RONDA PROBINSYA

Tatlong katao ang nasawi matapos silang tambangan sa magkahiwalay na insidente sa dalawang magkalapit na probinsya ng Bangsamoro Region

Unang nasawi sa ambush ang mga magkapitbahay na sina Abdulgani Ayunan at Latip Hadji Gapor sa Barangay Piers sa Buldon, Maguin­Danao Del Norte.

Ayon sa ulat ng Buldon Municipal Police Station, naglalakad ang dalawa sa isang kalye sa naturang barangay nang tambangan at pagbabarilin ng mga armadong kalalakihan na mabilis nakatakas

Kasunod nito, patay rin ang isang barangay kagawad sa Mamasapano, Maguindanao Del Sur na si Ansari Salim, makaraang tambangan sa isang liblib na lugar

Ayon sa Mamasapano Municipal Police, sakay si Salim at kasamang pulis na si Staff Sergeant Mansor Sianga ng isang pickup truck nang pagbabarilin ng mga lalaking armado na nakaabang sa kanila.

Agad na namatay si Salim bunsod ng mga tama ng bala sa katawan habang nakaligtas si Sianga.

Nagpapatuloy naman ang backtracking ng mga pulis sa pagkakakilalan ng mga suspek sa pananambang

Natagpuang palutang-lutang ang katawan ng isang lalaki sa ilog ng Brgy. Bacayao Sur, Dagupan City.

Kinilala ang biktimang si Ferdinand Gonzales Cuison, 49 anyos mula sa Brgy. Ambuetel, Calasiao, Pangasinan.

Naunang iniulat ang biktima bilang “missing person” sa Calasiao Police ng kanyang live-in partner.

Ayon sa mga opisyal, posibleng nalunod ang biktima sa ilog.

Nasawi ang isang lalaki matapos itong barilin ng kanyang kainuman sa Brgy. Hilub-ang, Calatrava, Negros Occidental.

Kinilala ang biktimang si Junnifer Pancho, 26 anyos.

Batay sa imbestigasyon, parehong dumalo ang biktima at ang 28 anyos na suspek sa kaarawan ng isang kaibigan nang magkaroon ng alitan ang dalawa.

Upang mapigilang lumala ang tensyon, pinayuhan ng isang barangay kagawad ang suspek na umuwi na lang, ngunit sinundan pa rin ito ng biktima.

Dito na naglabas ng baril ang suspek at pinaputukan ang biktima sa dibdib at leeg na naging sanhi ng pagkamatay nito.

Agad namang sumuko ang suspek sa barangay.

Kasalukuyang naghihintay ang mga pulis sa desisyon ng pamilya ng biktima kung magsasampa ang mga ito ng kasong murder laban sa suspek.

Labis ang kalungkutan ng pamilya ng isang batang kalilibing lang sa isang sementeryo sa Koronadal City nang giniba ang kanyang sementadong nitso at tinangkang nakawin ang mga labi nito para gawin umanong “anting-anting” ng mga ‘di kilalang tao nitong Biyernes Santo.

Ayon sa Koronadal City Police Office, bagama’t nailabas na ang halos kalahati ng katawan ng bata, hindi itinuloy ng mga nagtangkang nakawin ito dahil may papalapit sa kanilang kinaroroonan sa Barrio 4 Cemetery sa lungsod kaya sila nagsitakbuhan palayo.

May mga residente ng lungsod at sa mga kalapit na bayan sa probinsya ng South Cotabato na may paniniwala na mabisang anting-anting ang mga tenga at parte ng tuhod ng patay na hindi pa naaagnas.

Isang illegal dealer ng mga assault rifles ang napatay habang arestado naman ang kanyang kasabwat sa isang entrapment operation ng pulisya sa Sultan Kudarat, Maguindanao del Norte

Sa ulat ng Bangsamoro Regional Police, naglabas ng baril at nagpaputok si Datun Mastura, 56-anyos, nang mahalatang mga kasapi ng PNP – CIDG Ang kanilang napagbentahan ng dalawang 5.56  M16 Assault Rifles sa Sitio Mamadra sa Barangay Limbo, Sultan Kudarat kaya nagka-engkwentro na nagresulta sa kanyang kamatayan.

Sugatan sa naturang­palitan ng putok ang isang miyembro ng CIDG – BAR Na si Patrolman Raffy Jacinto, na agad namang naisugod sa ospital upang malapatan ng lunas.

Naaresto naman ng mga kasapi ng CIDG-BAR ang kasabwat ni mastura na si Norodin Sulaiman 33- anyos.

Nahaharap sa kasong paglabag sa Republic Act 10591 na nagbabawal ng pagbebenta ng mga baril at bala at mga pampasabog nang walang pahintulot ng National Headquarters ng Philippine National Police.

Dead on the spot ang isang lalaki matapos paghahatawin ng matigas na bagay sa ulo ng sariling pamangkin Bacoor City, Cavite.

Kinilala ng awtoridad ang biktima na si Nazario Bueno, sa imbestigasyon ng pulisya, naganap ang insidente habang nasa kasarapan ng tulog ang biktima sa loob ng kanilang bahay nang dumating ang pamangkin na si alyas “Rolly” na lasing.

Sa hindi malamang dahilan, bigla na lamang umanong dumampot ng matigas na bagay at dito pinaghahataw ang ulo ng biktima.

Paulit-ulit umanong pinaghahataw ng suspek ang ulo ng tiyuhin at nang mapagod ay saka lamang tumigil.

Pinalalagay namang dahil sa sobrang kalasingan ng suspek ay inakalang aso na nakapasok sa kanilang bahay ang tiyuhin na natutulog kung kaya nito pinaghahataw.

Hindi na umabot pang buhay sa pagamutan ang biktima habang hawak ng pulisya ang suspek para sa kaukulang disposisyon

Nasabat ng awtoridad ang P4.7-M  na halaga na mga Smuggled Cigarettes sa isinagawang operasyon ng awtoridad sa Davao City.

Kinilala ng Davao City Police Office ang mga naarestong suspek na sina alyas Edgardo, 32-anyos at alyas Johnrey, 30-anyos

Nakuha sa mga suspek ang 150 kahon na naglalaman 7,500 reams na mga ipinuslit na sigarilyo

Tinurn-over naman sa tanggapan ng Bureau of Customs- Davao ang mga nakumpiskang iligal na sigarilyo, kasabay ng pagsasampa ng kasong paglabag sa National Internal Revenue Code of 1997 laban sa mga suspek.

Napatay ng isang ama ang sarili nitong anak matapos saktan ang kanyang sariling ina makaraan ang kanilang matinding argumento sa Lahug, Cebu City

Kinilala ang nasawing biktima na si Kenn Caballes, 28-anyos.

Sa report ng Cebu City Police, nangyari ang insidente sa loob ng tahanan ng pamilya Caballes sa nasabing lungsod.

Nagtatalo umano ang mag-inang Caballes na humantong sa pananakit ng biktima sa kaniyang ina

Tinangkang namang awatin ng Padre de Pamilya ang anak pero siya naman ang napagbalingan nitong saktan gamit ang isang tabla o kahoy.

Dito na nagdilim ang paningin ng matandang Caballes kaya bigla nitong kinuha ang isang baril saka pinagbabaril ang anak.

Arestado at nahaharap sa kasong Parricide ang ama na si Eugenio Caballes, 63 -anyos.

Binawian ng buhay ang 3 manggagawa ng isang construction firm matapos na mahulog at ma-suffocate sa 14-meter-deep sewer manhole sa Quezon City.

Kinilala ng awtoridad, ang mga biktima na sina Arnel Dela Peña, Cedie Paligutan, 26-  anyos, at Gabriel Constantino,

Nasawi ang mga biktima sa manhole sa ilalim ng flyover sa kahabaan ng katipunan avenue sa Barangay Loyola Heights

Ang mga biktima at kanilang superbisor ay ipinadala upang magsagawa ng infiltration at exfiltration test sa bagong gawang manhole.

Si Dela Peña ang unang bumaba ngunit siya ay bumagsak sa landing platform.

Sa halip na tumawag ng mga rescuer mula sa Bureau of Fire Protection at lokal na pamahalaan, inatasan ng supervisor sina paligutan at constantino na iligtas si Dela Peña, ngunit bumagsak din ang mga ito.

Mabilis namang naisugod ang mga biktima ngunit ideneklara na itong dead on arrival sa ospital

Patuloy namang iniimbestigahan na ng awtoridad insedente.

Dead on the spot ang isang 28 anyos na lalaki matapos itong barilin ng kanyang sariling ama sa Brgy. Lahug, Cebu City.

Kinilala ang suspek na si Eugenio Caballes, 63 anyos.

Ayon sa asawa ng suspek at ina ng biktima na si Louisa, ilang beses nang nanggulo sa kanilang bahay ang kanyang anak, lalo na kapag nakagamit ito ng ilegal na droga.

Batay sa salaysay, inutusan ni Louisa ang biktimang si Kenn na patayin ang mga ilaw sa kanilang bahay.

Makalipas ang ilang oras, napansin niyang nakabukas pa rin ang mga ilaw, kaya pinaalalahanan niya ulit ang anak.

Dito na nagalit si Kenn sa kanyang ina. Sinuway ito ni Eugenio at nagsimula nang magtalo ang mag-ama.

Lumabas si Eugenio ng kanilang bahay at bumalik nang may dalang baril upang takutin ang anak. Sinalubong siya ni Kenn na nanghampas sa kanya ng kahoy sa leeg.

Nang bumagsak si Eugenio sa lupa, pumutok ang baril at natamaan nito sa ulo ang anak.

Kusang sumuko ang suspek sa mga pulis at kasalukuyang nasa ilalim ng kustodiya ng Mabolo Police Station.