RONDA PROBINSYA

Away ng magkalabang gang ang isa sa sinisilip na motibo ng awtoridad sa pamamaslang sa 2 menor-de-edad sa Cabanatuan City.

Ito’y makaraang may lumutang na testigo sa pagpatay sa mga biktima na ngayo’y hawak na ng mga pulis para sa kanyang kaligtasan.

Ayon sa testigo, pinatay ang mga biktima na sina Kyle Joseph Dela Cruz at Jamil Fermin ng nasa 8 suspek na hindi muna pinangalanan ng mga pulis.

Nangyari ang pamamaslang, matapos dumalo ang 2 biktima sa debut ng kanilang kaibigan.

Nang pauwi na mula sa debut ang mga biktima nang harangin ng grupo ng kabataan na miyembro ng isang gang

Kitang-kita ng testigo ang mga hawak na baseball bat, kadena at tubo ng mga suspek habang sakal sa leeg ang mga biktima.

Sa ngayon ay inihahanda na ng pulisya ang pagsasampa ng kasong double murder laban sa 8 suspek.

Arestado ang isang construction worker at ang kasamahan nito matapos mahulihan ng higit sa kalahating milyong halaga ng shabu sa isinagawang buy-bust operation sa Brgy. Tayuman, Binangonan, Rizal.

Kinilala ng Rizal Police Provincial Office (Rizal PPO) ang mga suspek bilang sina “Arjay,” isang residente mula sa Binangonan, at “Nano,” mula naman sa Morong.

Narekober sa operasyon ang 8 pakete ng shabu, isang motorsiklo, at buy-bust money.

Kasalukuyang nakakulong ang mga suspek sa Binangonan Custodial Facility at nahaharap sa kasong paglabag sa Republic Act No. 9165 o Comprehensive Dangerous Drugs Act of 2002.

Natagpuang nagpapalutang-lutang ang bangkay ng isang estudyanteng pinaghihinalaang ginahasa sa isang ilog sa Brgy. Balangobong, Lingayen, Pangasinan.

Kinilala ang biktimang si Alyssa Manzano Bolasoc, isang 21 anyos na third-year student mula sa Pangasinan State University (PSU).

Nadiskubre ng isang mangingisda ang biktima na agad ring iniulat sa pulisya.

Nagsagawa ng follow-up investigation ang pulisya kung saan naaresto ang suspek na si Jessie Aquino Soriano, isang 32 anyos na solar panel installer.

Nasa ilalim na ng kustodiya ng pulisya ang suspek at nahaharap sa mga kaukulang kaso.

Isang jail guard ang nasawi matapos barilin habang papasok sa kanyang trabaho sa Ilocos Sur Provincial Jail sa Brgy. Taleb, Bantay, Ilocos Sur.

Kinilala ang biktimang si Jayson Barrientos Parchmento, isang 45 anyos na dating pulis at kasalukuyang nagtratrabaho bilang Prison Guard 3.

Batay sa imbestigasyon, minamaneho ng biktima ng kanyang sasakyan nang bigla itong pinaputukan ng mga hindi pa nakikilalang gunman.

Mabilis na tumakas ang mga suspek.

Binawian naman ng buhay ang biktima habang papunta sa pagamutan.

Kasalukuyang nagsasagawa ang pulisya ng follow-up investigation.

Higit sa 27,500 fully grown marijuana plants na nagkakahalaga ng P5.5 million ang binunot at sinunog ng pulisya sa isinagawang dalawang araw na eradication operation sa Tinglayan, Kalinga.

Ayon kay Police Capt. Ruff Manganip, spokesperson ng Kalinga police, unang nadiskubre ng kanilang operating units ang 20,000 na pananim ng marijuana sa isang lupain sa Brgy. Loccong.

Kinabukasan, isa pang plantasyon ng marijuana ang natagpuan sa kalapit na lugar kung saan binunot ang 7,500 fully grown marijuana plants.

Sinunog ang mga naturang pananim, habang dinala ang ilang samples sa provincial police headquarters para sa documentation at proper disposition.

Kasalukuyang nagsasagawa ang pulisya ng follow-up investigation upang matukoy kung sino ang mga nagtanim nito.

Natagpuang walang buhay sa isang bangin sa Brgy. Igmaya-an, Don Salvador Benedicto, Negros Occidental ang isang lalaking pinaghihinalaang biktima ng salvage o summary execution.

Kinilala ang biktimang si Allen Palmos, isang 29-year-old dispatcher mula sa Fortune Towne, Brgy. Estefania, Bacolod City.

Nakatali ng itim na cable tie ang kanyang mga kamay, habang nakabalot ang kanyang ulo ng sarili nitong T-shirt, nang matagpuan ang biktima ng isang menor de edad.

Ayon kay Police Capt. Ignacio Javier, deputy chief ng Don Salvador Benedicto Municipal Police Station, hindi pa matiyak ang motibo sa pagpatay. Gayunman, tiniyak niyang patuloy na iniimbestigahan ang insidente.

Dead on the spot ang isang 51 anyos na babae matapos itong pagbabarilin ng isang kagawad sa Brgy. Pag-olingin West, Lipa City, Batangas.

Kinilala ang biktimang si Marilyn Escartin mula sa San Juan, Batangas.

Batay sa imbestigasyon, naglalakad si Escartin nang lapitan ito ng suspek na si alyas “Joey,” isang kagawad mula sa Brgy. Pag-olingin East.

Mabilis itong tumakas matapos paputukan ng ilang beses ang biktima.

Hindi na naisugod sa pagamutan ang biktima dahil agad itong nawalan ng buhay.

Patuloy na inaalam ang posibleng motibo sa krimen.

Kasalukuyan nang nagsasagawa ng follow-up investigation at manhunt operation ng pulisya upang mahuli ang suspek.

Natagpuan ang mga labi ng isang bagong silang na sanggol sa baybayin ng Brgy. Old Sagay, Sagay City, Negros Occidental.

Ayon kay Police Lieutenant Hannah Banquil, deputy chief ng Sagay City Police Station, isang concerned citizen ang nakakita sa sanggol na nakabalot sa itim na tela at nakasilid sa loob ng isang eco-bag at box.

Bloated na ang ulo ng sanggol, habang nakadikit pa rin sa katawan ang kanyang inunan at pusod.

Pinaniniwalaang tatlong araw na itong patay.

Hindi pa masabi ng pulisya kung buhay pa ang sanggol nang iniwan ito ng kanyang magulang.

Posible ring nasawi ang sanggol dahil sa pagkalunod at inianod sa lugar.

Hinikayat naman ni Police Lieutenant Banquil ang mga magulang ng bata na magpakilala upang matulungan ng pulisya.

Natagpuang walang buhay at tadtad ng saksak ang isang kasambahay sa Brgy. Santa Cruz, Palo, Leyte.

Kinilala ang biktimang si Dylen, 31, mula sa Brgy. San Antonio, Palo.

Nakatanggap ng ulat ang pulisya ukol dito nang tinawagan sila ng kapitbahay ng biktima.

Huling nakitang buhay si Dylen bandang 1 p.m.

Samantalang nadiskubre ang biktima ng kanyang live-in partner sa isang nirentahang apartment sa lugar bandang 6:30 p.m.

Nagsasagawa na ang pulisya ng follow-up investigation.

Kinumpirma na isang drug personality ang nagmamay-ari ng ilang bahagi ng katawan na iniwan sa harapan ng National Bureau of Investigation (NBI) office sa Bacolod City.

Matatandaang kamakailan, nadiskubre ang isang sako kung saan nakalagay ang dalawang braso, dalawang tenga, at kaliwang hita ng isang lalaki sa harap ng NBI Office sa Aguinaldo St.

Ayon kay NBI Bacolod City chief Renoir Baldovio, nakilala nila ang may-ari ng chinop-chop na katawan dahil sa mga lead na ibinigay sa kanila ng informant.

Gayunman, hindi muna pinangalanan ang biktima dahil patuloy pa rin ang kanilang ginagawang verification mula sa technical division ng NBI Manila.

Pinaghihinalaang pananakot ang motibo sa likod ng krimen upang ipatigil ang aktibong kampanya ng lungsod kontra sa iligal na pasugalan.

Patuloy pa rin ang imbestigasyon ng Bacolod City Police Office (BCPO) sa naturang kaso.