ukol sa naturang isyu.

Kinontra ni dating olympian at Champion Taekwondo Jin Monsour Del Rosario ang panukalang pagbawalan ang mga menor de edad na lumahok sa full-contact sports.

Ang hakbang ay ginawa ni Del Rosario matapos itulak sa kongreso ang house bill 1526 nina Ako Bicol Party-List Representatives Alfredo Garbin Jr. at Elizaldy Co.

Paliwanag ni Del Rosario, hindi siya pabor sa bill nina Garbin at Co dahil masisira lamang ang grassroots program ng iba’t ibang combat sports sa bansa.

Si Del Rosario ay nagsimulang sumabak sa sports noong 9 na taong gulang pa lamang at naging 2-time gold medalist sa Southeast Asian Games at humakot din ng tanso sa 1984 world championships at 1986 Asian Games sa Korea.

Maaari nang magbalik-training si Thirdy Ravena.

Ito’y ayon sa Japan B. League club makaraang magnegatibo sa COVID-19 ang Pinoy player na kasalukuyang naglalaro sa panig ng San-En Neophoenix.

Dahil dito, makakasama na ni Ravena ang kanyang mga teammates sa Hokkaido ngayong weekend.

Matatandaang hindi nakalaro ng ilang linggo si Ravena matapos tamaan ng coronavirus.

Hindi na matutuloy si dating World Champion Nonito “The Filipino Flash” Donaire sa nalalapit nitong title match matapos magpositibo sa COVID-19.

Umurong ang 38 anyos na si Donaire sa nakatakda nitong WBC bantamweight title kontra kay Emmanuel Rodriguez matapos na magpositibo sa virus.

Ang naturang laban ang inaabangan pa naman sanang main event ng card ng Showtime sa Disyembre 19 sa Mohegan Sun Arena sa Uncasville, Connecticut.

Muling nakatanggap ng pagkilala sa Guinness Book of World Records ang four time World Cup Bowling Champion na si Rafael “Paeng” Nepomuceno.

Ito’y matapos mahigitan ang sariling record bilang winningest tenpin bowler kung saan kasalukuyang merong 133 career titles.

Iniaalay naman umano ni Paeng ang naturang parangal sa kaniyang mga kababayan at sa iba pang aspiring athletes.

Dagdag pa nito, wala na aniya siyang mahihiling pa sa halos limang dekada na niyang larangan sa bowling.

Halos abot-kamay na ng Barangay Ginebra ang korona sa PBA All-Filipino Cup.

Ito’y makaraang padapain ng Gin Kings ang Talk ‘N Text sa score na 98-88 sa Game 4 ng Finals na ginanap sa AUF Gym sa Angeles City, Pampanga.

Si LA Tenorio ang bumuhat sa Ginebra nang kumamada ito ng 22 points habang nagdagdag din si Japeth Aguilar ng 22 points at nine rebounds at 16 points naman ang naging ambag ni Stanley Pringle.

Nakadagdag naman sa problema ng Tropang Giga ang pagkawala ni Jayson Castro matapos magka-injury sa tuhod sa third quarter.

Suspendido ang pagpapatupad ng ramdom marijuana test ng NBA sa kanilang mga manlalaro para kanilang 2020-21 season.

Ayon kay NBA Spokesman Mike Bass, ito ang kanilang napagkasunduan kasama ang National Basketball Players Association (NBPA).

Aniya, napagpasiyahan ito bunsod na rin ng mga posibleng hindi inaasahang sitwasyon na maidulot ng pandemic.

Aniya, mas tututukan na lamang nila ang mga programa para sa mga manlalaro laban sa mga performance-enhancing products at drug abuse.

Handa na ang Philippine Sports Commission (PSC) na dalhin sa isang gym na may bubble set up sa Calamba City sa Laguna ang mga Olympic aspirants na nasa bansa.

Ayon kay PSC Chairman William “Butch” Ramirez, ito’y makaraang magkasundo sila ng Inspire Academy upang mapabalik ensayo na ang mga manlalarong nais makilahok sa 2021 Tokyo Olympics.

Hinihintay na lamang aniya nila ngayon ang pagsang-ayon dito Ng Inter-Agency Task Force on the Management of Emerging Infectious Diseases (IATF – EID).

Magugunitang nabalam ang pagsasanay ng mga atleta noong Marso matapos magpatupad ng lockdown ang pamahalaan bilang pag-iingat na rin sa COVID-19 pandemic.

Hindi madali para kay Los Angeles Lakers Head Coach Frank Vogel na idepensa ang championship crown  ngayong papasok na bagong season ng NBA.

Sinabi ni Vogel, na maliban kasi sa mahabang inilaro ng kanilang koponan, marami narin aniyang mga team ang nagpalakas habang nasa off season ang liga.

Aminado naman si Lakers General Manager Rob Pelinka na isa sa pinakamahirap na tungkulin sa larangan ng palakasan, ay ang kampanya upang depensahan ang korona.

Pero kumpiyansa si Coach Vogel na mas lamado parin ang kanilang team dahil hawak parin nila ang pinakamalalakas na player na sina NBA superstars Lebron James at Anthony Davis.

Marami man aniya ang nawalang manlalaro sa Lakers, marami naman aniyang pumalit na tigasin tulad nina veteran players Dennis Schröder, Montrezl Harrell, Wesley Matthews at Marc Gasol.

Pagmamalaki ni Vogel, sa lineup na mayroon sila ngayon, tiyak aniyang mas lalakas pa ang kanilang koponan bilang isang defensive team.