RONDA PROBINSYA

Sugatang ang isang 27-anyos na binata matapos saksakin ng kanyang sariling ama makaraang magalit nang lantakan ng biktima ang pananghalian sa kanilang bahay sa Viga, Catanduanes.

Isang tama ng saksak sa dibdib ang tinamo ng biktimang kinilala lamang sa pangalang “Roby”, isang construction worker.

Kalaboso naman at nahaharap sa kasong tangkang pagpatay ang tatay na si “Berting”, 60-anyos

Ayon sa awtoridad, umuwing lasing ang suspek mula sa pakikipag-inuman. Gayunman, laking galit nito nang maghanap ng makakain ay wala na itong mahagilap.

Agad nitong kinompronta ang anak kung bakit kinain nito ang kanyang pananghalian dahilan para mainit na nagkasagutan ang mag-ama.

Hanggang sa kumuha ng kutsilyo ang suspek saka tinarakan ang sariling anak.

Sumuko naman ang suspek sa mga pulis bitbit ang kutsilyong ginamit sa pananaksak.

Patay ang isang construction worker makaraang saksakin ng katrabaho ng dahil umano sa selos sa Bayan ng Alfonso sa Cavite.

Kinilala ng pulisya ang biktima na si Christopher Reyes, 35-anyos, habang naaresto ang suspek na si alyas “Biboy”, 32-anyos

Sa imbestigasyon ng pulisya, nag-iinuman ang biktima at suspek kasama ang tatlo pang katrabaho nang magkainitan ang dalawa.

Dahil sa kapwa lasing na, hindi na maawat ang dalawa sa kanilang away hanggang sa damputin ng suspek ang patalim at sinaksak nito ang biktima.

Patay na nang dumating ang biktima sa ospital habang nadakip ng mga rumespondeng pulis ang suspek.

Selos ang lumalabas na motibo sa krimen gayunpaman, patuloy pa ang imbestigasyon ng mga pulis sa krimen.

Patay sa pananaksak ang isang construction worker nang pagtulungan itong saksakin ng lasing na magkapatid na kasamahan niya sa trabaho sa loob  sa Quezon City.

Kinilala ang biktima na si Benjie Villar Mirabite habang arestado ang isa sa mga suspek na si Jaime Lebrino, habang tinutugis pa ang kapatid nito na si Viner.

Sa imbestigasyon ng awtoridad, nag-iinuman sa barracks ang magkapatid na suspek kasama ang testigo na si alyas ‘Gerry’ at saka bumaba sa kanilang kuwarto kung saan nandoon ang biktima.

Narinig na lang ni alyas ‘Gerry’ na sumisigaw ng tulong ang biktima.

Nang puntahan niya ang biktima, nakita niyang pinagsasaksak ba ng magkapatid ang biktima.

Mabilis namang isinugod ang biktima sa ospital pero idineklara na itong dead on arrival ng umasisteng doktor.

Pinaghahanap na ng mga pulis ang mga salarin na mabilis tumakas matapos ang ginawang krimen.

Patay ang isang 36-anyos na motorcycle rider, at sugatan ang babaeng pasahero nito matapos mabangga ng sa isang sasakyan sa Basud, Camarines Norte.

Batay sa imbestigasyon ng pulisya, binabaybay ng motorsiklo ang national highway mula sa direksyon ng Basud Town Proper.

Pagdating sa lugar ng aksidente, isang sasakyan ang lumihis sa kanilang lane, na naging sanhi ng banggaan.

Sa tindi ng impact ng pagbangga na nagresulta sa agarang pagkamatay ng rider. Nagtamo naman ng mga pinsala ang angkas nitong babae at ngayon ay nagpapagamot.

Nahaharap sa kasong reckless imprudence resulting in homicide, physical injuries, at damage to property ang driver ng sasakyan.

Isang konsehal sa bayan ng San Miguel ang nakaligtas sa pananambang sa Bulacan.

Kinilala ng pulisya ang biktima na si Richard ” Richie” Dela Cruz Pelayo, 49-anyos.

Sa imbestigasyon ng mga awtoridad, nagpanggap na kliyente sa paupahang commercial building ng biktima, ang isa sa mga suspek.

Ilang saglit pa umalingawngaw ang isang malakas na putok ng baril, kung saan masu­werteng hindi ito tinamaan.

Matapos ang pama­maril mabilis na tumakas ang mga suspek na lulan ng motorsiklo.

Agad namang nakaresponde ang awtoridad habang naniniwala ang biktima na politika ang dahilan ng tangkang pananambang at ina­ming nakatanggap siya ng banta sa kanyang buhay noong buwan ng hunyo, kasama ang dalawa pa na konsehal ng bayan.

Nauwi sa pananaksak ang alitan sa pagitan ng isang kusinero at ng kaniyang ka-trabaho sa San Juan, Batangas.

Kinilala ng pulisya ang biktima na si Ariel Baña, 59-anyos.

Ayon sa imbestigasyon, nagkaroon ng alitan si Baña at ang suspek na si Marcelito Tejada, 57-anyos, at bumunot ng kutsilyong nakasukbit sa kanyang baywang at sinaksak nito ang bitkima ng ilang beses sa katawan.

Kaagad namang dinala si Baña sa isang ospital subalit idineklara na itong patay ng mga doktor.

Target naman ng manhunt operation ang tumakas na salarin bitbit ang patalim na ginamit sa krimen.

Patay sa pananambang ang isang mag-asawa ng hindi pa nakilalang salarin sa Sultan Kudarat, Maguindanao Del Norte.

Kinilala ng awtoridad ang mga biktima na sina Barangay Chairman Esmael Latip Mustapha at misis niyang si Rahima Maulana, secretary ng Barangay Bulibod.

Ayon sa Sultan Kudarat Municipal Police Station, nangyari ang ambush habang papauwi na ang mga biktima.

Naglalakad umano ang mag-asawang biktima sa kalsada nang biglang sumulpot ang mga armadong kalalkihan at hinarang ang dalawa at pinagbabaril

Nang makitang patay na ang mga biktima, mabilis na tumakas ang mga suspek bitbit ang mga armas na ginamit sa krimen.

Nagsasagawa pa ng imbestigasyon ang pulisya upang malaman ang pagkakakilanlan ng mga suspek at motibo sa pamamaslang.

Bala ng baril ang tumapos sa buhay ng isang lalaki makaraang pagbabarilin ng dalawang kasuntukan nito sa Silang, Cavite.

Kinilala ang biktima na si Christian Caringal, naaresto naman ang isa sa dalawang suspek na kinilala lang sa alyas “Doming” Habang nakatakas ang kasamang si alyas “Jerome”.

Sa ulat ng pulisya, pinatulungan umanong bugbugin ng dalawang suspek ang biktima.

Nagawa pang manlaban ang biktima sa mga suspek subalit dito na siya pinagbabaril ni alyas Jerome.

Kahit duguan, nagawa pang makatakbo ang biktima at nakara­ting sa bahay ng kanyang kaibigan subalit bumulagta sa semento.

Agad na naitakbo sa pagamutan ang biktima subalit idineklarang dead-on- arrival ng sumuring doctor.

Target naman ng manhunt operation ang isa pang salarin sa krimen

Pinagsasaksak hanggang sa mapatay ang isang grade 12 student dahil sa pagpapakalat umano ng sex video ng isang babaeng estudyante sa Hinigaran, Negros Occidental.

Ayon sa Hinigaran Police, ang 17-anyos na biktima ay pinagsasaksak ng dalawang hindi pa nakikilalang indibidwal na dumating sakay ng motorsiklo habang nakaupo sa isang bangko ilang metro ang layo mula sa kanilang bahay

Nagtamo ang biktima ng mga saksak sa ibat-ibang parte ng kanyang katawan dahilan ng kaniyang agarang pagkamatay

Tinitingnan ng pulisya ang paghihiganti bilang posibleng motibo sa insidente dahil ang biktima ay inakusahan ng pagkalat ng sex video.

Nakasilid sa sako at tadtad ng sasak ang isang lalaki nang matagpuan ng mga awtoridad sa Antipolo City.

Ayon sa awtoridad, nakita ng ilang naglalarong bata sa ilog ang biktima sa loob ng isang sako.

Sa pagsusuri, hindi bababa sa tatlo ang natamong saksak ng lalaki.

Malamang din daw ay hindi lang isang salarin ang gumawa ng krimen.

Mabilis namang nalaman ang pagkakakilanlan ng biktima na isang 27-anyos ng kinlalanin ng kaniyang pamilya na ilang araw nang nawawala.

Hinala ng pulisya, na biktima ng holdap ang biktima at nanlaban hanggang sa humantong sa kalunos-lunos na pagpatay dito.

Patuloy naman ang imbestigasyon ng pulisya sa kaso.