SHOWBIZ

Kinoronahan bilang Miss Supranational 2026 si Ma. Katrina Llegado, labintatlong taon matapos ang huling tagumpay ng bansa mula sa pagkapanalo ni Mutya Datul noong 2013.

Tinalo ni Katrina ang animnapu’t anim na kandidata mula sa iba’t ibang bansa.

Nagpakitang-gilas si Katrina sa iba’t ibang bahagi ng kompetisyon, kabilang ang national costume na hango sa gumamela, swimsuit, evening gown, at question-and-answer portion.

Sa final round, ibinahagi ng beauty queen ang mensahe ng pagtanggap sa sariling pagkatao at ang pagsisikap na maging pinakamahusay na bersyon ng kanyang sarili sa halip na sumunod sa inaasahan ng iba.

Matatandaang naging fifth runner-up din si Katrina sa Reina Hispanoamericana noong 2020.  l mula sa panulat ni Reianne Antiquina

Nasasaktan ako roon sa sinasabi na bobo si Robin. I hate that word. Kumbaga, wala namang bobong tao. Tsaka, very insulting. Sa mga basher, ‘wag naman tayong umabot sa gano’n kababa. Itaas naman natin ang quality ng pagsasalita natin. May pinag-aralan naman ang mga Pilipino.

Dinepensahan ng komedyante na si Dennis Padilla si Senador Robin Padilla mula sa mga kritiko nitong nagsasabing isang “bobo” umano ang senador.

Inihayag ni Dennis na hindi niya nagugustuhan ang mga pananalitang tumatawag na “bobo” kay Sen. Robin Padilla, at aminado siyang nasasaktan siya sa mga ito.

Aniya, sa kabila ng mga puna at pambabatikos na natatanggap ng senador, patuloy pa rin itong tinatangkilik ng maraming Pilipino, na aniya’y makikita sa mga preference survey para sa 2028 national elections.

“I’m sure, ‘yung mga comments ng mga taong iyan, tandaan n’yo ito, babalik sa inyo ‘yan. God will prove you wrong,” dagdag pa niya.

Kinumpirma ng Star Magic na itutuloy pa rin ng aktres na si Kim Chiu ang kasong qualified theft na inihain laban sa kanyang kapatid na si Lakambini Chiu.

Kasunod ito ng muling pagkalat ng lumang interview ni Kim noong 2023 kung saan pinag-usapan ang kanyang kapatid.

Ayon sa Star Magic, nananatiling determinado si Kim na ituloy ang kaso at nilinaw na sinasalamin lamang ng lumang interview ang sitwasyon ng kanilang samahan noong panahon na iyon ngunit hindi na ito angkop sa isyu ngayon.

Sa kabila ng pagiging magkapatid, iginiit ng kampo ng aktres na ang usapin ay tungkol sa pananagutan at tamang proseso ng batas.

Matatandaang nagsampa si Kim ng kasong qualified theft laban sa kapatid na si Lakambini noong 2025 matapos matuklasan ang hindi maipaliwanag na mga anomalya sa pananalapi ng kanilang negosyo.  l mula sa panulat ni Reianne Antiquina

Walang nakikitang problema ang Actor at Leyte Representative Richard Gomez kung sakaling mauwi sa pag-iibigan ang ugnayan ng kanyang anak na si Juliana Gomez at basketball player na si Ricci Rivero.

Ayon sa kongresista, nasa tamang edad na si Juliana at may kakayahan na itong magpasya para sa sarili, lalo na pagdating sa usaping pag-ibig.

Ang tanging request lang aniya ni Richard ay kung may manliligaw sa kanyang anak ay dapat sa kanilang bahay ito gawin.

Matatandaang naging usap-usapan sina Juliana at Ricci matapos silang mamataang magkasama sa ilang pagkakataon.

Gayunman, wala pang pormal na kumpirmasyon ang dalawa kung ano ang tunay na estado ng kanilang relasyon.  l mula sa panulat ni Reianne Antiquina

Kinumpirma ng K-Pop group na BTS na hindi sila magsusumite ng entry para sa Grammy Awards na nakatakdang ganapin sa Pebrero.

Kasunod ito ng anunsyo ng Recording Academy na magdadagdag sila ng mga bagong kategorya tulad ng Best Asian Pop Music Performance.

Paliwanag ng k-pop icons, nais nilang kilalanin at mahalin ang musika batay sa tunay nitong halaga, sa halip na paghiwa-hiwalayin ayon sa rehiyon o wika.

Pinasalamatan naman ng BTS ang kanilang fans sa pag-unawa sa kanilang desisyon at patuloy na pagsuporta sa kanila.  l mula sa panulat ni Reianne Antiquina

Inamin ng actor-singer na si James Reid na nawalan siya ng isangdaan limampung milyong piso nang maloko siya ng kanyang business partner na si Jeffrey Oh sa record label niya na Careless Music.

Ayon kay James, katumbas na ito ng sampung taong pagtatrabaho niya sa industriya.

Bukod dito, nasaktan din aniya ang aktor dahil hindi niya akalain na magagawa ito ni Jeffrey na aniya’y itinuring niyang tunay na kaibigan.

Dagdag pa ni James, naging sandalan niya ang kanyang girlfriend na si Issa Pressman na tumulong sa kanya na makabangon muli.  l mula sa panulat ni Reianne Antiquina

Naging mas simple ang pagdaraos ng SONA o State of the Nation Address ngayong taon alinsunod sa direktiba ni Pangulong Ferdinand Marcos Junior.

Bagaman walang red carpet, hindi pa rin nagpahuli sa fashion ang mga panauhin.

Karamihan sa mga dumalo ang nagsuot ng simple ngunit elegante at makabagong filipiniana, habang ang ilan ay ginamit pa ang kanilang kasuotan upang isulong ang mga adbokasiya gaya ng pangangalaga sa kalikasan, karapatan ng kababaihan, at pagtataguyod sa likhang pilipino.

Kabilang sa mga agaw-pansin sina First Lady Liza Araneta Marcos, Senador Risa Hontiveros, DOJ Undersecretary Margarita Gutierrez, ang asawa ni Senator Juan Miguel Zubiri na si Audrey Zubiri at iba pa.  | mula sa panulat ni Reianne Antiquina

Usap-usapan ngayon sa social media ang cryptic comment ni Jamie Evangelista, ang asawa ng aktor na si Baron Geisler.

Sa isang deleted comment, hinimok ni Jamie si Baron na humanap ng sponsor at sumailalim sa drug rehabilitation.

Bukod sa viral comment, itinag din ni Jamie ang aktor sa kanyang instagram stories tungkol sa mga quotes na tila may patama.

Sa kasalukuyan, wala pang tugon ang aktor tungkol dito pero limitado na ang pwedeng mag-comment sa kanyang IG.

Matatandaan na nagsimula pa noong unang bahagi ng kanyang karera sa showbiz ang pakikipaglaban ni Baron sa pagkalulong sa droga at alak. | mula sa panulat ni Reianne Antiquina

Umani ng batikos ang aktres at content creator na si Ivana Alawi dahil sa kanyang iPhone giveaway kaugnay sa isang online gambling platform.

Nakasaad sa mechanics ng naturang raffle na kinakailangang i-follow ng mga nais sumali ang social media page ng online casino na ineendorso ni Ivana bago maging kuwalipikado sa giveaway.

Kabilang sa mga nagbigay ng kumento ang financial literacy influencer na si Jax Reyes, kung saan binigyang-diin niya na patuloy ang paglaganap ng pagsusugal sa bansa.

Bagaman hindi niya direktang binanggit ang pangalan ng aktres, iginiit ni Jax na tinatayang tatlompu’t-dalawang milyong Pilipino na nasa wastong gulang ang nagsusugal, bilang na aniya, ay mas mataas pa kaysa sa kabuuang dami ng mga credit card holder sa Pilipinas.

Bukod dito, nanawagan din si Jax sa mga kapwa content creator na maging responsable sa paggamit ng kanilang boses lalo’t marami ang sumusuporta sa kanila. | mula sa panulat ni Reianne Antiquina

Ibinunyag ng aktres at Quezon City Councilor na si Aiko Melendez na sumailalim siya sa isang thyroid biopsy at scan.

Ayon kay Aiko, batay sa initial assessment ng doktor, benign ang kanyang nodules pero sa ngayon ay hinihintay pa ang pinal na resulta ng biopsy.

Dagdag pa ng aktres, nakararanas na siya ng thyroid problems mula pa noong kabataan niya ngunit itinigil niya ang pag-inom ng gamot dahil akala niya ay ok na siya.

Binigyang-diin ni Aiko na dapat seryosohin ang pag-aalaga sa thyroid health ng bawat isa dahil malaki ang epekto nito sa gamutan.

Payo pa ng aktres sa publiko, huwag balewalain ang mga senyales na ipinapakita ng katawan mo.  | mula sa panulat ni Reianne Antiquina