RONDA PROBINSYA

Kalunos-lunos ang sinapit ng isang sanggol matapos siyang patayin sa saksak ng sarili niyang ama sa Tikalaan, Bukidnon.

Sa imbestigasyon ng pulisya, lumilitaw na matinding selos ng suspek sa kaniyang asawa ang ugat ng krimen, at nadamay ang bata.

Nabatid na sugatan din at isinugod sa ospital ang  amang suspek matapos magsaksak sa sarili matapos ang ginawang krimen.

Bago ang insedente, nag-away umano ang mag-asawa, na dahilan para umalis ng bahay ang misis at naiwan ang suspek at kanilang anak.

Hindi umano inakala ng ginang na idadamay ng suspek ang kanilang anak.

Naka-hospital arrest ang suspek na nahaharap sa kasong parricide.

Dead on arrival sa ospital ang menor de edad na rider at ang angkas niyang babae matapos silang bumangga sa kasalubong na bus sa Argao, Cebu.

Ayon sa mga saksi sa lugar, nangyari ang aksidente sa palikong bahagi ng highway sa barangay Poblacion

Ayon sa pulisya, nawalan ng kontrol ang rider sa motorsiklo hanggang sa bumangga sila sa nakasalubong na bus.

Pawang walang suot na helmet ang mga biktima nang mangyari ang insidente.

Nasa kostudiya naman ng pulisya ang driver ng bus na mahaharap sa reckless imprudence resulting in homicide

Pormal nang sinampahan ng isang animal welfare organization ng kaso ang mga residenteng nanghampas sa bagong panganak na aso sa San Pedro, Laguna.

Sa kanilang social media page, ibinahagi ng Biyaya Animal Care na tinanggap na sa Office of the Prosecutor ng lungsod ang kanilang isinampang kaso sa paglabag sa Republic Act No. 10631 o pag-amyenda sa Animal Welfare Act of 1998.

Ayon sa pahayag ng naturang animal welfare group, nasa kamay na nila ang hustisya para sa mga hayop na hindi kayang ipagtanggol ang kanilang sarili laban sa mga tao.

Matatandaang kumalat kamakailan ang video ng mga lalaking pinaghahampas ang isang inabandonang aso na kakapanganak pa lamang.

Ang Biyaya Animal Care ang sumaklolo sa asong pinangalanan nilang “Justice”, kasama ang anim na tuta nito.

Bagama’t ipinagbabawal na sa Metro Manila ang paggamit ng e-bike sa mga lansangan, walang takot ang isang driver sa paggamit ng kanyang e-bike sa pagde-deliver  ng illegal na droga sa Trece Martires City, Cavite

Sa inilatag na drug operation ng pulisya inaresto ang suspek na kinilala sa alyas na Esah , 20-anyos.

Naganap ang transaksyon sa parking lot ng isang fastfood chain, kung saan dumating  dito ang suspek sakay ng puting e-bike.

Nasa tabi lang nito ang isang paper bag kung saan nakalagay ang mga shabu na may timbang na 100 grams at may halagang P 680, 000.

Nakumpiska rin sa suspek ang drug money at buy-bust money na gamit sa operasyon.

Nahaharap sa mga patong-patong na kaso ang nahuling suspek

Nasawi ang isang retiradong judge, habang 7 iba pa ang sugatan sa banggaan ng 2 sasakyan sa bahagi ng isang highway sa Cagayan de Oro City.

Ayon sa awtoridad, dead-on-arrival sa ospital si Retired Judge Gael Paderangga, 72-anyos

Lumilitaw sa imbestigasyon na minamaneho ni Paderangga ang kanyang sasakyan nang makabanggaan ang isang pang kotse na nagsanhi sa pagkakasugat sa iba’t ibang parte ng katawan ng driver nitong si Joshua Dequiña at anim pang tao na sakay na kasama niya sa kanyang sasakyan.

Mabilis namang naisugod sa ospital sina Dequina at mga kasama ng mga kasapi ng Cagayan de Oro City Police at mga kawani ng Emergency Response Office ng Local Government Unit ng lungsod.

Pinagbabaril hanggang sa mapatay ng dalawang lalaki ang isang binata na nakaupo at nanonood lang ng video sa kaniyang cellphone sa Laguna.

Isang babae naman ang minalas ng matamaan ng bala sa pamamaril

Kinilala ang nasawi sa alyas na Edsel, habang ginagamot sa ospital si alyas Mary nang masapol ng bala na tumagos mula sa katawan ng biktima.

Sa imbestigasyon ng pulisya, naganap ang insidente habang nakaupo sa labas ng kanilang bahay ang biktima at nanonood ng video sa kaniyang cellphone nang dumating ang dalawang suspek na armado ng baril at walang sabi-sabing pinagbabaril ang biktima.

Nagpapatuloy naman ang imbestigasyon at back-tracking ng mga pulis sa pagkakakilanlan ng mga salarin

Hindi na umabot nang buhay sa ospital ang 37-anyos na misis matapos hatawin ng kahoy sa ulo ng hindi pa nakikilalang salarin habang naglalakad sa Zone-4, Brgy.Napolidan, Lupi, Camarines Sur

Kinilala ng awtoridad ang biktima na si Marissa Mortis

Ayon sa mga pulis, galing ng kanilang sinasakang lupa at naglalakad pauwi ang biktima nang biglang sumulpot ang hindi nakilalang lalaki sa likod ng ginang at sa hindi malamang dahilan ay hinataw ito sa kanyang braso at ulo.

Bagama’t duguan ang ulo ay nakatakbo pa ang babae at nakahingi ng saklolo sa mga residente.

Agad isinugod sa ospital ang biktima pero pero hindi na umabot nang buhay dahil sa malalang pinsalang natamo.

Isang bagong panganak na aso ang pinaghahampas ng ilang residente sa San Pedro, Laguna.

Sa video na kumalat sa social media, makikitang sinusubukang huliin ng dalawang lalaki, kabilang ang isang barangay tanod, ang puting aso.

Nang madakip na nila ito, pinaghahataw ng isang lalaki ang hayop gamit ang golf club.

Sumali pa rito ang isang 12 anyos na bata na nakagat umano ng aso.

Batay sa imbestigasyon, inabandona ang aso ng may-ari nito matapos lumuwas ng Maynila.

Sinaklolohan naman ng Biyaya Animal Care ang asong pinangalanan nilang “Justice” kasama ang anim nitong tuta.

Maayos man ang lagay ng aso, itutuloy pa rin ng naturang animal welfare organization ang kaso laban sa mga suspek.

Arestado ang isang trenta anyos na lalaki matapos holdapin at tangayin nito ang nasa pitong libong pisong kita ng restaurant gamit ang isang replica na baril sa Gen. Trias City, Cavite

Nasa kustodiya na ng mga pulis ang suspek na si alias ‘Carlo’

Ayon sa mga saksi, dumating ang suspek na armado ng isang replica na baril sa establisyemento sa marycris complex sa Barangay Pasong

Dumiretso ito sa counter ng cashier, nagdeklara ng holdap at tinangay ang kita ng restaurant.

Matapos nito’y mabilis na tumakas ang suspek pero nadakma ito kalaunan ng mga opisyal ng barangay

Nakuha sa kanyang ang isang replica ng Cal.45.

Nahaharap naman sa patong-patong na kaso ang suspek

Kalaboso ang isang 29-anyos na suspek matapos na magtangkang kikilan ang dati niyang nobyang 25-anyos na guro para hindi ikalat ang kanilang sex video.

Nasakote ang suspek sa isang bus station Quezon City na susunduin sana ang biktima na bumyahe pa Camarines Sur.

Ayon sa Camarines Sur and Camarines Norte Regional Anti-Cybercrime Unit, matagal na nilang inaabangan ang suspek na nahaharap sa paglabag sa Anti-Violence Against Women and Their Children Act of 2022, Cybercrime Prevention Act of 2012, Grave Coercion, at Anti-Photo and Video Voyeurism Act of 2009.

Nagpaalala naman ang pulisya sa publiko na mag-ingat upang hindi maharap sa ganitong sitwasyon.