RONDA PROBINSYA

Mas paiigtingin pa ng Bureau of Customs-port of Davao (BOC-Davao) ang kanilang hakbang laban sa iligal na droga sa mga kargamentong ipinupuslit sa kanilang mga pantalan.

Kasunod ito ng pagkakasabat ng ahensya sa P1.3 million na halaga ng high grade marijuana at liquid marijuana kasama ang Philippine Drug Enforcement Agency 12 o (PDEA 12) sa sub-port nito sa General Santos City noong Hulyo a-27.

Sa pahayag ng BOC-Davao, unang idineklara bilang cooking set, mula sa Estados Unidos ang mga shipment pero naang inspekisyunin, dito na tumambad ang 927 gramo ng high-grade marijuana at 22 piraso ng vape cartridge na naglalaman ng liquid marijuana.

Tinitignan na ng ahensya ang posibleng kasabwat ng ‘di pinangalanang claimant na nahuli sa pamamagitan ng delivery operation.

Nahaharap sa kasong paglabag sa Republic Act 10863 o Customs Modernization and Tariff Act (CMTA) at RA 9165 o Comprehensive Dangerous Drugs Act of 2002 ang inarestong suspek.

Nasabat ng Zamboanga City Mobile Force Company (ZCMFC) ang isang kargamento na naglalaman umano ng mga sangkap sa paggawa ng bomba.

Ayon kay Col. Richard Verceles, operations chief ng Area Police Command-Western Mindanao (APC-WM), kasama sa shipment ang labintatlong sako ng ammonium nitrate na nakumpiska nila sa karagatang sakop ng Sitio Layag-Layag, Barangay Talon-Talon.

Nagpapatrulya umano ang mga pulis nang mamataan ang isang bangka at nang makita sila ay nagpulasan naman ang mga sakay nito kaya’t naiwan ang naturang kargamento.

Isinailalim sa state of calamity ang Kabacan, North Cotabato bunsod ng mga pagbaha na hatid ng masamang panahon.

Ayon kay David Don Saure, municipal disaster risk reduction management officer, ang deklarasyon ay ibinatay sa resolusyong isinumite ng Municipal Disaster Risk Reduction and Management Council (MDRRMC).

Nabatid na pumalo na sa P13-M ang halaga ng pinsala sa agrikultura sanhi ng malawakang pagbababa sa mga low-lying areas sa nasabing bayan.

Patay ang isang 18-anyos na lalaki matapos masagasaan ng tren ng Philippine National Railways sa Sta. Rosa city, laguna.

Kinilala ng Laguna Police ang nasawi na si John Franklin Minero, residente ng lugar.

Batay sa imbestigasyon, naglalakad lang umano sa riles ang biktima dakong alas-11:30 ng gabi nang masagasaan at nakaladkad ng tren.

Dead-on-the-spot si Minero habang hindi naman malaman ng mga otoridad kung paanong hindi nito narinig ang busina ng tren.

Patuloy na iniimbestigahan ng mga otoridad ang insidente.

Inaayos na ng Department of Education (DepEd) ang mga paaralang nasalanta ng bagyo para sa pagbabalik ng full implementation ng face-to-face classes sa Agosto.

Ayon kay Vice President at Education secretary Sara Duterte-Carpio, nag-ikot siya mismo sa mga paaralang nasalanta ng Bagyong Odette sa Bicol.

Dito nagsagawa ng inventory ang Pangalawang Pangulo kung handa na ang mga paaralan sa nalalapit na pasukan.

Maliban sa paghahanda, magsasagawa rin ng counselling ang DepEd tungkol sa pagbabakuna at mental wellness para sa mga batang hindi pa nakakapag in-person classes.

Sa Agosto a-15, inaasahang maglalabas ng guidelines ang DepEd para sa pagbubukas ng klase.

Nakatanggap ng tulong pinansyal ang mga pamilyang biktima ng sunog sa Marilao, Bulacan.

Ayon sa NHA, aabot sa P570, 000 na cash assistance ang naipamahaging tulong sa 19 na pamilya sa nabanggit na lugar o katumbas ng P30, 000 kada benepisyaryo ng programa.

Ang nasabing pinansyal ay galing umano sa Emergency Housing Assistance Program (EHAP) ng ahensya na may layuning matulungan ang mga pamilyang apektado ng mga kalamidad gaya ng baha at sunog.

Limang hindi pa nakikilalang kalalakihan ang pinagbabaril sa bayan ng Doña Remedios Trinidad, Bulacan.

Ayon kay Capt. Eugenio De Ramos, hepe ng Doña Remedios Trinidad Police, naganap ang krimen sa liblib na bahagi ng barangay Camachile dakong alas-10:30 ng umaga kahapon.

Magtatabas lamang anya sana ng damo ang mga biktima sa isang bakanteng lote na napag-alamang subject ng land dispute.

Batay sa imbestigasyon, isang kasama ng mga biktima ang maghahatid sana ng pananghalian, subalit pawang mga bangkay na ang naabutan nito pasado alas-11.

Isang saksi naman na naninirahan malapit sa nabanggit na lugar ang nakarinig ng mga putok ng baril dakong alas-10:30 ng hapon.

Inaalam na ng awtoridad kung ano ang motibo at sino ang posibleng nasa likod ng krimen.

Umabot na sa mahigit 600 ang dengue cases sa Western Visayas sa loob lamang ng isang linggo.

Inihayag ng Department of Health-Region 6 na simula July 10 hanggang 16, sumampa na sa 674 ang tinamaan ng nasabing sakit.

Pinakamaraming naitala sa lalawigan ng Negros Occidental, 230 na sinundan ng Iloilo, 161 at Antique, 118.

Lima naman ang namatay sa nasabing panahon kabilang ang dalawa sa Antique habang tig-isa sa Iloilo, Bacolod at Negros dahilan upang umakyat na sa 37 ang death toll simula Enero ngayong taon.

Sa kabuuan, lumobo na sa 6,856 ang dengue cases sa rehiyon mula Enero hanggang Hulyo 16 at posibleng lumampas pa ng 7,000 ngayong linggo.

Tukoy na ng mga militar ang mga pangalan ng anim sa walong New Peoples Army (NPA) na nahukay sa Barangay Canadam, Maconacon, Isabela, kamakailan.

Ayon sa mga tauhan ng 502nd Infantry Brigade, kinilala ang mga bangkay na sina Willy Baltazar alyas Brad; Junjun alyas Bamboo; Raffy Valencia alyas Rigid; Jestoni Peregrido alyas Marco; Angelo Miguel Del Rosario alyas Bryan; at Mario Agustin alyas Eloy.

Ayon sa mga militar, patuloy pang inaalam ng kanilang mga tauhan ang pagkakakilanlan sa dalawa pang miyembro ng NPA na sina alyas Dondon at alyas Monmon na kapwa mula sa rehiyon ng Mindanao.

Samantala, umaasa naman ang mga militar na magbabalik loob sa pamahalaan ang iba pang miyembro ng npa upang muling makapiling ang kanilang mga pamilya at mamuhay ng tahimik.

Patay sa pagsabog ang lalaking nagtitimpla umano ng kape sa Sitio Binayuyo, Brgy. Calawis sa Antipolo, Rizal.

Sa imbestigasyon ng mga otoridad, kadarating lamang ng biktimang kinilalang si Fernan Fernandez at naghahanda ng kape para sa kanilang almusal kung saan, habang kinukuha nito ang takure na may lamang kumukulong tubig ay bigla na lamang nagkaroon ng pagsabog na nagresulta ng mga sugat sa kanyang katawan.

Agad na isinugod ang biktima sa pagamutan pero idineklara itong dead-on-arrival.

Sa ngayon, patuloy pang iniimbestigahan ng mga otoridad kung ano ang sanhi o pinagmulan ng pagsabog.