RONDA PROBINSYA

Patuloy sa pagtaas ang dengue cases sa lalawigan ng Occidental Mindoro.

Inihayag ni Dr. Maria Teresa Tan, Provincial Health Officer ng Occidental Mindoro, aabot na sa 1, 810 ang kaso ng dengue sa lalawigan, kabilang ang 9 na namatay.

Dahil anya sa patuloy na pagtaas ng dengue cases, isinailalim na rin sa State of Calamity ang mga Bayan Sablayan at San Jose.

Una nang idineklara ang State of Calamity sa lalawigan noong Hulyo.

Batay naman sa datos ng Department of Health, sumampa na sa 92, 343 ang kaso ng dengue sa bansa simula Enero a – 1 hanggang Hulyo a – 23 kumpara sa 42, 294 sa kaparehong panahon noong isang taon.

Sa nakalipas na halos dalawang linggo, muling nalubog sa baha bunsod ng malakas na pag-ulan ang ilang bahagi ng lalawigan ng Cebu.

Kabilang sa mga binaha ang ilang barangay sa Naga City kung saan dalawang sasakyan ang inanod ng rumaragasang tubig.

Ayon sa LGU ng Naga City, nasa 100 residente ang apektado ng flashfloods.

Umapaw naman ang Mantayupan Falls sa Bayan ng Barili  ilang minuto pa lamang matapos ang malakas na ulan.

Inihayag ni Barili Mayor John-John Garcia na agad silang namahagi ng tulong sa mga apektadong residente habang ina-assess na nila ang pinsala sa pagbaha.

Patay ang isang lalaking rubber plantation worker matapos pagbabarilin sa Lamitan City, Basilan.

Kinilala ng pulisya ang biktima na si Bhis Isniyan Asdali, 52- anyos.

Mag-a-ala-7 noong Sabado ng gabi nang paulanan ng bala ng hindi nakilalang salarin si Asdali habang nakaupo sa terrace ng kanyang bahay sa Sitio Muhibal, Barangay Campo Uno.

Narekober sa Crime Scene ang anim na basyo ng bala at clip ng garand rifle.

Itinanggi naman ni PNP spokesperson, Col. Jean Fajardo ang naunang ulat na kaanak ni Dr. Chao Tiao Yumol ang biktima.

Si Yumol ang suspek sa pagpatay kay dating Lamitan City Mayor Rose Furigay at dalawa pa sa loob ng Campus ng Ateneo De Manila University noong July 24.

Nagsasagawa na ng imbestigasyon ang Lamitan City Police kabilang ang pagtukoy sa motibo sa pamamaslang kay Asdali.

Ilalarga na ng Cebu City Government ang malawakang clearing operations simula Miyerkules, Agosto a – 10.

Layunin nitong marekober ang tatlong metrong easement sa mga ilog at waterways upang maiwasan ang casualty at mabawasan ang pagbaha tuwing malakas ang ulan.

Ipinag-utos na ni Cebu City Mayor Michael Rama ang paggiba sa tinatayang 2K istruktura sa gilid ng mga ilog matapos ang matinding pagbaha noong Huwebes dahil sa pag-apaw ng ilang waterways.

Kabilang sa mga umapaw ang Kinalumsan River sa Barangay Mambaling, na rumagasa at tumangay sa dalawa katao na kalauna’y nailigtas.

Ayon kay Rama, tinatayang 14K katao ang maaapektuhan sa sandaling simulan ang operasyon.

Nagpulong na rin ang Cebu City Disaster Risk Reduction and Management Office, Department of Public Works and Highways, Division for the Welfare of the Urban Poor at Cebu City Environmental and Natural Resources para sa implementasyon ng proyekto.

Ilan sa mga tututukan ang demolisyon ng illegal structures na lumalampas sa 3 meter easement ng Kinalumsan River.

Nadakip ng mga pulis sa Tarlac City ang isang tatlumpu’t isang taong gulang na babae na hinihinalang sangkot sa ‘package delivery scam’ na ginagawa sa pamamagitan ng social media.

Kinilala ni Brig. Gen. Bowenn Joey Masauding, Officer-in-Charge ng Philippine National Police-Anti-Cybercrime Group o PNP-ACG, ang suspek na si Marijoe Coquia, residente ng Pangasinan.

Si Coquia ay naaresto sa entrapment operation ng pinagsanib na pwersa ng Cyber Financial Crime Unit at Tarlac Provincial Crime Response Team habang nagki-claim ng pera sa isang remittance center na umano’y pinadala ng kanyang biktima.

Sa reklamo ng complainant, gumagamit si Coquia ng pangalan na “Grace Anderson” sa Facebook at nagpapanggap bilang opisyal ng United States Army na nakabase sa Syria.

Nag-imbento ito ng kwento at sinabihan ang complainant na magpapadala ito ng kargamento sa kanya na may kasamang cash na nagkakahalaga ng 94 million pesos kung saan kailangan umanong magpadala ng biktima ng 110,000  pesos na pambayad sa customs fees.

Matapos magbigay ng pera ay walang natanggap ang biktima kaya’t nagpasaklolo na ito sa mga pulis.

Arestado ang isang “high-value individual” matapos mahulihan ng 1.224 million pesos na halaga ng hinihinalang shabu sa ikinasang buy bust operation sa Barangay Palinpinon, Valencia, Negros Oriental.

Kinilala ng Negros Oriental Provincial Police Office o NOPPO ang suspek na si Don Emilio Cordova Cariño, 35 taong gulang, at residente ng Barangay Batinguel.

Nasabat mula kay Cariño ang pitong plastic sachets na naglalaman ng umano’y shabu na tinatayang tumitimbang ng 180 grams.

Mahaharap ang suspek sa reklamong paglabag sa Republic Act 9165 o Comprehensive Dangerous Drugs Act of 2002.

Limang sakay ng isang kotse ang sugatan matapos mahulog ang naturang sasakyan sa isang kanal sa gilid ng Quirino Highway, Barangay San Diego, Tagkawayan, Quezon kagabi.

Batay sa ulat ng Tagkawayan Municipal Police Station, pasado ala-7 ng gabi nang dumulas ang gulong ng kotseng sinasakyan ng mga biktima dahil sa basang daan na dulot ng malakas na pag-ulan.

Habang makailang beses pa umanong bumaliktad ang kotse bago tuluyang mahulog sa kanal dahilan upang matinding mawasak.

Kaagad namang na-rescue ng mga tauhan ng Municipal Disaster Risk Reduction and Management Office at Bureau of Fire Protection – Tagkawayan ang mga biktima

Paalala ng awtoridad sa mga biyahero na mapapadaan sa Quirino Highway sa bahagi ng Tagkawayan, Quezon, magdoble-ingat sapagka’t madulas ang daan doon tuwing maulan.

Tinangay ng flash flood ang isang City Disaster Risk Reduction Management (CDRRM) rescuer, kasama ang nire-rescue nito sa Valencia, Bukidnon noong Biyernes.

Sa video na kuha ni CDRRM officer June Rey Valero, nakayakap sa isang kahoy ang 17- anyos na lalake na una nang tinangay ng baha.

Ayon kay Valero, lumusong ang responder na kinilalang si Kenneth Richards Cabaluna sa rumaragasang tubig upang puntahan ang kinaroroonan ng biktima.

Sa lakas ng alon ay nabitawan ni Cabaluna ang lubid na ipang-re-rescue sana.

Mahigpit na napahawak sa kahoy ang rescuer kasama ang nirerescue nito ngunit natangay rin ng baha ang dalawa.

Natagpuang buhay ang dalawa matapos ang isinagawang rescue operation na tumagal ng dalawang oras.

Pinasalamatan naman ng lokal na pamahalaan ang kabayanihang ginawa ni Valencia. —sa panulat ni Hannah Oledan

Umarangkada na ang mas pinaigting na kampanya ng Land Transportation Franchising and Regulatory Board o LTFRB Central Luzon laban sa mga kolorum o illegal public utility vehicles na bumibiyahe sa rehiyon.

Ayon kay LTFRB-3 Director Nasrudin Talipasan, anim na sasakyan ang agad nilang nasampulan at in-impound matapos isyuhan ng Inspection Report Summons o IRS dahil sa pag-o-operate nang walang ‘proper authority’ mula sa ahensya.

Bukod dito, labing-siyam na iba pa ang hinuli dulot ng iba’t ibang paglabag tulad ng overcharging, cutting trips o wala sa ruta, at hindi pagsusuot ng uniporme.

Paliwanag ni Talipasan, hangad ng LTFRB na itaguyod at protektahan ang karapatan ng mga law-abiding operators at ang mga mananakay tungo sa isang malinis at malusog na kumpetisyon sa public transportation.

Aabot sa ang 88 mag-aaral na magsasaka ang nakapagtapos ng School on Air (SOA) Program on Coffee sa ilalim ng Department of Agriculture-Cordillera.

Nagmula sila sa anim pangunahing Munisipalidad sa Cordillera Administrative Region (CAR) kabilang ang Bauko, Besao, Bontoc, Sabangan, Sagada at Tadian.

Kahapon, ginanap ang seremonyas sa Multi-Purpose Hall sa Bontoc kung saan kabilang sa mga itinuro sa Farmer-Enrollees ay ang tamang teknolohiya sa coffee production, postharvest technologies, packaging at marketing.

Noong Hulyo hanggang Oktubre 2021 sinimulan ang SOA Program.

Binati naman nina Governor Bonifacio Liwasan Jr. at June pinayakan ng Provincial Legal Office ang mga nagsipagtapos. —sa panulat ni Hannah Oledan