RONDA PROBINSYA

Binawian ng buhay ang isang 19-year-old na lalaki matapos itong mabangga ng isang bus sa Sto. Tomas City, Batangas.

Ayon kay Police Captain Ponciano Ebora Jr., operation officer ng Sto. Tomas City Police Station, tumatawid ang estudyanteng biktima para puntahan sana ang kanyang lolang nagtitinda ng balut nang mabangga ito ng bus na galing sa Calamba, Laguna.

Dinala sa ospital ang biktima kung saan ito idineklarang dead on arrival.

Batay sa imbestigasyon, hindi naman mabilis ang takbo ng bus dahil daanan ito ng maraming sasakyan sa lugar.

Nagbigay na ng tulong ang kumpanya ng bus sa pamilya ng biktima.

Nangangamba ang mga residente sa Brgy. Bued, Calasiao, Pangasinan, matapos matagpuan ang isang balat ng malaking sawang pinaghihinalaang nasa likod ng pagkawala ng mga alagang hayop sa lugar.

Ayon sa City Environment and Natural Resources Office (CENRO) Central Pangasinan, mula ang balat sa isang burmese python.

Tinatayang 30 taong gulang na ang ahas na aabot sa 25 talampakan.

Ayon kay Chairman Allan Roy Macanlalay, posibleng nakakain o nakalayo na ang sawa. Matagal pa aniya bago ito lumabas muli, kaya pansamantala munang itinigil ang paghahanap dito.

Hiniling naman ng ibang residente na ipagpatuloy ang paghahanap sa dambuhalang ahas.

Pagtitiyak ng mga opisyal ng barangay, ligtas ang mga nakatira malapit sa lugar kung saan natagpuan ang balat.

Binawian ng buhay ang isang negosyante, habang sugatan ang kanyang dalawang kaanak, matapos pagbabarilin sa Brgy. Buenavista West, Candelaria, Quezon.

Nagtamo ng bala sa iba’t ibang bahagi ng katawan ang biktimang si Manolito Laygo, 56 years old. Agad itong nalagutan ng hininga.

Sa leeg naman tumama ang bala kay Sergio Bosita, 61 years old; samantalang binti ang nadale kay Edwin Aquino, 51 years old.

Ayon kay Police Lieutenant Colonel Bryan Merino, Candelaria chief of police, nakikipag-inuman ang magkakaanak sa kapitbahay nilang si Lester Delos Reyes sa Sitio Kampuklo nang biglang dumating ang armadong suspek. Dito na ito nagpaulan ng bala.

Dali-daling tumakas ang suspek matapos ang pamamaril ngunit nadakip din ito ng mga pulis sa isang hot pursuit operation.

Kinasuhan na ng murder at two counts of frustrated murder ang suspek.

Hinatulang guilty ng korte sa Angeles City, Pampanga, ang tatlong lalaking pumatay ng aso para gawing pulutan.

Batay sa ulat, nakatanggap ang City Veterinary Office noong February 4 ng reklamo na may naganap na pagpatay sa isang aso sa Barangay Lourdes Sur.

Agad na umaksyon ang naturang opisina sa pamumuno ni Eder Pasamonte.

Dito na nahuling nagluluto ng aso ang tatlong suspek na kinilalang sina Amorsolo David Guevarra, Renato Halili, at Jerry Locading Mari.

Ipinag-utos ni Mayor Camelo Lazatin Jr. na sampahan ng kaso ang mga suspek na sa kalaunan, hinatulang guilty ng Angeles City Municipal Trial Court Branch 3.

Mahaharap sa kasong paglabag sa Republic Act 8485 o Animal Welfare Act of 1998 ang mga suspek. Pinagmumullta ang mga ito P6,000 bawat isa.

Tatlo katao ang binawian ng buhay matapos mabangga ng pickup truck ang kanilang sinasakyang tricycle sa Brgy. Tinoto, Maasim, Sarangani.

Batay sa ulat ng Police Regional Office-12 sa General Santos City, dead on arrival ang mga pasahero ng tricycle na kinilalang sina Loreto Zamora, Jomar Pilon, at Erwin Pilon dahil sa mga tinamong sugat sa iba’t ibang bahagi ng katawan.

Ayon sa salaysay, galing sa isang beach resort ang mga biktima nang mabundol ang kanilang sinasakyang tricycle ng isang itim na Toyota Hilux pickup truck na minamaneho ni Lilian Zamora.

Nawasak ang tricycle habang nagtamo ng malaking pinsala ang sasakyan ni Zamora na gumilid pa sa highway at nakahagip ng isang bahay.

Nasa kustodiya na ng Maasim Municipal Police Station si Zamora at ang pickup truck nitong nasangkot sa aksidente.

Dead on the spot ang isang lalaki, habang isa ang sugatan, sa nangyaring pamamaril sa Brgy. Julugan VIII, Tanza, Cavite.

Batay sa imbestigasyon ng pulisya, naghihintay ng masasakyan sa terminal ng tricycle ang biktimang kinilala bilang alyas “Rjay” nang biglang dumating ang mga suspek na magkaangkas sa isang itim na motorsiklo.

Dito, pinagbabaril ang biktima, at hindi kalaunan, binawian na ng buhay.

Sugatan naman ang isa pang biktimang kinilala bilang alyas “Shinelou.”

Ayon sa ulat, nagpapahinga si Shinelou sa isang kubong hindi kalayuan sa pinangyarihan ng krimen nang matamaan ito ng ligaw na bala.

Kasalukuyan itong inoobserbahan sa pagamutan.

Natagpuang nakasilid sa isang sako sa Barangay Zone 2, Atimonan, Quezon, ang mga labi ng isang batang babaeng pinaghihinalaang ginahasa.

Sa ulat ng Atimonan Police, nagtungo sa istasyon ang mangangalakal na si Peter Aureada, kasama ang isang siyam na taong gulang na lalaki, kung saan nila iniulat ang pagkakadiskubre sa labi ng biktimang itinago sa pangalang “Mae”.

Natuklasang wala nang pang-ibabang saplot ang biktima.

Batay sa ginawang backtracking sa CCTV, nakitang naglalakad ang biktima kasama si Aureada, kaya agad itong inaresto.

Ayon sa pulisya, nagkunwaring concerned citizen ang suspek sa pamamagitan ng pag-report ng insidente upang makaiwas sa krimen.

Nahaharap ang suspek sa reklamong rape with homicide.

Samantala, nasa kustodiya na ng Municipal Social Welfare and Development Office (MSWDO) ang batang lalaking kasama ng suspek.

Dead on the spot ang isang naka-motorsiklong lalaki matapos itong pagbabarilin ng mga naka-kotseng suspek sa Infanta, Quezon.

Sa imbestigasyon ng Infanta Police, patungo sa infanta Town Proper ang biktimang si Manuelito Junio,41- anyos nang buntutan ito ng itim na kotse ng mga salarin.

Nang makatiyempo, sinabayan ng kotse ang motorsiklo at saka pinagbabaril ng gunmen ang biktima.

Dahil sa natamo nitong tama ng baril sa iba’t ibang bahagi ng katawan agad itong nalagutan ng hininga.

Tumakas ang mga suspek patungo sa direksyon ng bayan ng real.

Nangangalap na ng mga kuha sa mga CCTV camera ang mga awtoridad para matukoy ang mga salarin at ang motibo sa pamamaslang.

Sugatan ang isang lola matapos pagtatagain sa ulo ng isang tricycle driver sa San Miguel, Manila.

Batay sa ulat ng Manila Police District Public Information Office, nangyari ang krimen dahil napagkamalan ang 65-year-old na biktimang si Gloria Mahilac bilang isang mangkukulam.

Sa kuha ng CCTV, makikita ang suspek na sinusundan ang biktima habang naglalakad sa isang eskinita sa Rawatun St., patungo sa bahay ng kanyang anak.

Matapos ang ilang sandali, bigla na lang pinagtataga ng suspek ang lola.

Kahit sugatan, nagawa pa rin ng biktimang makahingi ng tulong sa kanyang anak, at agad itong naisugod sa ospital.

Mabilis namang umaksyon ang mga opisyal ng barangay at inaresto ang suspek na kinilalang si Jabbar Mocaebat, 29-year-old na tricycle driver at residente ng Pimbago St.

Mahaharap si Mocaebat sa kasong frustrated murder.

Samantala, kasalukuyang ginagamot sa Jose R. Reyes Memorial Medical Center ang biktima.

Nasawi ang apat na miyembro ng isang pamilya, habang siyam ang sagutan, matapos sumiklab ang isang sunog sa Brgy. Tinago, Cebu City.

Kinilala ang mga biktimang sina Parolito at Rosita Otadoy; at ang mga anak nitong sina Joseph at Jeffrey, parehong binatilyo. Natagpuan ang pamilya na natusta ng apoy sa loob ng kanilang natupok na tahanan sa Sitio Sta. Lucia.

Sa ulat ni Fire Office 3 Fubert Navarro ng Cebu City Bureau of Fire Protection (BFP), nagsimula ang sunog bandang ala una ng madaling araw nitong Martes, February 27. Mabilis itong kumalat sa mga katabing bahay.

Umabot ang sunog na tumupok sa 16 na kabahayan sa ikaapat na alarma. Agad namang rumesponde ang mga bumbero upang maapula ang apoy na tumagal ng apat na oras.

Tinatayang higit sa P7 million ang halaga ng mga napinsala ng naturang sunog.