SPORTS

Inatasan na ng WBO ang kampo nina Bantamweight Champion John Riel Casimero at Mandatory Challenger Paul Butler na plantsahin na ang negosasyon para sa kanilang sagupaan sa loob ng dalawampung araw.

Magugunitang tinalo ni Casimero via split-decision si Guillermo Rigondeaux noong Agosto pero naging boring ang laban dahil walang ginawa ang Cuban fighter kundi umilag at tumakbo sa loob ng 12 rounds.

Target sanang harapin ni Quadro alas ang kapwa nito pinoy na si nonito donaire sa december 11 pero inatasan din ng WBO ang “The Filipino Flash” na harapin naman kababayang si Undefeated Fighter Reymart Gaballo.

Huling namang lumaban si Butler kay Willibaldo Garcia noong hunyo kung saan nanalo ito via split decision.

Una sanang haharapin ni Butler si Joseph Agbeko subalit umatras ito sa laban dahil sa problema sa visa.—sa panulat ni Drew Nacino

Humihingi ng P450 -M na dagdag budget ang Philippine Olympic Committee (POC).

Sa kanilang isinumiteng sulat sa kongreso at kay PSC chairman William Butch Ramirez, sinabi ni POC President Abraham Bambol Tolentino na P5-M ang inilaan nila sa winter olympics, P150-M para sa 6th asian indoor and martial arts games at P10-M para sa World Games.

Samantala, P270-M ang inilaan ng POC sa 19th asian games at P15-M naman para sa 5th asian youth games.

Binigyang-diin ni Tolentino na kailangang pondohan ang training ng Pinoy athletes para makapagbigay ng inspirasyon sa mga batang Pilipino na makiisa sa sports training and development.

Nadagit ng Meralco bolts ang 2^nd spot at twice-to-beat advantage sa 2021 PBA Philippine Cup Quarterfinals matapos malusutan ang NLEX road warriors, sa score na 104-101 sa crucial game kahapon.

Liyamado ang bolts ng mahigit 20 points subalit nahabol ito ng nlex sa kanilang paghaharap sa Don Honorio Ventura State University Gym sa Bacolor, Pampanga.

Nanguna sa panalo ng bolts sina Allein Maliksi na nagpaulan ng 22 points at Alvin Pasaol na sumalaksak ng 17 points upang ipako ang kartadang 8-2.

Haharapin naman ng Meralco sa kanilang huling laban sa eliminations ang Barangay Ginebra Gin Kings, mamaya. —sa panulat ni Drew Nacino

Ipinag-utos na ng World Boxing Council o WBC ang mandatory defense para sa kanilang reigning world title holders.

Sa bantamweight division, dedepensahan ni WBC World Champion Nonito Donaire Jr. ang kanyang titulo laban sa kapwa pinoy na si WBC Interim Bantamweight champion Reymart Gaballo.

Nasungkit ng 38  anyos na si Donaire ang belt matapos talunin si Nordine Oubaali via 4th round knockout noong mayo.

Nasikwat naman ni gaballo ang kanyang korona sa kontrobersyal na split decision kontra Emmanuel Rodriguez noong Disyembre.

Samantala, makikipag-sagupaan naman ang isa pang Filipino featherweight prospect na si Mark Magsayo bilang mandatory challenger kay WBC World Featherweight Champion Gary Russell Junior.

Huling lumaban si magsayo sa undercard ng bakbakang manny Pacquiao at Yordenis Ugas noong isang buwan kung saan kanyang pinatumba sa 10^th round knockout si Julio Ceja.—sa panulat ni Drew Nacino

Handa na si IBF World Super Flyweight Champion Jerwin Ancajas na umakyat sa 118lbs upang hamunin sina WBC World Bantamweight Champion Nonito Donaire Junior at WBO World Bantamweight Champion John Riel Casimero.

Aminado si Ancajas na matagal na umano niyang nais na sumampa ng dibisyon.

Taong 2018 nang idepensa nito ang kanyang korona laban sa kapwa Filipino na si Jonas Sultan at inihayag na handa ng maging challenger sa Bantamweight kung bibigyan ng pagkakataon.

Anya, hinintay lamang niya ang basbas ng kanyang coach na si Joven Jimenez.

Ayon kay Coach Jimenez, handa naman nilang harapin kahit sino sa dalawa kapag binigyan sila ng notice.

Ang mahalaga anya ay nasa kondisyon si Ancajas at habang may pagkakataon ay hindi nila ito palalampasin. —sa panulat ni Drew Nacino

Kanselado ang 2021 World Triathlon Sprint and relay championships bunsod ng COVID-19 surge sa Bermuda Islands.

Nakatakda sana sa Oktubre15 hanggang 17 ang torneyo pero ipinagpaliban matapos makapagtala ng 4,218 COVID-19 cases at 38 deaths sa naturang lugar.

Ito, ayon sa World Triathlon at Bermuda local organizing committee, ay upang matiyak ang kaligtasan ng lahat ng ateltang kalahok.

Ang nasabing hakbang ay alinsunod sa rekomendasyon ng World Health Organization. —sa panulat ni Drew Nacino

Pinadapa ng Magnolia ang San Miguel Beer sa score na 100-90 sa 2021 PBA Philippine Cup sa Bacolor, Pampanga.

Si Paul Lee ang nanguna sa Hotshots matapos kumamada ng 32 points.

Sa isa pang laro, wagi naman ang NorthPort laban sa Rain or Shine sa score na 91-88 sa overtime ng kanilang laro sa katulad na venue.

Sa pagkakataong ito, si Greg Slaughter ang bumuhat sa Batang Pier sa pamamagitan ng kanyang 25 points, 11 rebounds, at six blocks.

Handa na ang Tropang Giga sa PBA Philippine Cup Playoffs.

Dahil sa kanilang panalo laban sa Alaska Aces kahapon, magkakaroon ng isang linggong pahinga ang TNT bago umarangkada ang elimination round.

Kabilang sa mga posibleng makasagupa ng Tropang Giga ay ang Alaska, Barangay Ginebra, Phoenix Super LPG, at Terrafirma.

Nag kampeon si Pinoy Billiard Player Carlo Biado sa 2021 US Open Pool Championships.

Hindi pinaporma ni Biado si Singaporean Professional Pool Player Aloysius Yapp sa score na 13-8.

Nakuha ni Biado ang 3-1 early lead subalit nakabawi si Yapp at nai poste ang 8-3 lead.

Nakabawi naman si Biado sa pitong straight racks at maitala ang 10-8 bago tuluyang mamayagpag sa pagbaon kay Yapp sa 9 straight racks at naitala ang 12-8 lead.

Hindi na bumitiw pa ang 37 anyos na pool player mula sa La Union sa ika-13th rack tungo sa tuluyang paghablot ng titulo.

2005 nang huling makuha ni Filipino Canadian Alex Pagulayan ang panalo sa US Open Pool Championship.

Kasunod na rin ito nang pag-abante nina Dennis Orcollo at Carlo Biado sa semifinal round ng nasabing event, matapos kapwa patumbahin ang mga nakalaban.

Tinalo ni Orcollo si Max Lechner ng Austria samantalang hindi naman pinaubra ni Biado ang kapwa Pinoy na si Johann Gonzales Chua.

Nakatakdang isagawa ang semi-final showdown bukas ng alas-10 ng umaga, oras sa Pilipinas at kung saan nakataya ang 50,000 dollars o halos P2.5-M.

Haharapin ng 2 time sea games gold medalist  na si Orcollo si Aloysius Yapp ng Singapore at makikipag-tagisan naman si Biado kay Naoyuki Oi ng Japan.

Itinakda rin ang final round bukas ng alas-3:30 ng hapon, oras sa Pilipinas.