RONDA PROBINSYA

Kinumpirma ni Sipalay City, Negros Occidental Mayor Maria Gina Lizares na na-hack ang kanyang official Facebook account.

Nanawagan si Lizares na baliwalain ang anumang mensahe o request mula sa Facebook account na Gina Montilla, na ginagamit ngayon ng isang hacker.

Dapat din anyang I-report at magpadala ng screenshot ng nasabing FB account kung makatatanggap ng mga mensahe na humihiling ng pera o donasyon.

Nagsasagawa na rin ng sila ng imbestigasyon upang matunton ang taong nasa likod ng hacking at makapaghain ng kaso laban dito.

Sumuko ang isang lalaki na nakapatay sa kanyang kapit-bahay sa Lapu-Lapu City, Cebu.

Kinilala ang biktima na si Jonas Tuñacao, habang natukoy naman ang suspek na si Edwin Egañia.

Ayon sa mga otoridad, nasawi ang biktima na si matapos hampasin ng bato sa ulo.

Depensa naman ni Egañia, bigla na lang umano siyang sinuntok sa tiyan ng kaniyang kapit-bahay na si tuñacao kaya nagawa niyang mahampas ang biktima.

Samantala, humingi ng paumanhin ang suspek na nahaharap sa kasong murder, sa pamilya ng biktima at sumuko ito dahil umano nakokonsensya na sa kanyang nagawa.—sa panulat ni Mara Valle

Patay ang isang pulis matapos maka-engkwentro ang hindi pa mabatid na bilang na miyembro ng New People’s Army sa Lapinig, Northern Samar.

Ayon sa Philippine Army, nagpapatrolya ang biktimang si Lt. Kenneth Tadawan, isa sa mga leader ng Regional Mobile Force Battalion ng 801st Maneuver Company nang makasagupa nila ang NPA.

Kasama ng mga tropa ng militar ang ilang pulis sa naturang lugar nang maganap ang insidente.

Nadiskubre naman malapit sa encounter scene ang isang bahay na hinihinalang kuta ng mga rebelde kung saan narekober ang ilang pampasabog.  —sa panulat ni Mara Valle

Ikakasa ng Rural Health Unit ang Mobile Vaccination sa Castillejos, Zambales para sa mga bedridden senior citizens at iba pang indibidwal na nakaratay dahil sa karamdaman.

Magsisimula bukas, Pebrero a-9 ang pagbabakuna bilang tugon sa pagpapataas ng Vaccination rate ng bansa.

Para sa mga nais magpabakuna kontra COVID-19, maaaring makaipag-ugnayan at magpalista sa mga Barangay o kaya ay direktang tumawag sa hotline na 09381902359 para mapuntahan ng Vaccination Team. —sa panulat ni Angelica Doctolero

Patay ang anim na indibidwal matapos magpositibo sa Cholera na isang uri ng bacteria kung saan, tinatarget nito ang intestine ng isang tao.

Base sa mga samples na sinuri ng Department of Health (DOH), 491 ang nagpositibo sa nasabing diarrhea mula sa bayan ng Caraga, Davao Oriental kabilang na dito ang anim na nasawi.

Naglagay na ng karagdagang mga doktor, nurse, at iba pang tauhan ang Local Government Unit (LGU) para matugunan ang pagkalat ng sinasabing waterborne disease habang magsasagawa narin ng survey sa kada-bahay para masuri ang hydration status ng mga residente.

Sa ngayon, nasa 230 ang kasalukuyang naka-admit sa iba’t-ibang ospital.

Dahil dito, naglunsad na ng Massive Emergency Health Response ang rehiyon para maaksyunan ang kasalukuyang Cholera Outbreak habang plano ding magdeklara ng State of Calamity upang tugunan ang pangunahing problema ng mga residente. —sa panulat ni Angelica Doctolero

Patay ang dalawang lalaking sakay ng isang motorsiklo makaraang sumalpok sa isang armored van sa Candelaria, Quezon.

Kinilala ang dalawang nasawi na sina Profer Benitez, 50-anyos at Rupert Buan habang under custody naman ang suspek na driver ng armored van na si Crisanto Ella, 45-anyos.

Base sa impormasyong nakuha ng mga tauhan ng Quezon Provincial Police Office, patungo sana sa Town Proper ang dalawang biktima nang makasalubong ang isang van na nasa kabilang linya at dito na naganap ang aksidente.

Nahaharap ngayon sa kasong Reckless Imprudence Resulting to Double Homicide at Damage to Property ang suspek na si Ella.   —sa panulat ni Angelica Doctolero

Arestado ang 2 hinihinalang bigtime pusher matapos makuhanan ng mahigit P3 milyon na halaga ng shabu sa parking lot ng isang mall sa Bacoor City.

Kinilala ang mga suspek na sina Joery Villafañe, trenta’y siete anyos at Ignito Mejares, kwarenta’y dos anyos.

Naaresto ang mga suspek sa ikinasang buy-bust operation ng mga otoridad matapos makipagtransaksyon ang poseur-buyer sa mga ito na kilala umanong supplier at tulak ng droga sa Cavite at mga karatig lugar.

Samantala, narekober sa mga suspek ang dalawang knot tied transparent plastic bag na naglalaman ng shabu na mahigit 500 gramo na nagkakahalagang P3,400,000. –Sa panulat ni Mara Valle

Nanawagan ang lokal na pamahalaan ng Baguio City sa Inter-Agency Task Force on Emerging Infectious Diseases (IATF) na ibaba na sa Alert level 2 mula sa Alert level 3 status ang kanilang lalawigan dahil sa kanilang umaayos na sitwasyon sa kaso ng Covid-19.

Ayon kay Mayor Benjamin Magalong, ang case reproduction number sa Baguio City ay patuloy ang pagbaba matapos nitong tumaas noong Enero 3. Mula sa 693 kaso kada araw, bumaba na ito ngayon sa 141.

Sa report ni City Health Officer Dr. Rowena Galpo sa management committee nitong Pebrero a-2, ang epidemic risk level sa lungsod ay nasa “moderate risk” na, base sa average daily attack rate at ang 2 linggong growth rate, nitong Pebrero a-1.

Nabatid na bumagsak ang average daily attack rate (ADAR) sa Baguio sa 74 kada 100,000 populasyon mula sa 98 kada 1,000, habang ang 2-week growth rate naman ay bumaba sa -29% mula sa dating 187%.  –Sa panulat ni Mara Valle

Pinapayagan na lokal na pamahalaan ng Puerto Galera ang lahat ng turista na makapasok sa kanilang lugar.

Ayon kay Puerto Galera Mayor Rocky Ilagan, pwede na sa kanila ang sinumang turista bata man o matanda at kahit ano pa man ang vaccination status.

Maliban dito, hindi na rin hihingian ng RT-PCR o antigen negative test result ang mga turista kahit pa magtungo ang mga ito sa iba’t ibang island-town.

Pero kinakailangan pa ring magparehistro sa Puerto Galera Tourist Registration Application para sa QR Code at kumuha ng S-Pass.

Dahil dito, inaasalan ng lokal na pamahalaan na babalik na ang sigla ng kanilang turismo. —sa panulat ni Abie Aliño-Angeles

Mayorya ng mga probinsya sa bansa ang nakikitaan na ng downward trend o pagbaba sa naitatalang kaso ng COVID-19.

Ayon kay OCTA Research Fellow Dr. Guido David, higit kumulang limang probinsya na lang ang mayroong positive growth rates sa kanilang COVID-19 cases.

Maliban dito, nasa 8,400 na lamang din ang seven-day average cases sa bansa at inaasahang bababa pa ito sa 5K sa susunod na linggo.

Dahil dito, umaasa ang OCTA na bababa pa ang naitatalang positivity rate sa bansa at babalik ito sa “pre-omicron” surge leve pagdating ng Marso.  —sa panulat ni Abie Aliño-Angeles