RONDA PROBINSYA

Ipagbabawal na ang pagokupa ng sidewalk para sa personal o komersyal na dahilan.

Sa panayam ng DWIZ, sinabi ni Pangasinan 5th District Rep. Ramon “Monching” Guico Jr., na nilalayon niyang bigyang-parusa ang sinumang lalabag sa naturang ordinansa.

Kasama sa plano na parusahan ang mga nagtitinda, nagpaparada ng sasakyan, at humaharang sa daanan tulad ng kalye, bangketa, eskinita, at iba pang pampublikong espasyo.

Maliban sa multa, maaari ring makulong ang mga LGUs na hindi susunod sa panuntunan.

Maaari kasing magdulot ng peligro ang ginagawa ng mga ito lalo na sa publiko.  —sa panulat ni Hannah Oledan

Isa ang nasawi sa pagbaha bunsod ng malakas na pag-ulan sa lalawigan ng Cebu.

Ayon kay Cebu City Disaster Risk Reduction and Management Council Chairperson Gerry Carillo, narekober ang labi ng isang lalaki sa ilalim ng Vestil Bridge.

Inanod anya ng rumaragasang ilog ang hindi pa nakikilalang biktima, kagabi.

Nagsilikas naman ang mga residente sa Sitio Lub-Ang, Barangay Casuntingan sa Mandaue City dahil naman sa pag-apaw ng Butuanon River.

Ganito rin ang naging sitwasyon sa Sitio Laray, Barangay Tayud sa Consolacion makaraang umapaw hanggang highway ang ilog.

Apektado rin ng pagbaha ang ilang bahagi ng Toledo City, Talisay City, Naga City at Minglanilia habang stranded ang mga pasahero sa Lapu-Lapu City dahil sa taas ng tubig.

Sa pagtaya ng PAGASA, umabot sa 58.4 milimeters ng tubig-ulan ang bumuhos o katumbas ng 292,000 barrels ng tubig sa loob lamang ng ilang oras.

Walo ang patay sa karambola ng mga sasakyan sa General Santos City, kahapon.

Dakong alas-4:00 ng hapon nang maganap ang aksidente sa highway sa Barangay Tinagacan.

Tumilapon ang mga hindi pa nakikilalang biktima habang nagkalat ang ilang bahagi ng mga nawasak na sasakyan sa kalsada.

Ayon kay Maj. Rissa Hernaez, Spokesperson ng Gensan Police, isang commuter van ang biglang lumihis sa kabilang lane nang biglang sumabog ang kaliwang gulong nito.

Binangga ng van ang isang 16-wheeler wing van truck habang damay din ang isang Ford pick-up.

Patungo sanang Davao City ang commuter van habang biyaheng Gensan ang truck.

Nagdeklara na ng State of Calamity ang City Disaster Risk Reduction and Management Council (CDRRMC) matapos sumirit ang kaso ng dengue sa Tabuk City, Kalinga.

Ayon kay Mayor Darwin Estrañero, tumaas sa 1,758% o katumbas ng 762 na kaso ng dengue sa kanilang lugar ngayong taon na ikinamatay ng tatlong idibidwal.

Sa pahayag ni Dr. Henrietta Bagayao, health officer ng lalawigan, 83 pasyente ang patuloy na nagpapagaling at kasalukuyang ginagamot sa mga pampubliko at pribadong ospital sa lungsod.

Dahil dito, humiling ang alkalde sa sangguniang panlungsod na magsagawa ng isang espesyal na sesyon upang aprubahan ang deklarasyon na magbibigay-daan sa agarang pagtugon sa quick response fund ng lungsod para sa pagpapatupad ng mga hakbang laban sa pagkalat ng naturang sakit.

Kabilang sa mga hakbang, ang pagsasagawa ng fogging, misting, at pag-spray sa mga bahay at paaralan bago ang pagsisimula ng face-to-face classes sa Agosto a-22.

Bukod pa dito, naglabas narin ng executive order si Estrañero na nag-uutos sa mga barangay health emergency response teams na tumulong sa mga hakbang laban sa dengue sa buong komunidad para sa pagsugpo ng lamok na may dalang dengue.

Bukod pa dito, magsasagawa din ng blood-letting activity sa city hall ng lungsod ngayong araw kung saan, iniimbitahan ang publiko na lumahok sa naturang aktibidad.

Nagpositibo sa COVID-19 si Cebu City Mayor Michael Rama.

Nakatakda sanang magtungo sa Malacañang kahapon si Rama para sa isang pulong ngunit lumabas sa RT-PCR results na nagpositibo siya sa nakahahawang sakit.

Ayon kay Dr. Mary Jean Loreche, Consultant ng Health and Hospital Operations ng Cebu City, naka-quarantine ang alkalde at maayos ang kondisyon nito.

Sinabi pa ni Loreche na fully vaccinated na si Mayor Rama at nakatanggap na rin ng booster shot na nakatulong upang maging asymptomatic lamang ito.

Kaugnay nito, hinikayat ng alkalde ang mga residente na magpabakuna na at tiniyak nito na patuloy siyang magtatrabaho kahit na siya’y tinamaan ng COVID-19.

Inilikas muna ang 125 pamilya mula sa Antique matapos bahain dulot ng malakas na ulang dala ng bagyong Ester.

Ang mga nasabing residente , ayon sa Antique Provincial Disaster Risk Reduction and Management Office ay  mula sa mga bayan ng Hamtic, San Jose at Sibalom kung saan nagkaruon ng pagguho ng lupa ang dalawang  barangay nito.

Kaagad namang nagpaabot ng tulong sa mga naapektuhang pamilya ang DSWD Region 6.

Inihayag ni National Irrigation Administration (NIA) Acting administrator Benny Antiporda na winasak ng lindol ang Irrigation Management Office sa Abra matapos ang magnitude 7 na lindol.

Sa panayam ng DWIZ, sinabi ni Antiporda na sa ngayon, sa labas nagtatrabaho ang mga empleyado ng NIA pero sinusubukan na nila itong solusyonan.

Sinabi ni Antiporda na bukod sa pagsasagawa ng inspeksiyon sa mga irigasyon, binisita din nila ang mga dam kabilang na dito ang Magat Dam sa Isabela na naapektuhan ng pagyanig.

Isang malaking debris na mula umano sa Chinese Rocket ang narekober ng ilang mangingisda sa Occidental Mindoro.

Natagpuan ang nasabing debris, isandaang milya mula sa Barangay 7 sa Bayan ng Mamburao.

Ayon kay Barangay 7 chairman Jimmy Patal, Hulyo a – 26 nang mabingwit ng mga mangingisdang tauhan ng kanyang biyenang si Erick Tamboong ang naturang debris.

May watawat anya ito ng China at may nakasulat pang chinese characters pero isa lamang ang nakaya nilang maisakay sa bangka at maiuwi sa Mamburao.

Ipinarating na rin sa Philippine Coast Guard na may pinasabog umano sa Sulu Sea at posibleng napadpad ang mga debris malapit sa kanilang lugar.

Inihayag naman ni Philippine Coast Guard spokesman, Commodore Armand Balilo na hindi pa nila matukoy sa ngayon kung saan galing ang naturang debris habang nagsasagawa na sila ng inquiry upang ma-beripika ang pinanggalingan nito.

Dinampot ng mga otoridad ang Plant Manager at ilang tauhan nitong sangkot sa iligal na pagre-refill ng LPG tanks sa General Trias, Cavite.

Huli sa akto ng mga tauhan ng Anti Organized Crime Unit ng Criminal Investigation and Detection Group (CIDG) ng PNP ang ilang tauhan ng nasabing planta na nagre-refill ng LPG tanks ng mga kilalang brand.

Sinabi ng mga otoridad na may bitbit ng search warrant na tinangka pang tumakas ng mga suspek at maging ang mga  nagpapa refill ay inaresto rin.

Mahigpit naman ang pagtanggi ng kinatawan ng kumpanya sa alegasyong illegal activity na una nang isinumbong ng mga lehitimong dealer ng LPG tanks.

Kinumpiska ng mga otoridad ang ilang equipment sa planta kasunod nang paghahain ng kaso laban sa mga suspek.

Walo ang nasawi sa karambola ng mga sasakyan sa Nasugbu, Batangas kaninang pasado alas-5:00 ng madaling araw.

Batay sa imbestigasyon ng Nasugbu Police Station, isang dump truck, SUV at motorsiklo ang nagbanggaan sa Tagaytay-Nasugbu Road sa Barangay Aga.

Narekober naman ang mga nasawi na kinabibilangan ng drayber ng motorsiklo, at pitong sakay ng SUV na natabunan ng buhangin.

Nawalan umano ng preno ang truck na kargado ng buhangin na kung saan nasagaan ang mga naturang sasakyan.

Patuloy naman ang imbestigasyon ng mga otoridad sa naturang insidente.