RONDA PROBINSYA

Nahaharap sa multa ang mga hindi pa nabakunahang indibidwal ng bayan ng Carmen sa Agusan del Norte.

Naglabas si Carmen Mayor Jovitte Calo ng executive order noong Enero a-27 para sa mandatory vaccination ng mga miyembro ng populasyon, kabilang ang mga menor de edad na may edad 12 hanggang 17 anyos.

Sa ilalim ng EO, ang mga hindi nabakunahang residente ay hindi papayagang lumabas ng kanilang mga tahanan maliban upang bumili ng mga mahahalagang produkto at serbisyo.

Ang mga lalabag ay magmumulta mula P500 hanggang P1,000.

Ipinapatupad ang “no vaccination, no entry” policy sa pinagsanib na checkpoint ng mga otoridad, militar at Department of Health (DOH) sa barangay Tagcatong malapit sa boundary ng Agusan del Norte at Misamis Oriental. —sa panulat ni Kim Gomez

Natagpuan ng mga otoridad ang bangkay ng magkapatid na tinangay ng agos at nalunod sa Pasunglao River sa Tabuk City, Kalinga.

Kinilala ang mga biktima na sina Frank Smith Gonzalo disi-syete anyos at Maybelle Gonzalo, bente dos anyos.

Ayon kay Major George Gonzalo, ang unang bangkay ay natagpuan sa mabatong bahagi ng bongdoen quarry habang ang bangkay ng kapatid ni Frank, na si Maybelle Gonzalo ay nakuha umanong lumulutang sa ilog kinagabihan.

Nalunod sina Frank at Maybelle noong Pebrero a-1 habang lumalangoy kasama ang iba pang miyembro ng pamilya sa nasabing ilog sa Calanan, Tabuk City. —sa panulat ni Kim Gomez

Inihayag ni Ministry of Health (MOH) Chief Dr. Bashary Latiph na patuloy na bumababa ang mga kaso ng Covid-19 sa Bangsamoro Autonomous Region in Muslim Mindanao (BARMM).

Ayon kay Latiph, ang rehiyon ay may kabuuang 18,975 na kumpirmadong kaso, 17,423 nakarekober, at 884 na aktibong kaso habang nasa 668 na ang bilang ng nasawi sa Covid-19.

Samantala, sinabi ni MOH-BARMM Direktor-General Dr. Ameril Usman, na ang mga nahawahan ay nagpapakita ng mild symptoms na isang indikasyon na gumagana ang bakuna.

Gayunpaman, binanggit ni Usman na ang pag-aalinlangan sa pagbabakuna ay nananatiling mataas sa rehiyon na may “personal na paniniwala” bilang kanilang dahilan sa pagtanggi na magpabakuna. –Sa panulat ni Kim Gomez

Inihayag si Assistant Provincial Health Officer na si Dr. Liland Estacion na humigit-kumulang 90% ng mga namatay sa Covid-19 ang hindi pa nabakunahan sa Negros Oriental.

Ayon kay Estacion, mayroon ding mga namamatay na may kaugnayan sa Covid sa mga nabakunahang indibidwal na may mga comorbidities tulad ng cancer, diabetes at hypertension.

Sinabi ng opisyal, na ang rehiyon ay may 750 na covid-related deaths, kung saan, nakapagtala ng isang daan at limamput walong covid-related deaths ang lungsod.

Habang ang iba pang mga bayan at lungsod ay mayroon lamang double-digit na mga namamatay sa virus.

Samantala, nanawagan ang health official, na magpakabuna kontra Covid-19 at huwag maniwala sa mga maling akusasyon na nakapalibot sa bakuna kontra Covid-19. —sa panulat ni Kim Gomez

Kinumpirma ni Town Agriculturist Jose Quinonero ang pagkakaroon ng hawaan ng african swine fever (ASF) sa Bayan ng Tulunan sa North Cotabato.

Ayon kay Quinonero, ang kaso ng ASF sa bayan ay natunton sa barangay Bagumbayan kung saan, nasa apat na put siyam na baboy ang na-culled (keld) at labing apat na magsasaka ang apektado sa nasabing barangay.

Dadag pa ng town agriculturist, na ang tulunan ang ikaapat na bayan sa lalawigan na tinamaan ng asf infestation ngayong taon ng nasabing lalawigan.

Samantala, nakipag-ugnayan ang pamahalaang bayan sa Philippine Crop Insurance Corporation (PCIC) para matukoy ang mga rehistrado at hindi rehistradong hog raisers sa Bagumbayan village para sa karagdagang tulong sa gitna ng infestation. —sa panulat ni Kim Gomez

Nananatiling suspendido ang mga aktibidad at turismo sa bayan ng tinglayan, balbalan, lubuagan, pasil at pinukpuk dahil sa patuloy na banta ng Covid-19 sa lalawigan ng Kalinga.

Gayunpaman, ang Tabuk City at Tanudan town, ay binuksan para sa mga fully vaccinated na mga turista sa kondisyon na ang mga tourist spots ay may 50% capacity para sa outdoor dining at 30% capacity para sa indoor dine ins sa mga establisyemento.

Samantala,  sinabi ni Municipal Administrator Noel Macaiba, na ang mga aktibidad sa turismo lalo na sa Upland Buscalan village ay mananatiling suspendido sa publiko.

Ang lalawigan ng Kalinga ay nasa ilalim ng alert level 3 kung saan, nakapagtala ng tatlumput dalawang bagong positibong kaso ng virus at apat na daan at anim na put siyam na aktibong kaso ng Covid-19. —sa panulat ni Kim Gomez

Binuksan na ng lokal na pamahalaan ng Valenzuela ang sampung palaruan sa Sentro Sama-Samang Serbisyo Centers (3S).

Para makapunta, kailangang may kasamang magulang o guardian ang mga bata sa amusement spaces na bukas kada araw mula alas-8 ng umaga hanggang alas-5 ng hapon.

Lilimitahan naman ang mga magtutungo rito upang matiyak na maayos na nasusunod ang health protocols.

Ang sampung center playgrounds ay nasa; Baranggays Gen. T. De Leon, Karuhatan, Marulas, Punturin, Paso De Blas, Lawang Bato, Maysan, Bagbaguin, Ugong, at Arkong Bato. —sa panulat ni Abby Malanday

Niyanig ng magnitude 4 na lindol ang probinsiya ng Aurora dakong alas syete kagabi.

Natunton ng sentro ng pagyanig 7 kilometers, pa-Timog-Kanluran sa bayan ng Dilasag sa Aurora.

Tectonic ang origin ng lindol na may lalim na 033 kilometers.

Naramdaman din ang pagyanig sa intensity 4 sa Maddela, Quirino.

Naitala rin ng mga instrumento ng Phivolcs ang pagyanig sa intensity 2 sa Santiago, Isabela at intensity 1 sa Baler, Aurora.

Ayon sa Phivolcs, ang tectonic na pinagmulan ng lindol ay sanhi ng paggalaw ng isang aktibong fault line malapit sa lugar.

Gayunpaman, walang naitala ang Phivolcs ng anumang pinsala sa ari-arian o aftershocks dahil sa nasabing lindol.—sa panulat ni Kim Gomez

Aabot sa 15 Abu Sayyaf Bandits ang sumuko sa Sulu nitong nakaraang buwan.

Ayon kay Joint Task Force Sulu Commander Major General William Gonzales, itinurn-over ng mga ito sa kanila ang nasa 12 baril na magkakaiba ang kalibre.

Ilan sa mga sumuko ay miyembro ng pamilya ng napatay na sub-leader na si Abu Talha, eksperto sa paggawa ng bomba at liaison ng Islamic State to the Abu Sayyaf. —sa panulat ni Abby Malanday

Magandang balita para sa mga single na empleyado ng municipal government ng General Luna sa Quezon Province.

Papayagan ang mga itong maghain ng leave sa darating na Valentine’s Day.

Ayon kay Mayor Matt Erwin Florido, alinsunod ito sa inilabas sa Executive Order kung saan bibigyan ang mga empleyado ng oras na mag-reflect at hanapin ang kanilang true love.

Kung papasok naman sa Araw ng mga Puso, bibigayan ito ng double pay.

Para sa mga kwalipikado, magparehistro lamang sa Human Resource Office para sa pagsisiyasat kung wala ka ba talagang jowa.

Noong nakaraang taon, nasa 43 ang single employee ng municipal government. —sa panulat ni Abby Malanday