SPORTS

Hindi na nasungkit ng pambato ng Pilipinas sa Women’s Street Skateboarding sa Tokyo Olympics na si Margielyn Didal.

Ito’y makaraang hindi magawa ni Didal ang ilang tricks nito.

Dahil dito, nalagay sa ika-pitong pwesto ang ating pambato mula sa walong manlalaro sa Street Skateboarding.

Samantala, itinanghal namang kampeon sa naturang laro ang 13 taong gulang na pambato ng Japan na si Momiji Nishiya na may 15.26 points.

Habang si Rayssa Leal naman ng Brazil ang nakakuha ng silver na may 14.64 points.

At si Funa Nakayama na mula rin sa Japan ang nakasungkit ng bronze matapos na makapagtala ng 14.49 points.

PINADAPA ng Magnolia Hotshots ang Barangay Ginebra sa score na 89-79 sa unang Manila Clasico ngayong PBA Season.

Sa isa pang laro, hindi nakaporma sa San Miguel Beermen ang NorthPort Batang Pier sa score na 88-86 sa kanilang laro na ginanap sa Ynares Sports Arena sa Pasig City.

Samantala, inilampaso naman ng NLEX Road Warriors ang TerraFirma Dyip, 108-94, sa nasabi pa ring venue.

Bigo si Filipino shooter Jayson Valdez sa men’s 10-meter rifle competition sa Tokyo Olympics.

Ito’y makaraang malaglag si Valdez sa ika-44 na puwesto mula sa 47 na kalahok sa event.

Walo lamang mula sa nasabing bilang ang nakaabante sa finals.

Kinubra ni Pinay Boxer Nesthy Petecio ang una niyang panalo upang umabante sa round of 16 sa 2020 Tokyo Olympics.

Tinalo ni Petecio si Marcelat Sakobi Matshu ng Democratic Republic of Congo sa score na 5 – 0 sa opening round ng Women’s Featherweight Division sa Tokyo, Japan kanina.

Isa si Petecio sa apat na Filipino Boxer na naghahangad na makasungkit ng gintong medalya sa Olympics.

Ang Pinay Boxer ay 3-time silver medalist sa Southeast Asian Games, bago sumikwat ng gold noong 2019. —sa panulat ni Drew Nacino

Nakahugot na ng buena manong panalo sa 2021 PBA Philippine Cup ang Defending Champion Barangay Ginebra Gin Kings.

Pinatumba ng Gin Kings ang Blackwater Elite sa score na 96-81 sa kanilang paghaharap sa Ynares Sports Arena sa Pasig City, kagabi.

Nagpakawala ng 19 points si Stanley Pringle habang nag-ambag ng 17 points si L.A. Tenorio para sa Barangay Ginebra.

Kasalukuyang nakapako ang Ginebra sa 8^th spot sa elimintation round habang hawak ang kartadang 1 – 1.

Ito naman ang ikatlong sunod na talo ng wala pa ring kapana-panalong Elites na nangungulelat sa elimination. —sa panulat ni Drew Nacino

Ipinagpaliban ng FIBA Board ang nakatakdang FIBA Asia Cup sa Indonesia hanggang sa Hulyo sa susunod na taon dahil sa pagtaas ng kaso ng COVID-19.

Ang naturang desisyon ay isinagawa matapos magpulong ng FIBA Asia Board sa Lebanon dahil sa pangamba sa pananalasa ng COVID-19 sa Indonesian Capital.

Nakatakda sana magsimula ang pinakalamaking torneo sa Asya sa darating na 16 hanggang 28 ng Agosto sa Jakarta, Indonesia.

Sumulat na si FIBA Executive Director For Asia Hagop Khajirian sa Samahang Basketbol ng Pilipinas (SBP) upang ipaalam ang bagong schedule ng torneo, na kasunod na ng FIBA Basketball World Cup Asia Qualifiers.

Matapos ang 50 taon, nakalasap muli ng tagumpay ang Milwaukee Bucks makaraang talunin ang Phoenix Suns at hirangin bilang NBA World Champions.

Sa iskor na 105-98 tinapos ng Bucks ang finals series sa game 6 kontra Suns at nagtapos ang serye sa 4-2.

First quarter pa lamang ay hindi na hinayaan ng Bucks na makalamang ang kalaban.

Huling nagkampeon ang Bucks noon pang 1971 sa panahon ng basketball legend na si Kareem Abdul-Jabbar at Oscar Robertson.

Itinuturing na pinakahanda at pinakamalakas ang delegado ng bansa sa idaraos ng Olympics sa Tokyo, Japan ngayong taon simula nang sumali ang bansa sa Olympics noong 1924 sa Paris.

Dahil dito, tiwala si Philippine Sports Commission Chair William Butch Ramirez na magpapakitang gilas ang 19 na Pinoy athletes tungo sa paghablot sa pinakaaasam na gintong medalya.

Ipinabatid ni Ramirez na nasa P279 milyon na ang nagastos nila sa training ng pinoy athletes na sasabak sa Tokyo Olympics kaya’t normal lamang din aniyang umaasa ng gintong medalya ang gobyerno mula sa Tokyo olympics.

Inaasahan na aniya ang return on investment at nakakadismaya talaga kung walang makukuha ginto o tanso ang Pinoy athletes na kasali sa olympics ngayong taon.

Ipinagpaliban ang lahat ng naka-schedule na laro ng Perlas Spikers sa Premier Volleyball League Open Conference.

Ito ay matapos na magpositibo ang isa sa kanilang mga miyembro.

Inanunsyo ng PVL na ang nagpositibong indibidwal ay nasa isolation facility na.

Habang ang iba namang mga miyembro ay naka-quarantine na at nakatakdang sumailalim sa RT-PCR Test. —sa panulat ni Hyacinth Ludivico

Napasakamay ni Philippine tennis number 1 Alex Eala ang kampeonato sa singles division ng JA Milan 61 Trofeo Bongfilio.

Kasunod na rin ito nang unang panalo ni Eala sa tennis doubles kasama si Madison Sieg ng Amerika.

Pinadapa ni Eala si Nikola Bartunkova ng Czech Republic sa score na 6-3, 6-3 sa nasabing kumpetisyon na ginawa sa campo tribuna tennis club Milano Alberto Bonacossa.