Anim na call center agents ang sugatan matapos maaksidente ang kanilang sinasakyang kotse sa Talisay City sa Cebu.
Ayon sa awtoridad, ang mga biktima ay nagmula sa isang out of town vacation at babalik na sana sa Cebu City nang maaksidente.
Batay sa imbestigasyon, tumama ang sasakyan sa guard rails ng tulay na nagresulta sa pagtaob ng sasakyan.
Samantala, lahat ng mga pasahero ay nasa maayos nang kalagayan.
Isa ang nasawi sa karambola ng mga motorbanca sa bayan ng Ajuy sa Iloilo Province.
Ayon sa awtoridad, natagpuang nakalutang ang 23-anyos na lalaki sa baybayin ng barangay nasidman sa nasabing bayan.
Ang lalaki ay nakilala lamang bilang “Rene.”
Sakay siya ng isang motorbanca kasama ang kanyang kuya habang papalabas sila sa dagat upang mangisda nang mabundol sila ng mas malaking motorbanca na may apat na pasahero.
Sa impak, tumaob ang motorbanca na sinakyan ng biktima at ng kanyang kapatid.
Ayon sa imbestigasyon ng Ajuy Police, posibleng natamaan ng bahagi ng motorbanca ang biktima at natumba at nahulog ito sa dagat
Ibinunyag ng Philippine Coast Guard na may mga blinker ang dalawang motorbanca, ngunit maaaring mali ang kalkulasyon ng kanilang tinatahak dahil madilim.
Hinihintay ng pulisya ang desisyon ng pamilya ng biktima sa pagsasampa ng kaso laban sa kapitan o operator ng motorbanca.
Patay ang isang 16-anyos na lalaki sa Cabuyao, Laguna matapos itong pagbabarilin sa ulo ng suspek sa loob ng Barangay Hall dahil sa umano’y pagnanakaw ng mga bakal.
Kinilala ng awtoridad ang biktima na si john Christian Valenzuela o “Dadoy”.
Sa imbestigasyon ng awtoridad, pinapunta sa Barangay Hall si Dadoy sa umano’y pagkakasangkot nito sa pagnanakaw.
Ngunit hindi na ito nakabalik nang buhay sa kanyang pamilya.
Ayon sa pulisya, lasing ang suspek na isang magsasaka nang dumating sa Barangay Hall ngunit imbes na magkaayos kaagad nitong binaril ang binatilyo at mabilis na tumakas sa lugar matapos ang krimen
Mabilis namang naaresto ang suspek ng mga awtoridad, ngunit hindi na nakuha sa kanya ang baril matapos itapon nito ang baril sa kasagsagan ng pagtakas nito.
Inamin ng suspek ang kanyang krimen at sumailalim sa inquest proceedings para sa mga kasong murder.
Pinagbabaril at nilooban ang isang negosyante at ang kanyang asawa habang binubuksan ang kanilang tindahan sa isang public market sa Bauan, Batangas.
Kinilala ng pulisya ang mga biktima na sina alyas Marlon, at asawa nitong si alyas Angelina.
Ayon sa imbestigasyon, dumating ang mga suspek at pinagbabaril ang mga biktima ng malapitan.
Pumasok ang mga suspek sa loob at kinuha ang pera na tinatayang nasa 80,000 pesos at mga alahas.
Dinala pa ang mga biktima sa ospital kung saan idineklara silang patay ng umasisteng doktor.
Nagsasagawa ng follow-up investigation at manhunt operations ang mga pulis laban sa mga suspek na tumakas sa hindi malamang direksyon.
Dahil sa balita tungkol sa pag-aresto kay pastor Apollo Quiboloy, isang lalaki sa bayan ng Consolacion, Cebu ang nagmamadaling itinapon ang isang nakasinding egg tray sa kanilang barangay.
Hindi inaasahan ni Dondon Furog na mauuwi sa kapahamakan ang kanyang kasabikan na pagkaka-aresto ni Quiboloy sa telebisyon dahil nagresulta sa malaking sunog ang nakasinding egg tray sa Barangay Tayud.
Sa salaysay ni Furog sa pulisya, nagsindi siya ng egg tray bilang alternatibo para sa katol.
Makalipas ang ilang sandali, nagkaroon ng kaguluhan sa kapitbahay nang makitang nasusunog ang bahay ni Furog.
Dahil sa insedente, 13 bahay ang natupok ng apoy at nasa 250,000 pesos ang halaga ng pinsala sa ari-arian.
Sa kabila nito, walang nasaktan sa insidente.
Dead on the spot ang isang off-duty na sundalo nang pagbabarilin ng mga armadong kalalakihan sa Dumalinao, Zamboanga Del Sur
Kinilala ng awtoridad ang ambush victim na si Private First Class Mark Leo Capute, kasapi ng 44th Infantry Battalion ng 1st Infantry Division ng Philippine Army.
Ayon sa pulisya, nag-weekend pass lang umano ang biktima upang madalaw ang kanyang pamilya sa naturang bayan.
Inaalam pa ng mga imbestigador, kung sino ang responsable sa pag-ambush kay Capute na mabilis na nakatakas matapos maisagawa ang naturang krimen.
Hindi naman tinangay ng mga salarin ang service pistol ni Capute at motorsiklo nito, ayon sa salaysay ng mga barangay officials at mga imbestigador ng Dumalinao MPS.
Dalawa ang patay at tatlo ang sugatan makaraang magbanggaan ang magkasalubong na motorsiklo sa Real, Quezon.
Ayon sa pulisya, kapwa binabagtas ng dalawang motorsiklo ang kahabaan ng national highway nang magsalpukan ang mga ito.
Dahil sa lakas ng banggaan, pare-parehong sumemplang sa kalye ang dalawang driver at kanilang mga angkas na nagresulta sa agarang pagkamatay ng dalawa sa kanila.
Lumalabas na pare-pareho umanong walang suot na helmet ang mga nasangkot sa road crash incident.
Patay ang isang lalaki nang iuntog sa semento ang ulo nito ng isa sa mga lalaking kanyang kasuntukan sa Antipolo City.
Kinilala lamang ng pulisya ang biktima na si alyas ‘John’ arestado naman ang isa sa mga suspek na si alyas ‘Ronnie,’ habang tinutugis pa ng mga pulis si alyas ‘Carlo.’
Ayon sa Antipolo City Police, nagkaroon ng ‘di pagkakaunawaan ang mga suspek at biktima na nauwi sa suntukan.
Sa kasagsagan ng upakan, nawalan ng balanse ang biktima at nabuwal sa sementadong sahig.
Sinamantala naman umano ito ni alyas Carlo at ilang ulit nainumpog ang ulo ng biktima sa semento, sanhi upang mawalan ito ng malay.
Mabilis na isinugod ang biktima sa pagamutan ngunit nasawi habang nilalapatan ng lunas.
Sumiklab ang isang kaguluhan sa loob ng kulungan sa San Mateo, Rizal.
Na ikinasagot ng 60 Persons Deprived of Liberty (PDL) at 20 kawani ng Bureau of Jail Management and Penology ang nagtamo ng minor injuries sa insedente.
Ayon kay BJMP Spokesperson Jail Chief Inspector Jayrex Bustinera, pitong PDL ang nagsimula ng noise barrage sa loob ng kulungan hanggang sa nauwi ito sa kaguluhan matapos silang sapilitang pahintuin.
Ang kaguluhan raw ay nag-ugat umano sa pagtutol ng ilang pdl sa cashless system ng bilangguan.
Magsasagawa pa rin daw ng masusing imbestigasyon ang bjmp sa totoong kalagayan ng bilangguan at sa mga kawani nito.
Patay ang isang 72-anyos na Vegetable Vendor matapos siyang mabangga ng isang motorsiklo sa Valladolid, Negros Occidental.
Kinilala ng pulisya ang biktima na si Loreto Sandico.
Ayon sa Valladolid Police, tumatawid sa kalsada ang biktima para makarating sa kanyang delivery vehicle na nakaparada sa tapat.
Gayunman, nabundol siya ng humaharurot na motorsiklo na minamaneho ng 23-anyos na lalaki na walang suot na helmet.
Idineklara namang patay si Sandico sa ospital sa mga natamo nitong pinsala sa pangyayari.
Nahaharap naman sa mga kaukulang kaso ang nasagutang rider.