RONDA PROBINSYA

Tiklo ang isang pulis matapos ireklamo ng kanyang girlfriend na kanya umanong binugbog sa Gumaca, Quezon.

Kinilala ang pulis sa alyas Edward, 37-anyos, nakatalaga sa Buenavista Municipal Police Station.

Lumilitaw sa imbestigasyon ng pulisya, nasa bahay ng suspek ang kanyang nobya na si alyas “MJ”, isang promodizer, nang sila ay magkaroon ng pagtatalo.

Nakainom umano ang pulis at sa kasagsagan ng kanilang pagtatalo ay pinagsusuntok nito sa ulo ang kasintahan na nagtamo ng mga pasa at bukol sa ulo ang walang kalaban-laban biktima.

Agad namang humingi ng tulong ang biktima sa barangay at pulis na dahilan upang damputin ang parak.

Nahaharap ang pulis sa kasong paglabag sa r.a 9262 o “Anti-Violence Against Women and their Children Act of 2004”.

Isa katao ang patay habang sugatan ang isa pa nang pagbabarilin sila ng hindi pa nakikilalang mga salarin sa isang military outpost sa Labangan, Zamboanga Del Sur.

Ayon sa pulisya, sakay ng motorsiklo ang dalawang biktima nang tambangan sa barangay tapodoc ng nasabing lugar.

Sa insedente, nagtamo ang nasawing biktima ng tama sa ulo, samantalang tinamaan sa dibdib at braso ang isang sugatan.

Patuloy naman ang imbestigasyon ng mga awtoridad upang matukoy ang mga salarin, at ang motibo nila sa krimen.

Patay ang isang 36-anyos na lalaki at ang kanyang isang taong gulang na anak na babae sa aksidente sa tricycle sa Nueva Ecija.

Kinilala ng pulisya ang mga biktima na sina Mark Anthony Rosario at ang kanyang bunsong anak na si Abegail.

Salaysay ng pamilya sa awtoridad, isang metal na bahagi ng sasakyan ang natanggal sa sidecar, dahilan para mawalan ng kontrol ang tricycle at bumangga sa puno ng mahogany.

Nasugatan din sa aksidente ang asawa ni rosario at dalawa pang anak.

Nahulog ang bata sa sasakyan dahil sa impact.

Nabatid na madalas bumiyahe ang pamilya sa Nueva Ecija para sa kanilang negosyong paggawa ng kubo ng kawayan.

Dead on the spot ang isang Construction Worker ng hindi pa kilalang mga salarin sa Banna, Ilocos Norte.

Kinilala ng awtoridad ang biktima na si Isaac Casay, 54-anyos.

Ayon sa awtoridad, pauwi na ang biktima na sakay ng kaniyang motorsiklo nang pagbabarilin siya ng mga salarin.

Narekober ng mga awtoridad sa crime scene ang 21 basyo ng bala ng hindi pa tukoy na mga baril at nakuha sa bag ni casay ang isang kalibre .45 na baril.

Sa background checking, napag-alaman na may criminal record ang biktima at kilalang nagpapahiram ng pera sa lugar.

Nabanggit ng kanyang asawa na may sumusunod sa kanya noong siya ay nangongolekta ng mga bayad sa utang.

Inaalam pa ng pulisya ang motibo sa likod ng krimen at pagkakakilanlan ng mga suspek.

Dinampot ng awtoridad ang isang lalaki makaraang ireklamo ng kanyang pamangkin nang harangin siya at dalawang beses pang nagpaputok sa harap ng biktima sa Carmona City, Cavite.

Ayon sa awtoridad, naglalakad ang biktima galing sa kanilang sakahan nang harangin siya ng kanyang tiyuhin at komprontahin hinggil sa dati nilang alitan.

Nagkaroon ng mainitang pagtatalo ang dalawa hanggang sa inilabas ng kanyang tiyuhin ang isang kalibre 45 na baril at ipinutok ng dalawang beses sa lupa.

Narekober sa suspek ang ginamit na baril, dalawang magazine na may bala.

Ang suspek ay nasa kustodiya na ng pulisya at nahaharap sa kasong paglabag sa alarm and scandal ang suspek na si alyas Nicanor dahil sa reklamo ng kanyang pamangkin na si alyas Edward.

Matapos pagnakawan ang isang kapilya, tinungga pa ng mga kawatan ang communion wine ng Pari sa Zamboanga City.

Ayon sa salaysay ng caretaker ng Santa Clara Chapel sa mga pulis, napansin niyang bukas at nawawala ang kandado ng pinto ng kapilya nang dumating siya rito.

Dito na niya nadiskubre na nawawala na ang ilang kagamitan gaya ng piano, sound system, telebisyon, water dispenser at karaoke system ng kapilya.

Hindi rin umano pinalampas ng kawatan ang communion wine na iniinom ng Pari sa misa na inilalagay sa tabi ng altar.

Nirerebyu na ng pulisya ang mga kuha sa surveillance camera sa lugar para sa pagkakakilanlan ng mga kawatan.

Tatlo ang patay habang isa ang sugatan sa banggaan ng tricycle at commuter van sa Umingan, Pangasinan.

Ayon sa awtoridad, sangkot sa aksidente ang anim na indibiwal kabilang ang isang mag-asawa at isang Catholic Priest.

Sa imbestigasyon, bumibiyahe ang van papuntang kanlurang direksyon sa provincial road sa naturang lugar.

Pagdating nito sa pinangyarihan ng insidente, biglang lumabas sa may intersection ang trike kaya nagkasalpukan ang dalawang sasakyan.

Resulta nito, nagtamo ng sugat sa iba’t ibang parte ng kanilang katawan ang mga sakay ng tricycle na agad na dinala sa ospital.

Gayunman, dalawa sa sakay ng trike at ng pari ay idineklarang dead-on-arrival ng umasisteng doktor.

Hindi naman nasaktan sa naturang insidente ang driver ng commuter van at ang kasama nito.

Patay sa saksak ang isang 16-anyos na binatilyo sa Kasibu, Nueva Vizcaya. Ang madugong krimen, nag-ugat umano sa pagwawala ng biktima habang lasing.

Ayon sa awtoirdad, ang insidente ay kinasasangkutan ng suspek na pinsan din ng biktima kasama ang pitong iba pa.

Nang malasing ang biktima, sinimulan umano nitong suntukin ang dingding ng isang abandonadong bahay kung saan sila nag-iinuman. Dahil sa biglang pagwawala ng biktima mabilis na umalis ang mga kasama nito at naiwan na lamang ang suspek.

Nang tangkaing pakalmahin ng suspek ang biktima, galit na binalingan siya ng biktima at sinakal ito.

Bilang pagtatanggol sa sarili, sinaksak umano ng suspek ang biktima gamit ang hunting knife at mabilis na umalis sa lugar

Inamin naman ng suspek ang ginawang krimen sa kanyang mga magulang, at itinurn-over siya sa mga awtoridad.

Dinala ang suspek sa kustodiya ng Kasibu Police Station, sa ilalim ng pangangasiwa ng Women’s and Children’s Protection Desk at ibibigay sa Department of Social Welfare and Development pagkatapos ng inquest proceedings para sa kasong homicide.

Isang Barangay Captain na nangangasiwa sa isang cleanup project ang napatay ng riding-in-tandem sa Maragondon, Cavite.

Kinilala ng Maragondon Police ang biktima na si Rodrigo Tanagras, 53-anyos, isang retired provincial police officer at kasalukuyang Chairman ng Barangay Tulay A sa nasabing bayan.

Sa imbestigasyon ng awtoridad, tinutulungan ng biktima ang mga Barangay Health Workers na magputol ng damo sa kahabaan ng Barangay Road nang biglang sumulpot ang dalawang hindi kilalang lalaki na sakay ng isang motorsiklo at binaril ito.

Mabilis namang dinala sa ospital ang biktima ngunit idinekrang dead on arrival ng mga sumuring doktor.

Patuloy naman ang imbestigasyon ng pulisya sa pananambang.

Tatlong lalaki ang inaresto ng mga pulis dahil sa pagkatay at pagluluto ng mga aso sa South Sanitary Camp, Baguio City.

Iniulat ng isang residente sa mga pulis ang insidente matapos masaksihan kung paano katayin at ihanda ng mga suspek ang karne ng aso.

Kinumpirma naman ng Veterinary Office na dog meat ang nakumpiskang karne ng mga awtoridad mula sa mga suspek.

Nahaharap ang mga lalaki sa mga kasong paglabag sa Animal Welfare Act na maaaring magresulta sa pagkakakulong ng isa hanggang tatlong taon at kaukulang multa.