RONDA PROBINSYA

Kalaboso ang isang 42-anyos na lalaking vendor matapos masakote sa ikinasang buy-bust operation sa City Baywalk, Brgy. Bagong Pag-asa, Puerto Princesa City, Palawan dahil sa pagbebenta ng shabu.

Nagsilbing poseur-buyer ang isang operatiba at matagumpay na nakabili mula sa suspek ng isang sachet na naglalaman ng hinihinalang shabu na nakasilid sa heat-sealed transparent plastic sachet kapalit ng ₱1,000 marked money. Tinatayang 0.67 gramo ang timbang ng nakumpiskang hinihinalang shabu na may halagang nasa ₱4,556 batay sa standard drug price.

Nasa kustodiya na ng Puerto Princesa City Police Office ang suspek habang inihahanda ang pagsasampa ng kasong paglabag sa Section 5, Article II ng Republic Act 9165 o Comprehensive Dangerous Drugs Act of 2002. Ang hinihinalang droga ay isusumite para sa pagsusuri sa forensic unit.

Hawak na ng Philippine National Police ang tatlo sa apat na suspek sa pagpatay sa American marine biologist na si Dr. Kent Carpenter, na binaril sa loob ng kanyang bahay sa Sibulan, Negros Oriental.

Ayon kay PNP Public Information Chief, Col. Allan Rae Co, naaresto kagabi sa Sibulan ang dalawa na kinilalang sina alyas “Mo” at “JF” na nanggahasa umano sa live-in partner ng biktima.

Sunod namang natimbog ang isa pang suspek na si alyas “CD” na nagsilbi aniyang lookout.

Patuloy na tinutunton ng PNP ang isa pang suspek sa krimen, pero hindi pa nila matukoy ang naging partisipasyon nito.

Nilinaw naman ng Pambansang Pulisya na nananatiling robbery ang nakikitang motibo sa pamamaslang.—sa panulat ni Reabelle Medina

Arestado ang isang 21-anyos na lalaki matapos tangkain nitong sunugin ang bahay ng journalist na si Marlon Ramos ng Bilyonaryo News Channel sa Santa Rosa City, Laguna.

Pasado alas dos kaninang madaling araw nang magising si Ramos matapos makarinig ng pagsabog at nang kanyang silipin ay may apoy na sa kusina kaya’t agad niyang pinalabas ng bahay ang kanyang pamilya.

Narekober sa kusina ang galon ng gas at martilyo habang naaresto ang suspek ng mga rumespondeng security guard sa Villa Caceres Subdivision, sa Barangay Balibago.

Kinumpirma ni Ramos na kaibigan at kaklase ng kanyang bunso ang suspek na itinuring niya ring anak, pero tila nawala ito sa tamang pag-iisip kanina at kalauna’y umaming binu-bully umano ng kanyang anak.

Nakuwento na rin aniya ng kanyang anak na iniiwasan nilang magka-klase ang suspek dahil kakaiba na umano ang pag-iisip at sinasabi nito.—sa panulat ni Reabelle Medina

Bumuo na ng isang Special Task Force ang Police Regional Office–Negros Island Region upang tutukan ang pagpaslang sa isang Amerikanong scientist na nakaugnay sa tagumpay ng Pilipinas sa arbitral ruling tungkol sa West Philippine Sea noong 2016.

Ayon sa PRO-Negros Regional Director, Police Brigadier General Romano Cardiño, kinokondena ng Pambansang Pulisya ang pagpatay kay Dr. Kent Carpenter, isang marine biologist at propesor sa Silliman University, sa tahanan nito sa Sibulan, Negros Oriental.

Nabatid na binaril si Carpenter sa ulo, na ikinamatay nito, habang sugatan naman ang kanyang 34-anyos na kinakasama.

Dagdag pa ni Cardiño, layunin ng Special Investigation Task Group Carpenter na mangolekta ng impormasyon, magproseso ng ebidensya, gumawa ng kaso, at hanapin at arestuhin ang mga suspek sa pagpatay sa Amerikanong scientist. | Sa panulat ni Anjo Riñon

Patay ang isang American marine biologist matapos umano’y barilin at pagnakawan ng tatlong kawatan sa loob ng kaniyang bahay sa Sibulan, Negros Oriental.

Kinilala ng mga awtoridad ang biktima na si Dr. Kent Carpenter, 73-anyos.

Ayon sa Sibulan Police, nanonood ng TV ang biktima kasama ang kaniyang 34-anyos na partner nang puwersahang pasukin ng tatlong lalaking nakasuot ng bonnet ang kanilang bahay.

Agad na nasawi si Carpenter matapos barilin sa ulo, habang ang kaniyang partner ay umano’y pinagsamantalahan ng tatlong suspek, ayon sa pulisya.

Samantala, nagpapatuloy ang imbestigasyon at hot pursuit operation ng mga awtoridad upang matukoy ang motibo at madakip ang mga suspek.

Magbibigay nang pabuya na P100k ang dating Bise Alkalde ng Aliaga Nueva Ecija sa makakapagturo o makakapagbigay ng impormasyon sa mga suspek na nanloob at nagnakaw sa kanyang tahanan sa baranggay San Juan Aliaga Nueva Ecija.

Matatandaan na noong June 24, ay pumasok ang dalawang suspek na dumaan sa  mataas na bakod at puwersahan na sinira ang bakal na nakaharang gamit ang isang bareta de kabra.

Sa kuha sa CCTV footages makikita na nag-ala-spiderman at naglambitin ang dalawang suspek na nakasuot ng bonnet na dumaan sa gilid ng pader sa bahay ng biktima at malayang nakapasok sa loob ng bahay at natangay ang isang long firearms na nakatago sa kwarto ng ng ex-Vice Mayor at puwersahan din na binuksan ang isang cabinet vault na nasa loob ng bahay.

Sa ulat naman ng PNP Nueva Ecija nasampahan naman ng kaso ang tatlong suspek na hanggang sa kasalukuyan ay pinaghahanap pa ng mga awtoridad.

Nagpsalamat naman ang naturang Bise Alkalde sa PNP dahil sa matiyagang pag-follow-up nila sa kaso para matukoy ang mga suspek.

Laking pasasalamat naman ni ginoong Javaliyas dahil hindi pinasok ang kwarto ng kanyang mga anak na natutulog noong oras na pasukin ang kaniyang tahanan. | via Cris Sansano/DWIZ correspondent

Humingi na ng saklolo sa National Bureau of Investigation (NBI) ang magulang ng grade 4 student na si Rex Mission na nasawi matapos uminom ng pampurga sa Hugo Perez Elementary School-Annex sa Trece Martires City, Cavite.

Dumulog sa NBI ang mag-asawang si Leo at Rutchie Mission kasama ang Volunteers Against Crime and Corruption para imbestigahan ang sinapit ng kanilang anak.

Una nang kinumpirma ng Department of Education (DepEd) ang pagkamatay ng walong taong gulang na estudyante matapos ang deworming activity sa eskwelahan noong Hulyo 2.

Batay sa death certificate, ang sanhi ng pagkamatay ng biktima ay septic shock na dulot ng impeksyon sa central nervous system, subalit hinala ng mga magulang na maaaring nasobrahan ang dosage ng deworming medicine na naibigay sa kanilang anak.

Ipinagpaliban muna ng pamilya ang nakatakdang paglilibing upang maisagawa ang autopsy, na inaasahan nilang makatutulong sa pagtukoy ng tunay na sanhi ng pagkamatay ng bata. | mula sa panulat ni Jordan Gutierrez

Nasakote ng Police Regional Office-Central Luzon (PRO-3) ang isang wanted suspect na may patong na ₱500,000 bounty kaugnay ng mga kasong rape at rape by sexual assault sa Pampanga.

Kinilala ang suspek na si William Meria Corre, na inaresto ng mga operatiba ng PNP Regional Office 3 sa bisa ng warrant of arrest mula sa Regional Trial Court Branch 49.

Kabilang sa mga kasong kinakaharap nito ang multiple counts of rape at rape by sexual assault matapos umanong pagdukot at at pagtutok ng baril kay Bhevs Navarro habang papasok sa kaniyang kotse sa Angeles City noong Hunyo 27, 2026.

Ayon sa imbestigasyon, mayroon ding naitalang insidente kung saan isang 11-anyos na bata ang umano’y naging biktima ng pang-aabuso noong Marso 2026.

Nasa kustodiya na ng pulisya ang suspek habang patuloy ang imbestigasyon upang matukoy kung may iba pang posibleng biktima.

Nagdulot ng takot ang isang 17-anyos na Alternative Learning System (ALS) student matapos umanong habulin ang dalawa niyang kaklase habang may dalang balisong sa labas ng Carcar City Central School sa Carcar City, Cebu.

Ayon sa pulisya, naawat agad ng isang barangay tanod ang binatilyo at nakumpiska ang balisong kaya walang nasaktan sa insidente.

Sinabi ng ina ng menor de edad na matagal nang nakararanas ng pambu-bully ang kanyang anak at sinipa umano ito ng dalawang kaklase bago naganap ang insidente.

Aminado naman ang estudyante na hinabol niya ang dalawa dahil sa galit.

Isasailalim ang menor de edad sa intervention ng City Social Welfare and Development Office habang iniimbestigahan ng mga awtoridad ang buong pangyayari, kabilang ang umano’y pagkakasangkot ng dalawang nakatatandang estudyante.

Huli ang tatlong kalalakihan matapos nilang nakawin at katayin ang isang mamahaling isda na nagkakahalaga ng 7 milyong piso mula sa fishpond ng isang resort sa Brgy. Bantigue, Pagbilao, Quezon.

Ang naturang isda na tinatawag na Adult Platinum Arapaima ay tinatayang 25 taong gulang, may habang 199 sentimetro (6.7 talampakan), at tumitimbang ng humigit-kumulang 90 kilo.

Naging huli na ang lahat nang madiskubre ng saksi na nakatay na ang naturang mamahaling isda at handa na itong pagparte-partehan para iuwi sa tahanan ng mga suspek. | via | Ron Lozano / DWIZ Correspondent – Southern Tagalog.