SPORTS

Handa na si IBF World Super Flyweight Champion Jerwin Ancajas na umakyat sa 118lbs upang hamunin sina WBC World Bantamweight Champion Nonito Donaire Junior at WBO World Bantamweight Champion John Riel Casimero.

Aminado si Ancajas na matagal na umano niyang nais na sumampa ng dibisyon.

Taong 2018 nang idepensa nito ang kanyang korona laban sa kapwa Filipino na si Jonas Sultan at inihayag na handa ng maging challenger sa Bantamweight kung bibigyan ng pagkakataon.

Anya, hinintay lamang niya ang basbas ng kanyang coach na si Joven Jimenez.

Ayon kay Coach Jimenez, handa naman nilang harapin kahit sino sa dalawa kapag binigyan sila ng notice.

Ang mahalaga anya ay nasa kondisyon si Ancajas at habang may pagkakataon ay hindi nila ito palalampasin. —sa panulat ni Drew Nacino

Kanselado ang 2021 World Triathlon Sprint and relay championships bunsod ng COVID-19 surge sa Bermuda Islands.

Nakatakda sana sa Oktubre15 hanggang 17 ang torneyo pero ipinagpaliban matapos makapagtala ng 4,218 COVID-19 cases at 38 deaths sa naturang lugar.

Ito, ayon sa World Triathlon at Bermuda local organizing committee, ay upang matiyak ang kaligtasan ng lahat ng ateltang kalahok.

Ang nasabing hakbang ay alinsunod sa rekomendasyon ng World Health Organization. —sa panulat ni Drew Nacino

Pinadapa ng Magnolia ang San Miguel Beer sa score na 100-90 sa 2021 PBA Philippine Cup sa Bacolor, Pampanga.

Si Paul Lee ang nanguna sa Hotshots matapos kumamada ng 32 points.

Sa isa pang laro, wagi naman ang NorthPort laban sa Rain or Shine sa score na 91-88 sa overtime ng kanilang laro sa katulad na venue.

Sa pagkakataong ito, si Greg Slaughter ang bumuhat sa Batang Pier sa pamamagitan ng kanyang 25 points, 11 rebounds, at six blocks.

Nag kampeon si Pinoy Billiard Player Carlo Biado sa 2021 US Open Pool Championships.

Hindi pinaporma ni Biado si Singaporean Professional Pool Player Aloysius Yapp sa score na 13-8.

Nakuha ni Biado ang 3-1 early lead subalit nakabawi si Yapp at nai poste ang 8-3 lead.

Nakabawi naman si Biado sa pitong straight racks at maitala ang 10-8 bago tuluyang mamayagpag sa pagbaon kay Yapp sa 9 straight racks at naitala ang 12-8 lead.

Hindi na bumitiw pa ang 37 anyos na pool player mula sa La Union sa ika-13th rack tungo sa tuluyang paghablot ng titulo.

2005 nang huling makuha ni Filipino Canadian Alex Pagulayan ang panalo sa US Open Pool Championship.

Pasok na sa round of 16 ng 2021 US Open Pool Championship ang apat na Pinoy Billiard Players.

Kabilang dito sina Dennis Orcollo, Johann Chua, Carlo Biado at Rodrigo Geronimo.

Pinakahuling tinalo ni Orcollo si Hungarian Pool Player Oliver Szolnoki para makakuha ng slot at susunod na makakasagupa ang pambato ng Austria na si Mario He.

Hindi naman pinaubra ni Chua ang polish na si Miezko Fortunski at susunod na target mapatumba si Canadian Player John Mora.

Samantala, nasa losers bracket naman sina Biado at Geronimo.

Magugunitang wagi si Efren Bata Reyes sa 1994 US Open matapos talunin si American Pool Player Nick Varner.

Ipinagpaliban muna ngayong taon ang Premier Volleyball League (PVL) matapos ilipat ang 2nd conference nito sa Pebrero ng susunod na taon.

Ito ang kinumpirma ni Games and Amusements board chairman baham mitra matapos itong iparating sa kanyani pvl President Ricky Palou.

Nagpasya ang organizers na ganapin ang games sa taong 2022 dahil sa COVID-19 pandemic.

Una nang inihayag ng PVL na nais nito magsagawa ng 2nd conference sa Oktubre o Nobyembre pero ipinagpaliban dahil sa patuloy na pagtaas ng COVID cases.

Kampante naman si Mitra na magiging maayos na ang lahat upang matagumpay na maidaos ang ika-2 sigwada ng liga sa susunod na taon.—sa panulat ni Drew Nacino