RONDA PROBINSYA

Patay ang isang 72-anyos na Vegetable Vendor matapos siyang mabangga ng isang motorsiklo sa Valladolid, Negros Occidental.

Kinilala ng pulisya ang biktima na si Loreto Sandico.

Ayon sa Valladolid Police, tumatawid sa kalsada ang biktima para makarating sa kanyang delivery vehicle na nakaparada sa tapat.

Gayunman, nabundol siya ng humaharurot na motorsiklo na minamaneho ng 23-anyos na lalaki na walang suot na helmet.

Idineklara namang patay si Sandico sa ospital sa mga natamo nitong pinsala sa pangyayari.

Nahaharap naman sa mga kaukulang kaso ang nasagutang rider.

Patay sa suntok ang isang lalaki habang nakikipag-inuman ang una sa San Pascual, Batangas.

Ayon sa awtoridad, idineklarang dead on arrival sa ospital ang biktimang si Freddie Marasigan matapos itong suntukin ng suspek sa panga.

Nakikipag-inuman umano ang biktima sa mga kaibigan nito nang dumatng ang lasing na suspek sa kanilang lugar.

Nagtalo ang mga ito hanggang sa suntukin ito sa mukha ng suspek, dahilan para bumagsak ito.

Nagsasagawa na ng follow up operation ang mga pulis para sa ikadarakip ng tumakas na suspek.

Patay ang dalawang lalaki matapos silang tambangan habang lulan ng pedicab sa Datu Odin Sinsuat, Maguindanao Del Norte.

Sa ulat ng Datu Odin Sinsuat Municipal Police Station at ng Maguindanao Del Norte Provincial Police Office, ang mga napatay sa naturang ambush ay kinilalang sina Mheds Baman at Kusain Abdullah.

Sa ulat ng pulisya, sakay ng tricycle ang dalawang biktima nang sila ay pagbabarilin ng mga armado indibidwal.

Nang makitang napuruhan ang dalawang biktima, mabilis na tumakas ang mga armadong suspek, ayon sa mga saksi.

Patuloy naman ang imbestigasyon ng mga pulis sa insidente para bigyang hustiya ang mga biktima.

Dead on the spot ang isang walong buwang buntis matapos siyang makuryente sa Diadi, Nueva Vizcaya.

Ayon sa awtoridad, nagwawalis sa paligid ng isang water pump ang ina ng buntis nang makuryente ito sa barangay arwas.

Tinulungan siya ng anak, ngunit nakuryente rin ang biktima.

Dinala sa ospital ang mag-ina, ngunit hindi na umabot ng buhay ang anak nitong buntis.

Nagpapagaling sa kasalukuyan ang kaniyang ina.

Lumabas sa imbestigasyon na tatlong araw nang hindi gumagana ang water pump at posibleng nabasa ang linya ng kuryente dahil sa pag-uulan na hatid ng bagyong Enteng.

Nasawi ang isang trabahador nang mahulog mula sa tinutuntungang container van sa loob ng Manila Harbor Center sa Tondo, Manila.

Kinilala ng awtoridad ang biktimang si randy transmanio, trabahador ng load container yard.

Ayon sa Raxabago Police Station, bago ang insidente ay nakasakay ang biktima sa ibabaw ng isang container van at inaasistihan ang crane operator sa pag-aayos nito.

Gayunman, dahil sa masamang panahon at malakas na hangin ay bigla umanong gumalaw ang container van na nagresulta upang mawalan ng balanse ang biktima at mahulog sa sementadong sahig.

Kaagad naman siyang naisugod sa pagamutan sa mga natamo nitong pinsala sa ulo at katawan ngunit nasawi rin.

Dead on the spot ang isang basurero sa Davao City matapos itong mahulog at masagasaan ng kaniyang sinasakyang garbage truck.

Ayon sa awtoridad, nakaupo sa ibabaw ng trak ang basurero nang makalawit ito ng nakalaylay na wire na nagresulta sa aksidente.

Bago ang insidente, isa pang trak ang napaulat na sumabit sa kable, dahilan para lumaylay ito.

Nagsagawa naman ng karagdagang imbestigahan ang pulisya hinggil sa insidente.

Patay ang isang anim na taong gulang na batang babae at sugatan ang kanyang ina matapos silang masagasaan ng pampasaherong bus sa Calbayog City, Samar.

Ayon sa awtoridad, tumatawid ang batang babae na si alyas ina sa kalsada nang tangkaing iligtas siya ng kanyang ina na si Alyas Dina sa pamamagitan ng pagtataas ng kamay… Hudyat na huminto ang paparating na bus.

Gayunpaman, nabigo ang bus sa pagpreno sa oras at natamaan ang mga biktima.

Nagtamo ng mga sugat ang mga biktima at dinala sa ospital ngunit idineklarang dead on arrival ang bata

Nasa kustodiya ng calbayog city police ang driver at ang bus.

Dalawang rider ang nasawi matapos mabangga ng isang truck ang kanilang mga motorsiklo sa Davao City.

Ayon pulisya, binabaybay ng truck ang Davao-Bukidnon Road papuntang Davao City.

Pagdating sa isang kurbada, lumipat umano ang trak sa kabilang linya at nabangga ang dalawang motorsiklo.

Tinutugis na ng mga awtoridad ang driver ng truck na tumakas matapos ang insidente.

Dead on the spot ang isang negosyante habang sugatan ang asawa nitong Barangay Kagawad nang pagbabarilin sila ng hindi pa nakikila­lang salarin sa Manabo, Abra.

Kinilala ng awtoridad ang mga biktima na sina Rodel Bermudez, at asawang nito Zoraida.

Sa imbestigasyon ng pulisya, nasa loob ng kanilang tindahan ang mga biktima nang lumapit ang isang lalaki at pagbabarilin ang mga ito.

Patuloy ang isinasagawang pagtugis ng mga awtoridad sa suspek.

Inaalam na ng pulisya ang motibo ng suspek sa krimen.

Pinaghahanap na ng pulisya ang tatlong preso na tumakas sa fishport custodial facility sa Taytay, Rizal.

Kinilala ng Taytay Municipal Police Station ang tatlong pugante na sina Danny Boy Cancuno at Ronald Barrera na kapwa nakakulong dahil sa iligal na droga, at Kurt Cavasal na nahaharap sa paglabag sa firearms and ammunition law.

Nakatakas sa kulungan ang tatlo matapos sirain ang metal frame sa kusina ng kulungan kasabay ng pananalasa ng bagyong Enteng.

May alok namang P10,000 pabuya ang Taytay Police para sa sinumang makapagbibigay ng impormasyon sa ikadarakip ng bawat preso.

Tumawag lamang sa mga numerong 0917-163-3556 o 0998-598-5730.