RONDA PROBINSYA

Dead on the spot ang isang lalaki matapos barilin sa loob ng kanyang sasakyan sa Antipolo, Rizal.

Ayon sa salaysay ng mga saksi sa awtoridad, nakasakay sa kaniyang van ang biktima kung saan nakita silang nag-uusap ng suspek at bigla na lang umano pinaputukan ito.

Agad namang naaresto ang suspek sa follow-up operation ng pulisya.

Lumabas sa inisyal na imbestigasyon na residente rin ng Brgy. Sta Cruz ang suspek. Inaalam pa ng awtoridad ang posibleng motibo sa likod ng pamamaril.

Ayon sa asawa ng bitkima, bibili lang umano ng pagkain ang kaniyang asawa bago ang krimen

Itinanggi naman ng suspek na may kinalaman siya sa pamamaril at nahaharap sa reklamong murder.

Nangunguna ang Pilipinas sa “Most disaster ready” Mula sa 142 bansa sa buong mundo.

Batay sa Lloyd’s Register Survey, nanguna ang Pilipinas na may kahandaan pagdating sa mga kalamidad o sakuna o “May disaster plan” Na nakakuha ng 84%; sinundan ng Vietnam 83%; Cambodia 82%; Thailand 67%; at Estados Unidos na nasa 62%.

Matatandaang lumabas din sa isang survey na kabilang ang Southeast Asia sa mga rehiyong prone sa matinding sakuna subalit pinakamahusay din sa pagtugon sa mga ito.

Isinagawa ang face to face survey sa 142 bansa  na may tig- 2,000 respondents.

Sa kulungan ang bagsak ang isang 55-anyos na lalaki dahil sa pag-aamok at pananakit umano ng kapitbahay sa Antipolo, Rizal.

Tila hindi na nagulat ang mga pulis dahil nadatnan pa ang suspek sa kaniyang bahay na lasing na lasing.

Ayon sa awtoridad, nanakit umano ng kapitbahay at nagwala ang lalaki dala-dala ang ilang patalim.

Inirekalmo ang suspek matapos dumulog sa kanila tungkol sa isang residenteng nanakit umano ng lasing na suspek.

Ayon sa tanod team leader ng Barangay Sta. Cruz, hinuli na nila ang suspek at dinala sa barangay. Nagpositibo ito umano sa droga.

Nakuha ang improvised na pana at mga pako sa suspek.

Isang 67-anyos na American national ang natagpuang patay sa kanyang inuupahang bahay sa Daet, Camarines Norte.

Natuklasan ng mga awtoridad ang bangkay ng Amerikano sa kanyang inuupahang bahay.

Wala pang nakikitang senyales ng foul play ang pulisya.

Ayon sa imbestigasyon, sanhi ng kamatayan ng banyaga ay maaaring atake sa puso, batay sa mga pahayag mula sa tagapag-alaga ng biktima.

Nakikipag-ugnayan na ang pulisya sa US Embassy para ipaalam sa pamilya ng biktima ang insidente.

Patay ang isang babae, habang sugatan ang kaniyang kaniyang live-in partner matapos silang barilin habang natutulog sa loob ng kanilang bahay sa Dipolog City.

Ayon sa pulisya, nagtamo ng tama ng bala sa likod ang 45-anyos na babae, habang sa dibdib naman binaril ang 65-anyos na lalaki.

Personal na alitan na may kaugnayan sa ilegal na droga ang tinitingnan ng pulisya na motibo sa krimen.

Kilala rin umano ng mga biktima ang suspek.

Inaasikaso na ng mga pulis ang arrest warrant para maaresto ang salarin, na mahaharap sa kasong murder at frustrated murder.

Natakot at nataranta ang mga residente sa isang barangay sa San Fernando, Pampanga nang makitang palutang-lutang sa baha ang isang hayop na mukhang buwaya.

Nasa apat na talampakan ang laki nito at kinailangang magtulungan ng limang lalaki para lamang mahuli ito.

Ayon sa mga residente, dalawang araw nilang inabangan ang hayop na pinangambahan nilang mangangagat dahil sa malaking nguso nito.

Nang madakip ang hayop, nagsagawa sila ng pagsusuri. Dito nila natuklasang hindi pala ito buwaya, kundi isang alligator gar o kilala rin bilang “monster fish”.

Ang alligator gar ay isang uri ng isda na kayang lumaki ng hanggang walong talampakan. Walang kaugnayan ang isdang ito sa alligators; ipinangalan lamang ito sa kanila dahil sa hitsura at matatalas nitong ngipin na katulad sa reptilya.

Isang gabi lamang nanatili sa mga residente ang nahuling alligator gar dahil kinuha rin ito ng may-ari.

Batay sa salaysay ng isang residente, isang pet ang alligator gar na nakawala lamang nang bumaha sa lugar.

Kadalasan talagang ginagawang alaga ang alligator gars dahil bagama’t mukhang nakakatakot, wala naman itong banta sa kaligtasan ng mga tao.

Posibleng away sa pamilya o rido ang tinitignan ng pulisya sa pananambang sa isang mag-asawa sa Zamboanga City

Kinilala ng awtoridad ang mag-asawang nasawi na sina Hamid Tumambid at asawa nitong si fatIma, kapwa 36-anyos.

Lumabas sa imbestigasyon, sakay ng kanilang motorsiklo si Hamid kasama ang kanyang asawa nang tambangan sila ng hindi pa nakikilalang mga armadong lalaki.

Dead-on-the-spot ang mag-asawa sa mga tama ng bala ng baril.

Narekober sa pinangyarihan ng krimen ang 10 basyo ng hindi pa batid na baril.

Nagsasagawa na ang mga pulis ng man-hunt operation para sa ikadarakip ng mga tumakas na salarin.

Kasunod sa pagkamatay ng isang Philippine Eagle ilang oras lamang matapos itong sagipin sa Compostela, Davao de Oro, nanawagan ang Philippine Eagle Foundation (PEF) sa pamahalaan na magpatupad ng mas mahigpit na mga hakbang sa pagprotekta sa mga agila.

Batay sa imbestigasyon, posibleng nasugatan ang naturang agila matapos barilin ng holen.

Namatay ito makalipas ng ilang oras dahil sa severe blood loss.

Ayon sa ulat, kabilang ang air gun sa mga karaniwang ginagamit na pambaril sa mga agila.

Ikinalungkot naman ni PEF Director for Operations Dr. Jayson Ibañez ang insidente at sinabing sa kabila ng kanilang pagsisikap na alagaan ang critically endangered na Philippine Eagle, patuloy pa rin silang nasasangkot sa karahasan.

Hinihikayat naman ng PEF ang mga lokal na pamahalaan na magpatupad ng mga ordinansa na magkokontrol sa pagmamay-ari ng air guns sa mga teritoryo ng agila.