RONDA PROBINSYA

Nauwi sa trahedya ang pagsasanay ng isang 16-anyos na estudyanteng atleta  sa Laoag City, Ilocos Norte.

Sa report, ang biktima ay kasalukuyang nagsasanay kasama ang iba pang mga atleta sa oval ground ng Northwestern University ng nasabing lugar nang mangyari ang insidente.

Habang tumatakbo ang biktima kasama ang isa pang atleta patawid sa oval field ay sumabit ang mga ito sa goal post.

Dahil dito ay aksidente namang natumba ang goal post kung saan tinamaan ng bakal sa ulo ang biktima pagbagsak nito sa lupa.

Agad namang sumaklolo  ang mga staff ng eskuwelahan at mabilis na isinugod sa pagamutan ang atleta.

Gayunman ay nabigo nang mailigtas ng mga doktor sanhi ng matinding pinsala na tinamo sa ulo.

Nauwi sa habulan at palitan ng putok ang ikinasang pagsalakay ng pulisya laban sa isang wanted na robbery gang member sa Lemery, Batangas

Patay ang suspek na nagtamo ng mga tama ng bala sa katawan na nakilalang si Alyas Kelly, 28-anyos,

Ayon sa awtoridad, bitbit ang nasabing warrant para sa 2 kaso ng  “robbery”, tinungo ng raiding team ang bahay ng suspek sa nasabing lugar.

Gayunman, hindi pa man nakakalapit ang mga pulis sa bahay ng suspek ay sinalubong na umano sila ng sunud-sunod na putok ng baril mula sa suspek na mabilis na tumakas

Dito na nauwi sa palitan ng putok at habulan na tumagal din ng ilang minuto hanggang sa makorner at mapatay ang suspek.

Masaklap ang sinapit ng isang backhoe operator makaraang magulungan at madaganan ng malaking tipak ng bato sanhi ng kanyang agarang kamatayan sa isang quarry site sa Tuy, Batangas.

Kinilala ng awtoridad ang biktima na si Bebon Caliso, 34-anyos

Ayon sa isinagawang imbestigasyon ng mga pulis, nasa loob ng backhoe habang nananghalian ang biktima sa naturang lugar nang biglang gumulong ang malaking tipak ng bato mula sa itaas ng quarry site at natumbok ang backhoe.

Patuloy naman ang imbestigahan sa natu­rang insidente kung nagkaroon ng pagkukulang sa “safety measures” Ang nagmamay ari ng quar­ry at kung may kaukulan itong dokumento.

Wala ng buhay nang matagpuan ng mga awtoridad ang dalawang bata sa loob ng isang sassakyan Angeles City, Pampanga

Ang dalawang paslit na nagkakaedad ng 2- taong gulang  at        3 – taong gulang ay nadiskubre ng may-ari na sa loob ng sasakyan at wala ng buhay.

Sa inisyal na ulat ng Angeles City Police, ipinarada ni Jaypee Santos ang kaniyang sasakyan sa harapan ng kanilang tahanan sa Brgy. Malabanias ng lungsod.

Gayunman, ilang oras matapos nitong iparada ang nasabing ay laking gulat niya nang makitang may dalawang bata sa loob nito na kapwa nakahandusay.

Sa kuha ng CCTV, makikita ang 2 bata na naglalaro at bunga ng matinding kalikutan ay nagawang mabuksan ang kanang pintuan ng kotse kung saan sila pumasok.

Gayunman, nabigong makalabas na ang 2 paslit na nakulong sa loob ng kotse kung saan matindi ang init ng panahon.

Pinaniniwalaan namang na-suffocate sa loob ng kotse ang dalawang biktima bukod pa sa napakatindi ng nararanasang mainit na panahon sa lugar.

Nangako naman ang pamahalaang lungsod na bibigyan ng pinansyal na ayuda ang naulilang pamilya ng mga biktima.

Isinasailalim pa ng mga awtoridad sa masusing imbestigasyon ang kaso at tinitingnan kung may pananagutan ang may-ari ng sasakyan sa pagkasawi ng dalawang bata.

Isang bagong silang na sanggol ang natagpuang walang buhay sa dalampasigan sa Brgy. Darapidap, Candon City, Ilocos Sur.

Nadiskubre ng isang lalaking residente ng nasabing lugar ang mga labi ng sanggol, malapit sa isang plastic bag na pinaghihinalaang ginamit na pantakip dito.

Agad itong ipinagbigay-alam ng lalaki sa mga awtoridad.

Patuloy na nagsasagawa ng imbestigasyon ang Candon City Police Station upang matukoy ang biktima at ang mga taong responsable sa pag-abandona rito.

Patay ang isang lalaki matapos itong barilin ng pinaghihinalaang kalaguyo ng kanyang live-in partner sa kanilang tirahan sa Brgy. Zone 14-A, Talisay City, Negros Occidental.

Kinilala ang biktimang si Jaylord Lamag, 28 anyos.

Batay sa imbestigasyon, natutulog ang biktima kasama ang kanyang live-in partner nang dumating ang 40 anyos na suspek.

Biglang nagising ang biktima dahil sa tahol ng mga aso. Nang lumabas ito upang silipin kung ano ang nangyayari, dito na siya binaril ng suspek.

Idinala ang biktima sa ospital kung saan ito nawalan ng buhay dahil sa tama ng bala sa batok.

Arestado naman ang suspek na nagtago sa bahay ng kanyang kaibigan sa Brgy. Dos Hermanas at sasampahan ng kasong murder.

Nakatanggap ng tulong pinansyal at pangkabuhayan ang 14 na dating miyembro ng Communist Party of the Philippines-New People’s Army (CPP-NPA) sa Brgy. Agan-an, Sibulan, Negros Oriental.

Ang mga natanggap na benepisyo ng mga sumukong rebelde ay mula sa Enhanced-Comprehensive Local Integration Program (E-CLIP) ng Department of the Interior and Local Government (DILG).

Nagkaloob din ng P5,000 cash assistance ang Provincial Veterinary Office sa bawat beneficiary.

Bukod rito, nagbigay ang Provincial Agriculture Office ng native chicken, vegetable seedlings, at reading materials; habang isang sako ng bigas at food packs ang ipinamahagi ni Gov. Manuel Sagarbarria sa pamamagitan ng Provincial Social Welfare and Development Office.

Dead on the spot ang isang lalaki, habang sugatan ang asawa nito, sa nangyaring pamamaril sa Antipolo, Rizal.

Batay sa ulat, nagmamaneho ng sedan ang biktimang kinilalang si Abad Antonius Lazaro, 48 anyos, sakay ang asawa nitong si Grace, nang pinagbabaril ang mga ito ng mga naka-motorsiklong suspek sa kahabaan ng Sumulong Highway sa Brgy. Mayamot.

Namatay ang lalaki sa pinangyarihan ng krimen, habang natamaan ng bala sa binti ang asawa nito at kasalukuyang nagpapagaling sa ospital.

Iniimbestigahan na ang pagkakakilanlan ng mga suspek at ang mga posibleng motibo sa likod ng krimen.

Arestado ang isang grab rider matapos makuhaan ng iligal na droga sa ikinasang buy bust operation sa Taguig City.

Kinilala ang suspek na si alyas Mocki na isang High Value Individual pagdating sa illegal drugs.

Nasamsam ang tinatayang nasa 50 gramo ng shabu na nagkakahalaga ng P340,000 maging ang ginamit na buy bust money, cellphone na naglalaman ng lahat ng transaksyon sa iligal  na droga.

Nahaharap ang suspek sa kasong paglabag sa Republic Act of 1965 o Dangerous Drugs Act of 2002.

Nadatnang hubo’t hubad ang isang public school teacher at kanyang umano’y kalaguyo sa loob ng silid aralan Aringay, La Union.

Kinilala ng awtoridad ang guro na si Jonnalyn Dolatre, 41 anyos, at ang kanyang kalaguyo na si Chester Gabin, 40 anyos, ay nahuli sa akto ng mister ng guro na si Donald Dolatre, 45- anyos, at anak nito sa loob ng classroom na umano’y nagtatalik

Nabatid na bago ang insidente na pupunta sa paaralan ang mag-ama para bisitahin si Jonalyn at ganun na lamang ang kanilang pagkabigla sa pagbukas nila ng pinto ay nakita ang mag-lover na kapwa hubo’t hubad na nagkapatong sa plastic bench.

Ayon kay Donald na ang kanyang kamag-anak at mga kaibigan ay nagsabi sa kanya na ang misis nito ay sekretong nakikipagtagpo kay Chester.

Inamin din ni Donald na matagal na silang hiwalay ni Jonnalyn, subalit kakasuhan niya pa rin ang dalawang mag-lover.