RONDA PROBINSYA

Arestado ang dalawang suspek sa kasong pagpatay sa isang jeepney driver matapos manita nito hinggil sa ipinatutupad na curfew sa isang subdibisyon sa Cavite.

Kinilala ang mga salarin na sina Ronald Marquez at Ariel Layam kapwa residente ng Barangay Conchu, Trece Martires City.

Batay sa ulat, sinita ng Jeepney Driver na kinilalang si Mel Aubray Mijares ang dalawang suspek kung kaya’t nagalit ang mga ito at saka binaril ang biktima.

Tumakas ang mga suspek matapos ang pamamaslang.

Napag-alaman na ang dalawang suspek ay kapwa miyembro ng Civil Security Unit.

Nahuli ang mga ito sa ikinasang follow up operation ng pulisya habang nasabat sa mga suspek ang isang Armscor caliber .9mm, 2 magazines, 13 na bala, isang cal.38 na kargado ng mga bala, isang kutsilyo, 3 empty shells, isang slug at isang motorsiklo. —sa panulat ni Maze Aliño – Dayundayon

Timbog ang isang lalaki matapos mahulihan ng tinatayang P7.1-M halaga ng shabu sa isinagawang buy-bust operation sa Brgy. Tayud, Liloan, Cebu City.

Kinilala ang suspek na si Rafael ‘’Raprap’’ Carnicel, 21 taong gulang at residente ng Sitio Magsaysay, Brgy. Pasil, Cebu City.

Nagsagawa ng buy-bust operation ang mga awtoridad at nakumpiska rito ang nasa 1.05 kilos ng shabu na nagkakahalagang P7,140,000.

Batay sa ulat, matagal nang undersurverillance ang suspek. —sa panulat ni Maze Aliño – Dayundayon

Nasawi ang isang scuba diver sa Sipalay City, Negros Occidental matapos atakihin sa puso.

Kinilala ng Sipalay Emergency Assistance and Rescue Services ang nasawi na si Henry Aguillon, 57 anyos, residente ng Himamaylan City at miyembro ng Philippine Life Saving Society (PLS).

Batay sa imbestigasyon, kasama ni Aguillon noong Martes ang apat pang miyembro ng PLS nang magscuba diving sa isang resort sa Barangay Kwatro.

Ngunit naipit sa coral reefs ang biktima dahilan para atakihin sa puso at malunod.

Tinangka pang dalhin sa Sipalay City Health Office ang scuba diver pero idineklara itong dead-on-arrival.

Maliban sa pagiging miyembro ng PLS, si Aguillon ay dating self-defense, water safety and basic life support instructor, at ngayon ay co-founder ng Negros Rescue Federation at Special Personnel for Emergency Assistance and Rescue Services.

Patay ang isang pamilya sa bayan ng Caibiran sa Biliran matapos salpukin ng trak ang sinasakyan nilang traysikel.

Kinilala ng Biliran Regional Headquarters ng Philippine National Police (PNP), ang mga biktima na sina Jimmy Agosto, asawa nitong si Solidad at kanilang anak na sina Jameson at Jonalyn.

Batay sa imbestigasyon ng mga otoridad, pauwi na sana ang mga biktima sa kanilang bahay sa Barangay Maurang pasado alas-6 ng gabi, nang banggain sila ng isang trak na minamaneho ni Benigno Garcia.

Tinangka umanong mag-overtake ni Garcia sa isang traysikel pero naararo naman nito ang sinasakyan ng mga biktima.

Agad namang dinala sa Biliran Provincial Hospital ang mga biktima pero idineklara itong dead on arrival.

Sa ngayon, nakakulong na sa Caibiran Municipal Station ang driver ng trak na lumabas na lango sa alak, at sasampahan ng kasong multiple homicide.