RONDA PROBINSYA

Umabot sa P2.3 milyong halaga ng marijuana ang nasabat ng mga awtoridad sa isang liblib na barangay sa border ng Sarangani at Davao del Sur.

Ayon kay Sarangani provincial police director Police Col. Deanry Francisco, nadiskubre ang 11,500 fully grown marijuana plants sa isang kalahating ektaryang plantasyon sa border ng Malungon, Sarangani at Kiblawan, Davao del Sur.

Nakatakas naman ang nagtanim ng marijuana na kinilalang si “Sinaya” bago makarating ang operating team.

Isang 14 anyos na lalaki ang binawian ng buhay matapos malunod sa isang irrigation canal sa Brgy. San Antonio, Ramon, Isabela.

Kinilala ang biktimang si Mark Lester Gregorio, isang grade 6 student mula sa Brgy. Planas.

Batay sa imbestigasyon ng Ramon Police Station, nagkayayaan ang biktima at kaklase nito na maligo sa isang irrigation canal.

Biglang umayaw ang kasamahan niya nang makarating na sila sa irigasyon, kaya naman si Gregorio na lang ang mag-isang naligo.

Hindi na nakauwi ang biktima sa kanilang bahay, hanggang sa nakita na lang na palutang-lutang ang katawan nito sa main irrigation canal ng Brgy. San Antonio.

Nagpaalala naman si Police Corporal Edmar Concepcion sa mga estudyante na maging maingat sa paglangoy sa mga irigasyon at ilog.

Binawian ng buhay ang isang 63 anyos na lalaki matapos itong makuryente habang nangingisda sa isang irrigation canal sa Brgy. Villa Domingo, Angadanan, Isabela.

Kinilala ang biktimang si Dominador Abad, isang residente mula sa Purok 1, Brgy. San Antonio, Cauayan City.

Ayon sa pulisya, maaaring nadulas ang biktima at nahulog sa irrigation canal kung saan ito nakuryente ng ginamit niyang electric fishing device.

Dinala ang biktima sa pinakamalapit na ospital ngunit idineklara na itong dead on arrival.

Arestado ang isang Russian at ang dalawang Pilipino sa isang pinaghihinalaang drug den sa Brgy. Basdio, Loon, Bohol.

Batay sa ulat, nahuli si Viktor Tutov, 38 anyos na foreigner, kasama ang mga Pinoy na sina Castor Bangco at Jen Panis, sa isang drug den na sinalakay ng Philippine Drug Enforcement Agency (PDEA)-Bohol Provincial Office.

Ayon kay PDEA-Central Visayas spokesperson Leia Alcantara, si Bangco ang tagapangasiwa ng naturang drug den. Magkaibigan aniya sila ni Tutov, kaya laging pumupunta doon ang foreigner.

Nasabat sa isinagawang operasyon ang P240,000 na halaga ng pinaghihinalaang shabu.

Umabot sa kabuuang  P6.7 million ang halaga ng nasabat na shabu at marijuana ng pulisya sa isinagawang anti-illegal drug operations sa Cordillera region.

Arestado rin ang dalawang drug pushers na nakuhaan ng 0.9 grams ng shabu na may standard drug price ng P6,120.

Nasa kustodiya na ng pulisya ang mga suspek at nahaharap sa mga kasong may kinalaman sa droga.

Kaugnay nito, tinatayang 33,800 fully grown marijuana plants at 300 seedlings na nagkakahalaga ng P6.7 million ang binunot at sinunog sa pitong plantation sites sa Benguet at Kalinga.

Kasalukuyang nagsasagawa ng follow-up operations ang pulisya upang mahanap ang iba pang plantasyon at cultivators ng marijuana.

Isang tatlong taong gulang na batang babae ang sugatan matapos masunog ang kanilang bahay sa Brgy. San Vicente, Ormoc City, Leyte.

Batay sa imbestigasyon, umalis ang 21 anyos na ina ng bata sa kanilang tahanan sa Purok Avocado upang mangutang ng pambili ng pagkain.

Nagsimula ang sunog nang pinaglaruan ng bata ang posporo sa kanilang sala.

Mabilis na kumalat ang apoy na naapula matapos ang isang oras.

Dinala ang biktima sa Ormoc District Hospital.

Tinatayang aabot sa P5,000 ang halaga ng napinsalang ari-arian dahil sa nangyaring sunog.

Tinatayang 8,000 residente sa Maguindanao del Sur ang nakatanggap ng Ramadan packs mula sa Islamic Relief Philippines.

Ipinamahagi ang Ramadan packs sa mga Muslim na residente ng Brgy.  Bagoenged, Buliok, Inug-og, at Kudal sa Pagalungan.

Naglalaman ang isang Ramadan pack ng 50 kilos ng bigas, tatlong kilong munggo, dalawang kilong asukal, dalawang kilong all-purpose flour, dalawang kilong noodles, isang kilong native coffee, dalawang litrong mantika, at anim na lata ng halal corned beef.

Ayon sa Islamic Relief Philippines, inaasahang susuportahan ng naturang relief packs ang fasting ng mga nabigyang pamilya.

Aabot sa 200 kilo ng pinatuyong dahon ng marijuana ang nasabat sa Manila International Container Port.

Isinagawa ang interdiction operation ng pinagsanib na pwersa ng Bureau of Customs, Philippine Drug Enforcement Agency at Philippine National Police.

Isinilid sa limang “Balikbayan” Boxes sa M.I.C.P. Ang mga iligal na droga na nagkakahalaga  ng mahigit P283- M

Wala namang naaresto sa nasabing operasyon habang tinututunan na kung kanino nakapangalan ang kontrabando.

Samantala, pinapurihan ni Customs Commissioner Bienvenido Rubio ang mga kinatawan ng aduwana sa maigting na pagpapatupad ng mga hakbang upang maharang ang mga iligal na droga na tinatangkang ipuslit sa bansa.

Binawian ng buhay ang isang transgender  matapos pagtulungang gulpihin ng kapwa miyembro ng LGBTQ sa Pasig City.

Batay sa ulat, nakipag-inuman ang  biktimang alyas Shaina kasama ang dalawang kaibigan nito sa Barangay Pineda.

Biniro umano ng biktima ang isa nitong kaibigan kaya inawat sya ng isa pa nyang kaibigan na kapwa LGBTQ member ngunit ayaw magpaawat ng biktima.

Napikon ang kaibigan nya na kapwa LGBTQ at sinakal siya hanggang hindi na makahinga.

Imbes na awatin ang magkaibigan ay kapwa tinulungan pang gulpihin ang biktima hanggang sa may lumabas na dugo sa tenga, ilong, at bibig nito.

Nakauwi pa si alyas Shaina ng bahay matapos ang panggugulpi at makaraan ang ilang araw ay dumadaing na masakit ang kanyang ulo kaya’t agad dinala sa ospital.

Sa kasamaang palad ay binawian ng buhay ang  biktima.

Ayon sa Pasig City Police, hindi matukoy sa  dalawang suspek kung sino ang labis na nakasakit sa biktima.

Hawak na ng otoridad ang mga salarin na nahaharap sa kasong homicide.