SPORTS

Ilang hakbang na lamang ang NLEX road warriors sa quarterfinals ng PBA Philippine cup.

Ito’y makaraang patalsikin na sa elemination round ng road warriors ang walang panalong blackwater bossing sa kanilang game kagabi.

Sinagasaan ng NLEX blackwater sa score na 90-73 sa kanilang paghaharap sa Don Honorio Ventura University Gym sa Bacolor, Pampanga.

Binasag ng road warriors ang kanilang three-game losing streak habang umabante sila sa ika-6 na pwesto sa kartadang 5-5.

Nagpakawala naman ng 16 points si JR Quiñahan para sa NLEX habang kumamada ng 17 points si Simon Enciso para sa bossing.—sa panulat ni Drew Nacino

Nangunguna na si Asian Games Gold Medalist Dennis Orcollo at kapwa Filipino Cue-Artist Carlo Biado sa 2021 US Open Pool Championship sa Atlantic City, New Jersey.

Pinataob ni Orcollo, ang kanyang dalawang naunang kalaban na sina Miguel Medieta ng Argentina, sa score na 9-0 at Paul Spaanstra ng USA, sa score na 9-2.

Naungusan naman ni Biado, dating world champion, si Steve Fleming ng US, sa score na 9-2 at tinambakan si Vincent Beauvirage ng Canada, sa score na 9-3.

Gayunman, sunod na babanggain ng dalawang Pinoy ang mga alamat ng bilyar na sina Corey Deuel na haharapin ni Orcollo, at dating world number 1 Mika Immonen na sasagupain ni Biado.

Samantala, umabante na rin sa una at ikalawang round ang ilan pang Pinoy cue artists na sina Jeff De Luna, Roberto Gomez at Warren Kiamco. —sa panulat ni Drew Nacino

Magbabanggaan na ang Phoenix Super LPG fuel masters at Barangay Ginebra Gin kings sa kanilang crucial match sa gitna ng nalalapit na pagtatapos ng elimination rounds ng 2021 PBA Philippine Cup.

Nasa 8^th spot ang fuel masters hawak ang kartadang 4-5 habang nasa 9^th spot ang defending champion gin kings hawak ang standing na 3-5.

Walong team lamang ang papasok sa quarterfinal round at kapwa dapat makasungkit ng karagdagang panalo ang dalawang koponan upang maka-abante.

Magsasalpukan ang Phoenix at Ginebra sa Don Honorio Ventura State University gym sa Bacolor, Pampanga, mamayang ala-6 ng gabi.—sa panulat ni Drew Nacino

Magbabalik PBA na si Northport batang pier head Coach Pido Jarencio matapos ang tatlong linggong quarantine dahil sa COVID-19.

Ayon kay Coach Pido, inaasahan na niya ang magandang welcome mamaya sa kanilang pagharap sa number 1 team na TNT Tropang Giga.

Aminado si Jarencio na mabigat na kalaban ang TNT pero kung magtuloy-tuloy lang magandang laro ng batang pier ay mas lalakas ang tsansa nilang manalo.

Ito ang kanyang unang game simula nang ma-quarantine.

Nagsilbi namang coach si Team Manager Bonnie Tan habang wala si Jarencio.

Samantala, aarangkada ang sagupaan ng Northport at TNT sa Don Honorio Ventura State University gym sa Bacolor, Pampanga, mamayang alas-3 ng hapon.—sa panulat ni Drew Nacino

Sumadsad sa top 6ng ATP rankings ang Spanish Tennis Superstar na si Rafael Nadal.

Hindi nakapaglaro si Nadal simula nang matalo kay Novak Djokovic ng Serbia sa French Open Semi-Finals dahil sa foot injury kaya’t nabigong makapag-ipon ng overall points upang umusad sa ATP rankings.

Napanatili naman ni Djokovic ang number one spot sa kabila ng kanyang pagkatalo sa 2nd rank na si Daniil Medvedev ng Russia sa US open final, noong linggo.

Samantala, pasok sa ikatlong pwesto si Stefanos Tsitsipas ng Greece; Alexander Zverev ng Germany sa 4th spot; Andrey Rublev ng Russia sa 5th spot;

Matteo Berrettini ng Italy sa 7th spot; Dominic Thiem ng Austria sa 8th spot; Roger Federer ng Switzerland sa 9th spot at Casper Ruud ng Norway sa top 10. —sa panulat ni Drew Nacino

Kinubra ni Pinoy Olympian E.J. Obiena ang 4th place sa Istaf Berlin Tournament sa Germany, isang araw matapos bumasag ng  Asian record sa pole vaulting.

Kinailangan ni Obiena ng tatlong attempts upang malampasan ang 5.81-meter mark, na kanyang huling matagumpay na clearance sa naturang event.

Lumundag ang Filipino athlete ng 5.86 meters bago tumuloy sa 5.91 meters pero kinapos ito sa nasabing lebel.

Pasok naman sa top 3 ang mga Amerikanong sina Sam Kendricks, Christopher Nilsen at Kc Lightfoot.—sa panulat ni Drew Nacino

Pinadapa ng Rain or Shine ang San Miguel Beermen sa score na 95-93 sa kanilang bakbakan sa 2021 PBA Philippine Cup sa Pampanga.

Nabaon ng 13 puntos ang Elasto Painters pero bumangon ito sa 4th quarter kaya’t nasungkit ang panalo.

Si Rookie Santi Santillan ang nanguna sa Rain or Shine sa pamamagitan ng kanyang 21 points.

Sa isa pang laro, inilampaso naman ng TNT Tropang GIGA ang Barangay Ginebra sa score na 88-67.

Inihayag ng Philippine Sports Commission (PSC) na nag-donate ito ng equipment sa Gymnastics Academy of Cebu (GAC).

Ayon kay PSC Oversight Commissioner for Visayas Ramon Fernandez, balak nilang magpadala pa ng tulong sa academy sa oras na luwagan na ng gobyerno ang quarantine restrictions.

Kabilang sa mga ipinamahagi ng PSC ay ang 23 rubber landing mats at iba pang equipment na magagamit ng eskwelahan sa kanilang grassroots sports development.