RONDA PROBINSYA

Makatatanggap ng tulong mula sa lokal na pamahalaan ng Zamboanga ang mga magsasaka at mangingisdang apektado ng El Niño phenomenon.

Ito ang resolusyong ipinasa sa ginanap na pagpupulong ng Task Force El Niño kamakailan.

Matatandaang noong unang linggo ng Marso, nagdeklara ang Zamboanga ng state of calamity dahil sa nararanasang matinding tagtuyot.

Ayon kay City Disaster Risk Reduction Management Officer Elmer Apolinario, isinasaalang-alang ng lokal na pamahalaan ang pagsasagawa ng cloud seeding upang madagdagan ang suplay ng tubig.

Patuloy rin ang pagpapatupad ng water rationing scheme ng Zamboanga City Water District (ZCWD).

Tinatayang aabot sa P27 million ang naitalang pinsala ng El Niño sa agri-fishery sector.

Sugatan ang motorcycle rider at angkas nito nang sumalpok sila sa papalikong kotse sa Calasiao, Pangasinan.

Sa kuha ng CCTV sa lugar, hindi na nakapagpreno ang motorsiklo at natumbok ang papalikong sasakyan.

Sa lakas ng pagkakabangga, tumilapon at sumadsad sa ibabaw ng kotse ang isa sa mga sakay ng motorsiklo.

Sugatan pero ligtas naman ang dalawang sakay ng motorsiklo.

Ayon sa awtoridad, hindi na nauwi sa kasuhan ang insedente matapos magkaroon ng pag-uusap at nagkaaregluhan ang magkabilang panig.

Patay ang isang tricycle driver matapos pagsasaksakin ng kapwa tsuper sa Sampaloc, Manila.

Kinilala ang biktimang si Cansino Carlito, 54 – anyos na residente ng naturang lugar.

Batay sa imbestigasyon, matagal ng may alitan ang dalawa tungkol sa agawan umano ng pasahero sa terminal hanggang sa kalaunan ay nauwi ito sa pananaksak.

Mabilis na dinala sa paospital ang biktima ngunit idineklara itong dead on arrival ng mga sumuring doktor

Samantalang naka-detain na sa Sampaloc Police Station ang suspek na kinilalang si Alejandro Queqquegan na nahaharap sa kasong homicide.- sa panunulat ni Aira Ortega

Binawian ang buhay ang isang ginang habang nasugatan ang anak nito matapos pagsasaksakin ng lasing na kapitbahay sa San Andres, Quezon

Kinilala ang nasawing biktima na si Leonor Beñegas habang nilalapatan ng lunas dahil sa tinamong mga saksak sa katawan ang anak nitong si Rosalie

Base sa imbestigasyon ng awtoridad, nasa loob ng kanilang bahay ang mag-ina nang pumasok ang lasing na suspek na armado ng gulok at walang sabi-sabing pinagsasaksak si Leonor.

Nang makita ni Rosalie ang ginawa ng suspek sa kanyang ina ay sinubukan nitong tumulong subalit maging siya ay inundayan ng sunud-sunod na saksak at mabilis na tumakas.

Tinutugis na at nahaharap sa reklamong murder at frustrated murder ang suspek na nakilala lamang sa alyas na Garry

Bumulaga sa mga pulis ang dalawang bangkay na magkahiwalay na nakasilid sa dalawang drum na nakita sa ilog ng labo, Camarines Norte.

Ayon sa awtoridad, nakatanggap sila ng tawag mula sa mga residente na nangingisda sa ilog hinggil sa dalawang drum na natagpuan

Nang suriin ang drum, bumulaga ang ulo ng isa sa mga biktima at nakasemento ang katawan ng mga ito sa loob ng mga drum.

Patuloy ang imbestigasyon ng mga awtoridad para matukoy ang pagkakakilanlan ng mga biktima at mga nasa likod ng krimen.

Patay ang isang tindero matapos itong malunod sa dagat sa Brgy. Calao-an, Candon, Ilocos Sur.

Kinilala ang biktimang si Domell Peñaloza, 21 anyos.

Batay sa ulat, lasing ang biktima nang mapagdesisyunan nitong lumangoy kasama ang kanyang mga kaibigan.

Tinangay ito ng malakas na alon, at maya-maya, nakita na lang na palutang-lutang ang katawan nito sa dagat.

Binigyan pa ang biktima ng CPR bago isinugod sa ospital kung saan ito idineklarang patay.

Natupok ang isang beach café sa nangyaring sunog sa Brgy. Miranda, Pontevedra, Negros Occidental.

Batay sa paunang imbestigasyon ng Bureau of Fire Protection (BFP), nagsimula ang sunog mula sa kusina ng Eleven Café and Beach Resort.

Naapula ang sunog matapos ang 20 minuto. Wala namang nadamay na kalapit na bahay o istraktura.

Kasalukuyang iniimbestigahan ng mga awtoridad ang sanhi ng sunog na may pinsalang umabot sa P330,000.

Sapol ng CCTV ang panloloob ng dalawang kawatan sa isang Café sa Novaliches, Quezon City

Sa kuha ng CCTV, nakita ang dalawang salarin na pumasok sa loob ng café mula sa likuran na may suot na sumbrero habang ang isa ay nakasuot ng hooded jacket

Nang makapasok, sinubukan nilang buksan ang kaha ngunit nahirapan sila.

Nang wlang mapala… Dito na sila nagpasyang damputin na lang ang speaker na nasa counter at dalawang helmet.

Nakita naman sila ng guwardiya sa katabing establisimyento kaya mabilis na tumakas ang mga suspek.

Sa kakamadali… Naiwan nila ang nanakawin sanang speaker at mga helmet.

Tanging barena ang natangay ng mga suspek.

Nagpapatuloy naman ang backtracking ng mga pulis sa mga CCTV malapit sa lugar para matunton ang mga salarin

Dead on the spot ang isang online seller pagsasaksakin ng hindi pa nakikilalang lalaki habang nakatayo ito malapit sa drug store sa Quimpo Boulevard, Davao City

Agad nasawi ang biktima na kinilalang si Cinderella Rosales, 22 –  anyos

Ayon sa report ng awtoridad, umalis muna at isinama ng kanyang mister na si Noel ang kanilang 1 taong-gulang na anak habang bumibili ng gamot ang biktima sa drug store

Pagbalik ng mister, nakita nitong pinagkakaguluhan na ang kanyang asawa na wala ng buhay at nakahandusay sa semento.

Ayon sa mga saksi, dalawang lalaki na magkaangkas sa motorsiklo ang dumating sa lugar, bumaba ang angkas at pinagsasaksak ang biktima.

Mabilis ding tumakas ang mga salarin matapos ang krimen

Personal na galit ang nakikitang motibo ng mga awtoridad sa insidente at ipinapalagay na may kinalaman ito sa kanyang trabaho bilang online seller.

Patuloy ang imbestigasyon ng pulisya sa krimen.

Itinumba ang isang babaeng ng ‘di kilalang salarin habang naliligo sa loob ng kanyang tahanan sa Antipolo City, Rizal

Kinilala lang ang biktima sa alyas na “Rose” na sinasabing kasama sa drug watchlist ng kanilang barangay.

Sa ulat ng Antipolo Police, naliligo sa kanilang banyo ang biktima nang bigla na lang pasukin ng isang armadong lalaki at kaagad siyang pinaulanan ng bala.

Nang matiyak na patay na ang biktima, mabilis na tumakas ang salarin bitbit ang armas na ginamit sa krimen.

Ayon sa Kapitan ng Sitio, kabilang ang biktima sa Badac watchlist at inaakusahang sangkot sa ilang illegal drug-related cases.

Nakadiskubre rin umano ang mga awtoridad ng ilang drug paraphernalia sa basurahang malapit sa tahanan ng biktima.

Nagpapatuloy naman ang backtracking ng mga pulis sa pagkakakilalan ng mga suspek at motibo sa pamamaril