Nasabat ng mga anti-narcotics operatives ang mahigit 109 grams ng shabu na nagkakahalaga ng P740, 000 sa Pasay City
Ayon sa Southern Police District (SPD) , nakumpiska ang ilegal na droga mula kay Michael Peralta, 37 anyos, na naaresto sa kahabaan ng Roxas Boulevard sa Barangay 76
Bukod sa iligal na droga, nakumpiska rin sa suspek ang kanyang cellphone at motorsiklo
Nakakulong si Peralta sa custodial facility ng Pasay Police at nahaharap sa kasong may kinalaman sa droga.
Malapitang binaril ng hindi pa nakikilalang saalrin ang ang isang trese-anyos na babaeng Grade 8 student habang naglalakad papasok sa paaralan sa Agoncillo, Batangas.
Ayon sa Agoncillo Police Station, inakala umano ng mga tao na naghahatid lang ng estudyante ang suspek.
Matapos barilin ang biktima, tumakas ang salarin sakay ng motorsiklo.
Dead on the spot ang Grade 8 student matapos magtamo ng tama ng bala sa ulo
Nagsasagawa na ng backtracking ang mga pulis sa CCTV footages sa lugar para matukoy ang pagkakakilanlan ng salarin.
Dead on the spot ang isang lalaki matapos itong pagbabarilin ng hindi pa kilalang salarin habang nasa kalagitnaan ng pagsasayaw sa covered court ng Dumanjug, Cebu
Kinilala ng awtoridad ang nasawing biktima na si Josephus Davis Castillo, 29 – anyos
Sa ulat ng pulisya, nangyari ang insidente sa covered court ng Barangay Bitoon
Enjoy na enjoy umano sa pagsasayaw ang biktima nang bigla itong lapitan ng suspek at malapitang pagbabarilin.
Nagkagulo sa lugar at sinamantala ito ng suspek para tumakas.
Patuloy namang inaalam ng pulisya ang pagkakakilanlan ng suspek na tumakas matapos ang krimen.
Dala ang kuha ng CCTV, nagtungo sa istasyon ng pulis ang isang 62 anyos na lalaki sa Silang, Cavite. Reklamo niya, nabiktima siya ng akyat-bahay kung saan natangay ang kanyang P1 million at dalawang laptop.
Sa naturang CCTV footage, makikita ang isang lalaking nakasuot ng itim na hoodie, pantalon, at cap na sumakay sa kotse, dala-dala ang isang bag. Ayon sa biktima, ang lalaking ito ang nanloob sa kanyang tirahan sa Brgy. Poblacion 3.
Ngunit sa imbestigasyon ng mga pulis, lumabas na ang suspek ay walang iba kundi ang mismong lalaking nagsumbong sa kanila!
Agad na inaresto ng mga pulis ang suspek at narekober ang mga ninakaw na pera at gadgets.
Kasalukuyan na siyang nakakulong sa Silang Municipal Police Station at nahaharap sa reklamong perjury dahil sa maling reklamo ng krimen.
Samantala, tumanggi namang magbigay ng pahayag ang suspek tungkol sa kanyang motibo sa ginawang panloloko.
Kalunos-lunos ang sinapit ng isang sanggol matapos siyang patayin sa saksak ng sarili niyang ama sa Tikalaan, Bukidnon.
Sa imbestigasyon ng pulisya, lumilitaw na matinding selos ng suspek sa kaniyang asawa ang ugat ng krimen, at nadamay ang bata.
Nabatid na sugatan din at isinugod sa ospital ang amang suspek matapos magsaksak sa sarili matapos ang ginawang krimen.
Bago ang insedente, nag-away umano ang mag-asawa, na dahilan para umalis ng bahay ang misis at naiwan ang suspek at kanilang anak.
Hindi umano inakala ng ginang na idadamay ng suspek ang kanilang anak.
Naka-hospital arrest ang suspek na nahaharap sa kasong parricide.
Dead on arrival sa ospital ang menor de edad na rider at ang angkas niyang babae matapos silang bumangga sa kasalubong na bus sa Argao, Cebu.
Ayon sa mga saksi sa lugar, nangyari ang aksidente sa palikong bahagi ng highway sa barangay Poblacion
Ayon sa pulisya, nawalan ng kontrol ang rider sa motorsiklo hanggang sa bumangga sila sa nakasalubong na bus.
Pawang walang suot na helmet ang mga biktima nang mangyari ang insidente.
Nasa kostudiya naman ng pulisya ang driver ng bus na mahaharap sa reckless imprudence resulting in homicide
Pormal nang sinampahan ng isang animal welfare organization ng kaso ang mga residenteng nanghampas sa bagong panganak na aso sa San Pedro, Laguna.
Sa kanilang social media page, ibinahagi ng Biyaya Animal Care na tinanggap na sa Office of the Prosecutor ng lungsod ang kanilang isinampang kaso sa paglabag sa Republic Act No. 10631 o pag-amyenda sa Animal Welfare Act of 1998.
Ayon sa pahayag ng naturang animal welfare group, nasa kamay na nila ang hustisya para sa mga hayop na hindi kayang ipagtanggol ang kanilang sarili laban sa mga tao.
Matatandaang kumalat kamakailan ang video ng mga lalaking pinaghahampas ang isang inabandonang aso na kakapanganak pa lamang.
Ang Biyaya Animal Care ang sumaklolo sa asong pinangalanan nilang “Justice”, kasama ang anim na tuta nito.
Bagama’t ipinagbabawal na sa Metro Manila ang paggamit ng e-bike sa mga lansangan, walang takot ang isang driver sa paggamit ng kanyang e-bike sa pagde-deliver ng illegal na droga sa Trece Martires City, Cavite
Sa inilatag na drug operation ng pulisya inaresto ang suspek na kinilala sa alyas na Esah , 20-anyos.
Naganap ang transaksyon sa parking lot ng isang fastfood chain, kung saan dumating dito ang suspek sakay ng puting e-bike.
Nasa tabi lang nito ang isang paper bag kung saan nakalagay ang mga shabu na may timbang na 100 grams at may halagang P 680, 000.
Nakumpiska rin sa suspek ang drug money at buy-bust money na gamit sa operasyon.
Nahaharap sa mga patong-patong na kaso ang nahuling suspek
Nasawi ang isang retiradong judge, habang 7 iba pa ang sugatan sa banggaan ng 2 sasakyan sa bahagi ng isang highway sa Cagayan de Oro City.
Ayon sa awtoridad, dead-on-arrival sa ospital si Retired Judge Gael Paderangga, 72-anyos
Lumilitaw sa imbestigasyon na minamaneho ni Paderangga ang kanyang sasakyan nang makabanggaan ang isang pang kotse na nagsanhi sa pagkakasugat sa iba’t ibang parte ng katawan ng driver nitong si Joshua Dequiña at anim pang tao na sakay na kasama niya sa kanyang sasakyan.
Mabilis namang naisugod sa ospital sina Dequina at mga kasama ng mga kasapi ng Cagayan de Oro City Police at mga kawani ng Emergency Response Office ng Local Government Unit ng lungsod.
Pinagbabaril hanggang sa mapatay ng dalawang lalaki ang isang binata na nakaupo at nanonood lang ng video sa kaniyang cellphone sa Laguna.
Isang babae naman ang minalas ng matamaan ng bala sa pamamaril
Kinilala ang nasawi sa alyas na Edsel, habang ginagamot sa ospital si alyas Mary nang masapol ng bala na tumagos mula sa katawan ng biktima.
Sa imbestigasyon ng pulisya, naganap ang insidente habang nakaupo sa labas ng kanilang bahay ang biktima at nanonood ng video sa kaniyang cellphone nang dumating ang dalawang suspek na armado ng baril at walang sabi-sabing pinagbabaril ang biktima.
Nagpapatuloy naman ang imbestigasyon at back-tracking ng mga pulis sa pagkakakilanlan ng mga salarin