RONDA PROBINSYA

Nasabat ng awtoridad ang P4.7-M  na halaga na mga Smuggled Cigarettes sa isinagawang operasyon ng awtoridad sa Davao City.

Kinilala ng Davao City Police Office ang mga naarestong suspek na sina alyas Edgardo, 32-anyos at alyas Johnrey, 30-anyos

Nakuha sa mga suspek ang 150 kahon na naglalaman 7,500 reams na mga ipinuslit na sigarilyo

Tinurn-over naman sa tanggapan ng Bureau of Customs- Davao ang mga nakumpiskang iligal na sigarilyo, kasabay ng pagsasampa ng kasong paglabag sa National Internal Revenue Code of 1997 laban sa mga suspek.

Napatay ng isang ama ang sarili nitong anak matapos saktan ang kanyang sariling ina makaraan ang kanilang matinding argumento sa Lahug, Cebu City

Kinilala ang nasawing biktima na si Kenn Caballes, 28-anyos.

Sa report ng Cebu City Police, nangyari ang insidente sa loob ng tahanan ng pamilya Caballes sa nasabing lungsod.

Nagtatalo umano ang mag-inang Caballes na humantong sa pananakit ng biktima sa kaniyang ina

Tinangkang namang awatin ng Padre de Pamilya ang anak pero siya naman ang napagbalingan nitong saktan gamit ang isang tabla o kahoy.

Dito na nagdilim ang paningin ng matandang Caballes kaya bigla nitong kinuha ang isang baril saka pinagbabaril ang anak.

Arestado at nahaharap sa kasong Parricide ang ama na si Eugenio Caballes, 63 -anyos.

Binawian ng buhay ang 3 manggagawa ng isang construction firm matapos na mahulog at ma-suffocate sa 14-meter-deep sewer manhole sa Quezon City.

Kinilala ng awtoridad, ang mga biktima na sina Arnel Dela Peña, Cedie Paligutan, 26-  anyos, at Gabriel Constantino,

Nasawi ang mga biktima sa manhole sa ilalim ng flyover sa kahabaan ng katipunan avenue sa Barangay Loyola Heights

Ang mga biktima at kanilang superbisor ay ipinadala upang magsagawa ng infiltration at exfiltration test sa bagong gawang manhole.

Si Dela Peña ang unang bumaba ngunit siya ay bumagsak sa landing platform.

Sa halip na tumawag ng mga rescuer mula sa Bureau of Fire Protection at lokal na pamahalaan, inatasan ng supervisor sina paligutan at constantino na iligtas si Dela Peña, ngunit bumagsak din ang mga ito.

Mabilis namang naisugod ang mga biktima ngunit ideneklara na itong dead on arrival sa ospital

Patuloy namang iniimbestigahan na ng awtoridad insedente.

Dead on the spot ang isang 28 anyos na lalaki matapos itong barilin ng kanyang sariling ama sa Brgy. Lahug, Cebu City.

Kinilala ang suspek na si Eugenio Caballes, 63 anyos.

Ayon sa asawa ng suspek at ina ng biktima na si Louisa, ilang beses nang nanggulo sa kanilang bahay ang kanyang anak, lalo na kapag nakagamit ito ng ilegal na droga.

Batay sa salaysay, inutusan ni Louisa ang biktimang si Kenn na patayin ang mga ilaw sa kanilang bahay.

Makalipas ang ilang oras, napansin niyang nakabukas pa rin ang mga ilaw, kaya pinaalalahanan niya ulit ang anak.

Dito na nagalit si Kenn sa kanyang ina. Sinuway ito ni Eugenio at nagsimula nang magtalo ang mag-ama.

Lumabas si Eugenio ng kanilang bahay at bumalik nang may dalang baril upang takutin ang anak. Sinalubong siya ni Kenn na nanghampas sa kanya ng kahoy sa leeg.

Nang bumagsak si Eugenio sa lupa, pumutok ang baril at natamaan nito sa ulo ang anak.

Kusang sumuko ang suspek sa mga pulis at kasalukuyang nasa ilalim ng kustodiya ng Mabolo Police Station.

Kinumpirma ng Department of Agriculture Regional Field Office 8 na mayroon nang naitalang unang kaso ng avian influenza o bird flu sa Eastern Visayas.

Ayon kay DA-8 Regional Director Andrew Orais, posibleng kumalat ang virus dahil sa migratory birds.

Noong nakaraang buwan, napansin ng ilang magsasaka na namamaga ang ulo at nahihirapang huminga ang kanilang mga manok, kasabay ng pagkakaroon ng mga ito ng sipon.

Iniulat ito sa lokal na pamahalaan ng Kanaga at nagsagawa ng rapid tests. Dito na lumabas ang positibong resulta ng bird flu.

Pagtitiyak ni Orais, kontrolado ang kondisyon ng virus sa lugar dahil nasa loob lamang ito ng farm.

Tatlong batang Philippine Serpent Eagles ang matagumpay na nasagip mula sa sunog sa isang kagubatan sa Villaverde, Bayombong, Nueva Vizcaya.

Ayon sa rescuer na si Dave Acosta, nahulog ang isang agila mula sa puno. Ito ang naging dahilan upang matuklasan ang dalawa pang ibon.

Pinakain ito ni Acosta sa loob ng tatlong araw at sa kalaunan, ibinigay sa Provincial Environment and Natural Resources Office (PENRO) Nueva Vizcaya Satellite Office.

Idinala ang mga agila sa Provincial Veterinary Office para sa examination at diagnosis.

Pansamantalang aalagaan ng Northern Exotics and Wildlife Troopers ang mga agila, hanggang sa magkaroon ang mga ito ng sariling kakayahan na lumipad at mabuhay sa kagubatan.

Patay ang isang pinaghihinalaang notorious na magnanakaw matapos itong barilin sa loob ng isang computer shop sa Brgy. 2, Bacolod City.

Kinilala ang biktimang si Benjoe San Jose, 26 anyos.

Batay sa imbestigasyon, naglalaro ng computer game ang biktima nang pumasok ang tatlong hindi pa nakikilalang suspek sa computer shop.

Inutusan ng mga ito ang ibang customers lumabas at maya maya pa, narinig na ang mga putok ng baril.

Nagtamo ng mga tama ng bala sa ulo at likod ang biktima at isinugod pa sa ospital, ngunit binawian din ito ng buhay.

Ayon kay Police Capt. Glenn Montaño, head ng Police Station 2, posibleng paghihiganti ang naging motibo sa likod ng krimen.

Naaresto na noon ang biktima dahil sa mga kasong theft, alarm and scandal, resistance, at disobedience to person in authority.

Marami na rin itong natanggap na reklamong may kinalaman sa robbery, ngunit walang kasong isinampa sa kanya ukol dito.

Sugatan ang isang 6-anyos na batang babae matapos saksakin ng icepick sa loob ng paaralan Kabankalan City, Negros Occidental.

Ayon sa Kabankalan Police Station, nakatarak pa ang ice-pick sa dibdib ng biktima nang isugod sa ospital

Nasa kustodiya na ng mga pulis ang 34-anyos na lalaking suspek na sinasabing mayroong deperensya sa pag-iisip.

Sa imbestigasyon ng awtoridad, naglalaro sa loob ng compound ng isang paaralan ang biktima at iba pang bata nang bigla na lang saksakin ng icepick ng suspek.

Nabatid na unang nagalit ang suspek nang tuksuhin ng ibang bata sa kalsada dahilan upang pumasok ito sa loob ng eskwelahan kung saan naroroon ang biktima at iba pang mga naglalarong bata.

Agad namang nasakote ang suspek na nagtangka pang tumakas.

Pinagsasaksak hanggang sa mapatay ng isang mister ang kaniyang sariling misis sa Imus City, Cavite

Kinilala lang sa alyas na Maribel, 28-anyos

Tumakas naman ang suspek matapos isagawa ang krimen na kinilala sa alyas na Arnold

Sa imbestigasyon ng mga pulis, naganap ang insidente kung saan kasalukuyang nasa trabaho ang biktima sa nasabing mini-resto bilang kahera nang biglang dumating ang asawa nito na dalang patalim.

Agad na tinungo ng suspek ang pwesto ng kaniyang misis at walang sabi-sabing inundayan ng sunud-sunod na saksak.

Duguang humandusay ang biktima habang agad na tumakas ang suspek.

Posible umanong matinding selos ang nagtulak sa nasabing mister kung kaya nito napatay ang kaniyang misis.

Sugatan ang 3 katao matapos pagbabarilin ng hindi pa nakikilalang mga suspek sa Legazpi City, Albay

Ayon sa imbestigasyon ng awtoridad, nag-iinuman sa harap ng tindahan sina Neleo Armenia, 50-anyos at Francisco Alejo, 30 -anyos habang bumibili naman sa nasabi ring tindahan si Noel Maravilla, 54-anyos

Nang sunod-sunod na paputukan ng dalawang hindi nakilalang suspek

Dahil dito, tinamaan ng mga bala ang mga biktima na kapwa mga basketball referee

Mabilis namang isinugod sa ospital habang tumakas ang dalawang suspek patungo sa direksyon ng Brgy. Mariawa.

Narekober naman ang ilang basyo ng bala mula sa pinaniniwalaang M16 Armalite Rifle sa lugar

Pinaghihinalaang mga komunista ang mga suspek na posibleng napagkamalang mga nakasibilyang pulis ang mga biktima habang nasa harap ng tindahan.